Aizawl District Election Officer Dr. A. Muthamma, IAS hovin nimin khan Aizawl DC Conference hall ah Persons with Disabilities (Rualbanlo te) ten Mizoram Assembly inthlan neih huna vote thlak tura harsatna an tawh loh na tura hmalak dan tur hrang hrang hrang ngaihtuah ho a ni a, SSA, Social Welfare Department leh Gilead Special School aiawhte leh special teacher te an tel a ni.

Nimin thutkhawmna a ruahmanna an siam dan chuan Polling Party te training October ni 29 atanga neih turah hian sign language teacher ten bengngawng leh tawngtheilo te polling station an lo thlen huna lo chiauau dan tur “sign language” (zaizir) an zirtir vek dawn a, hetiang sign language expert te hi polling station zawng zawngah dah an ni ang a, anni bakah hian rualbanlo te lo buaipui turin Booth Level Volunteers te polling station zawng zawngah an duty ang.

Rualbanlo ten inthlanni a an hman turin polling station tinah wheelchair leh stretcher (mi zawnna) dah vek ani ang a, wheelchair nawrna tur bik kawng (ramp) siam vek ani bawk ang. Hei bakah hian rualbanlo te vote thlak tura an kalna tur, anmahni hruaia thlah leh turin motor ruahman ani bawk ang. Rualbanlote chhungkhat lainate bakah an thenawm khawvengte chu anmahni lo ngaihsak a electoral roll a la awmlo te pawh an luh ngei theih nan leh vote an thlak ngei ngei theih nan thahnemngaih pui turin ngen an ni a, Aizawl District chhung a rualbanloten inthlan leh a kaihhnawih chung change hriat duh leh zawh duh an neih te engtiklai pawh a man chawi lova an biak pawh theihna tur PWD helpline (toll free) 2313833 chu Aizawl District Election Office ah dah ani bawk.

Hei bakah hian Rualbanloten vote thlak an chanvo ani tih inzirtirna leh pholan nan “March with Pride” tih thupuia hmangin October ni 27, 2018 (Inrinni) chawhma dar 10:00 hian Vana Pa Hall atanga AR Ground thleng rualbanlote leh anmahni enkawltuten kawng an zawh dawn a, a tawiawm turin mi zawng zawng sawm an ni bawk. He programme ah hian chawhma dar 11:00 ah AR Ground ah inkhawmna neih a ni ang a, EVM leh VVPAT hman dan inzirtir anih bakah infiamna leh intihhlimna chi hrang hrang neih ani dawn a, kawngzawhna a tel te hnenah T-Shirt sem ani bawk ang. Aizawl District khua leh veng tina rualbanlo te he hunah hian tel tura sawm an ni a, he ruahmanna in a tum ber pakhat chu Rualbanlo (Persons with Disabilities) zawng zawngte Electoral Roll a luhtir a ni a, Electoral Roll a la tello te hria ka awm anih chuan an awmna veng BLO te hriattir a hma lak tur a ni ang.