October Ni 23 atanga 26, 2018 chhunga neih tur Mizoram Secondary School Games vawi 36-na chu vawiin chawhma dar 10 khan Chhangphut Field, Champhaiah hawn a ni. Hawnna hunah hian Champhai Bawrhsap Dr. Naveen Aggarwal, IAS chu khuallian a ni a, School Games hi Flag pawt pharhin a hawng a ni.

Khuallian Dr. Naveen  Aggarwal chuan Champhai District-in  Aizawl pawna School Games nghah anih vawi khatna  a thleng thei chu lawmawm a tih thu leh District tana ni chhinchhiah tlak tak a ni, a ti a. Zirlai naupang kalkhawmte chu damdawi hman sual leh ruihhlo dang leh a kaihhnawih laka inthiar fihlim hram hram turin a fuih a. Mizoramah a bik takin Champhai District chhungah damdawi hmansual a hluar thu leh a ngaihmawh thu a sawi a. Thalaite khawvel hrisel leh thianghlim tak siam tur  chuan infiamna huanga hmalak hi a pawimawh a ni tiin, infiamna chuan humsual dai tur lakah thalaite a chhanhim thei a ni, a ti bawk. 

Mizoramin  infiamna huangah  hma a sawn thu sawiin, tunhnai maia Youth Olympic Games, 2018 neih zawh takah  Mizo tlangval Jeremy Lalrinnunga’n rit chawisiakah Gold medal a la chu chhuanawm a tih thu leh Mizote India ram deng chhuaka tihmingthatu a ni chu fakawm a ti a. Zirlai naupangte chu thiam thil zir kawnga an harhvang laia Sap tawng nal taka thiam tum turin a fuih a, Sap tawng thiam chu zirna sang zawk zawm hunah a tangkaia, a la pui dawn che u a ni, a ti a. Infiammi Mizoram hmun hrang hrang atanga  lokalte chu  infiammi thinlung thianghlim tak neia inelna hmachhawn turin a chah a.  School Games hlawhtling leh felfai tak neih anih theihna tura duhsakna hlanin Mizoram Secondary School Games vawi 36-na chu a hawng a ni.

He hunah hian Pu Lalrambuatsaiha, Dy. Director, School Education & Vice Chairman, Organizing Committee pawhin  Aizawl pawna School Games nghah  ani  chu mellung pawimawh tak anih thu a sawi a. School Games chhunga programme neih dan turte tarlangin Zirlai infiammi  kalkhawmte chu chak zawk   leh chak lo zawk nih dante thiama rilru thianghlim tak pu chunga inelna hmachhawn turin a chah nghal a ni.

Pu C.Lalbiakzauva, District Education Officer, Champhai & Chairman, Food & Accomodation-in infiammi kalkhawmte chu thinlung taka an lo lawm thu leh Champhai District-in School Games a thlen theihna tura thathawhtu zawng zawngte chungah lawmthu a sawi a. Hmun dang atanga infiammi leh anmahni buaipuitu lokalte chu Champhai an cham chhungin harsatna leh mamawh an neihte hotute hnena thlen zel thin turin a chah a. Infiamna thianghlim tak hmachhawna Champhai leh a chheh  vel mawina leh nawmnate an cham chhung reilote chhunga chen theuh turin a sawm nghal bawk a ni.

Hawna hunah hian District hrang hrang aiawh infiammite chu mipui hmuh theih turin  Chhangphut Field-ah an intlar a. Lalramdinthari, Class-IX Govt. Bungzung High School kaihhruainain Flag bearer theuhten team tin aiawhin infiammite zawm tur thutiam an la a. Pu Lalrambuatsaiha, Dy. Director, School Education & Vice Chairman, Organizing Committee-in lawmthu sawiin hawnna hun a khar a ni.

Hawnna hunah hian Champhaia sawrkar department hotute, Assam Rifle hotu, Media, NGO, Ziralai naupang leh Zirtirtute an tel a ni.

Mizoram Secondary School Games, 2018 thleng tur hian Champhai leh Thenzawl-te chu thlan an ni a. A thawh khatna Hmeichhe Hockey leh Volleyball-te chu October Ni 9-11, 2018 chhung khan Thenzawlah khelh a ni a, Hockey-ah Serchhip an Champion a, Volleyball-ah Champhai an Champion ve thung a ni.

Champhai khawpuia thawh hnihna neih mekah hian Football, Judo, Boxing leh Athletics-te chu October Ni 23 atanga 26, 2018 chhunga neih tur a ni a. Football (Boys) hi Chhangphut Field-a khelh tur a ni a, Judo hi VANIS-ah niiin, Boxing (Boys) hi Tlangrawt Boxing Hall-ah khelh ani ang a, Athletics inelna chu Zotlang Sports Stadium-ah neih a ni ang.

Mizoram School Games, 2018 ah hian  Zirlai infiammi 363 an fuan khawma, Aizawl District atangin Zirlai infiammi 44, Siaha District 44, Kolasib District 51, Serchhip District 39, Mamit District 49, Lawngtlai District 36, Lunglei District 47 leh a thlengtu Champhai District atangin 53 tel tura beisei an ni a. Organizing Committee chuan Champhaiin a vawi khatna tur atana School Games a thleng chu Champhai mipuiten  ngaihhlut saka en thin turin a sawm a ni.