Vawiin chawhma khan North Eastern Institute of Ayurveda and Homoeopathy (NEIAH), Shillong leh Directorate of AYUSH, Government of Mizoram tangkawp buatsaih One Day Workshop on “AYURVEDA FOR PUBLIC HEALTH” chu Lal Thanhawla Auditorium, Aizawl ah hman a ni a, he hunah hian Mizoram Governor Shri Kumannam Rajasekharan chu Khuallian niin Pu Lalrinliana Fanai, Commissioner & Secretary chu Khual Zahawm a ni bawk.

Mizoram Governor Shri Kumannam Rajasekharan chuan “Mizoram chu ramngaw, thing leh thlai hrang hrang thahnem tak awmna hmun a nih avangin Ayurveda lama hmasawnna atan hmun pawimawh tak ala nih thuai ka beisei a ni” a ti a ,”Hetianga mipuite tan Ayurveda inhrilhriatna hun NEIAH leh Directorate of AYUSH, Government of Mizoram in an buatsaih hi a lawmawm hle a ni,” a ti bawk. Governor chuan Sawrkar laipuiin  Ayurveda hmasawnna tura hma lak a nih dan te tarlangin,” Kum Thum liam ta atang khan Dhanwantari Jayanti hi National Ayurveda Day ah alo puang tawh a, he hunah hian Ayurveda pawimawhna te zir thar ila kan nitin nuna kan hrisel zawk nan Ayurveda hi hman tangkai ve I tum ang u,” a ti bawk. Governor chuan AYUSH system hmang hian hriselna lama mithiam kan indaihlohna phuhruk kawngahte, damlo inenkawlna atan a tangkai  thlai (Medicinal Plants) chin intihhmuh  a loneitute tan a eizawnna tling a nih theih dan te leh Ayurveda Panchakarma Therapy hmanga zin mi (Tourist) tam tak hip a nih theih dan te a tarlang bawk.

He hunah hian Prof PK Goswami, Director, NEIAH, Pu Lalrinliana Fanai, Secretary, Dr OP Gupta, Former Dean, SSUHS, Assam ten thusawina hun an hmanga Dr S Mara Thansiami, Dy Director atangin Mizoram a Ayush dinhmun tlangpui ngaihthlak a ni a Dr Lalkhawngaihi, CEO Medicinal Plants Board in lawmthu sawiin hun tawp a hmang bawk. Chawhnuah hian Technical session hman chhunzawm niin Aizawl college hrang hrang zirlaite leh school naupangten an telpui a AYUSH lama mithiam tak tak ten zirtirna na pe a ni.

Mizoramah hian AYUSH hi Health & Family Welfare Department hnuaiah kum 2001 khan din a ni a,  Department of Ayurveda, Yoga and Naturopathy, Unani, Siddha and Homoeopathy (AYUSH) tih in kum 2003 khan thlak a ni. Tunah hian Directorate of Health Services, Health & Family Welfare Department kaihhruiana hnuaiah awmin National Ayush Mission leh State Medicinal Plants Board te kalpui a ni. Tunah hian State Government hnuaiah AYUSH Doctor 64 thawk mekin regular employee 10 leh contractual staff 54 an awm a, 58 te chu Homoeopathic discipline niin 6 te chu Ayurvedic discipline an ni. District hospital tin ah khum 10 awmna AYUSH ward siam niin AYUSH OPD hi Community Health Centre 9 leh Primary Health Centre 3 ah siam a ni bawk a ni. State Drug Testing Laboratory for Quality Control of ASU&H hi kum 2006 khan din niin Scientific Officer 4 te enkawlna hnuaiah hna thawh mek a ni bawk.