Vawiin khan AVBD Champhai leh NSS Govt Champhai College te tangkawp buatsaihin National Voluntary Blood Donation Day  chu Govt Champhai College Multipurpose Hall-ah  hman a ni a, he hun hi DIET Champhai Principal Pu RL Thianghlima'n khuallian niin a hmanpui a ni.

 

Khuallian chuan Association thenkhat chu mahni inhaivur leh mahni pawl tana thawk an ni thin a, AVBD erawh chu mahni pawl haivur leh mimal hamthatna lam ngaihtuah lova midangte tana malsawmna thlen thintu leh mi nunna chhan tuma hmala thin pawl ropui tak a ni a ti a. Sual vanga thi mek mihringte hi Pathian fapa Isua Krista thisena avanga damna chang kan nih avangin thisen mamawha natna khuma mu mekte hian kan thisen avangin nunna an nei thei tih kan hriat reng a ngaih thusawiin mihausate te chuan an sum hmangin miretheite tanpuiin ei tur nei lo te eitur an pe thei a, chenna in nei lo te in ropui tak pe thei mahse nunna erawh sum hmanga lei theih a ni lo va, chu nunna hlu tak chu kan thisen hmang hian kan pe thei a ni a ti a, thisen pe tura zirlai kalkhawmte chu a hero an nih thu sawiin midangte nunna chhan tura pen chhuak ngam an nih avangin chawimawina nopui a hlan thu a sawi bawk.

 

Champhai District chhunga thisen pe hnem ber ni mek leh Asst Secretary AVBD Champhai ni bawk Pu Lalchhuangkima pawhin thusawiin Thisen kan pek hian a dawngtu aiin a petu kan lawm zawk a ni a ti a, vawikhat dam manah midangte nun chhanna atan thisen ka pe ve tur a ni tiin kan rilru kan siam thar a ngai a ni a ti bawk. Khawvel thiamna sang zelah taksa bung hrang dangte chu thlak theih niin damdawi tha tak tak siam ni tawh mahse Thisen erawh chu a aiawh damdawi a awm lo va, thisen mamawh chu thisen vek pek a ngaih avangin thisen mamawh avanga thi mekte hi kan thisen hmanga kan chhanchhuah an ngai a ni a ti bawk.

 

Dr RE Lalremruata chuan Champhai District Hospital Blood Bank in thla tin thisen Unit 120 vel a mamawh thusawiin  District Hospital Blood Bank in thisen a mamawhte hi Voluntary blood donation atang lo chuan hmuh daih ngaihna a awm loh avangin hemi lam kawngah hian thalaite kan thanharh a ngai a ni ti bawk. Thisen pe thei ni chu inchhuanna tham a tlin thu sawiin hrisel tha, taksa chak leh mi insum theite chauhin thisen an pek theih avangin an ngaihsan awm tak zet a ni a ti a, thisen pek a Kristiana a Mizo bawk a, Kristian leh Isua zuitute chuan midangte'n nun an lo neih theihna tur thisen pek ve hi kan tih tur a ni tiin Thisen mamawh avanga natna khuma mu mekte chhanchhuak thintute hi Doctor ni lovin an thisen petute hi an ni a ti bawk.

 

National Voluntary Blood Donation Day Programme hi Dr Zatluanga Champhai District Hospital Medical Superintendent, AVBD President chuan kaihhruaiin, Pu Zaihmingthanga Secy AVBD Champhai hnen atangin Report ngaihthlak a ni a. Pu RL Chhuanawma chuan lawmthusawiin he hun hi a khar a ni.

 

 Programme hman zawh hian Champhai District Hospital Blood Bank-a a mamawh apiangte hman turin thisen pek chhunzawm nghal a ni a,  Champhai District Hospital Blood Bank-a thawktu te'n Govt Champhai College-ah kalchilhin thisen hi pek a ni.

 

National Voluntary Blood Donation Day hi Kum 1975 October ni 1 atanga hman tan niin Mizoramah chuan 1999 atanga hman tan a ni.