Vawiin khan SSA, PHE leh Health Department-te tangkawp buatsaihin Global Hand Washing Day 2018 chu Govt. Vengthlang Middle School-ah neih a ni a. Kumin atan 'Kut silfai la, i lo hrisel ang' tih chu thupui a hman a ni.

He hun hi Pi K. Lalsiamliani, DPC, SSA Champhai chuan kaihruaiin  bawlhhlawh leh thil bal kan khawih kher loh pawhin kut silfai thin hi a pawimawh em em a ni, a ti a. Kut kan sil fai tawk thin loh avangin kan ei leh in a bal awmte kan eitel thin a, hei hian kan taksa tan hrisel lohna a thlen thei a, ei leh in dawn leh inthiar zawh bakah school ban a in thlen velehah kut hi kan sil ngei ngei tur a ni a ti bawk.

Pi Julie C. Mawii, District CoOrdinator SBMG chuan kum 2008 atangin khawvelah hand washing day hi hman tan a nih thu leh kut tin kara bawlhhlawh kaiah te hian natna hrik tam tak a awm thin avanga kut silfai zel a pawimawh thu a sawi.

He hunah hian Zirlai naupangte kut sil dan tur zirtir an ni a, zirlai naupang te hian a takin tuiah kut sil dan tur zirtir an nih ang hian kut an sil chhin nghal a ni.

Global Handwashing Day hi Champhai District Sikul zawng zawngah hman tura duan niin Champhai khawpui chhunga Sikulte chu hmun hnihah thenin Govt. Primary School VI ah leh Govt. Vengthlang Middle School - ah te he hun hi hman a ni a. Govt P/S VI ah Pu R.Laldanmawia, SDO, PHE hova hman a ni ve bawk. Thingtlang lamah chuan sikul tinin anmahni remchan angin  School theuhah he hun hi an hmang ve bawk.