Vawiin khan Ministry of Health, Govt. Of India hnuaia Food Safety and Standards Authority of India (FSSAI) hmalakna in Ei leh in thianghlim mipuite zirtirna beihpui ‘Swasth Bharat Yatra’ (Eat right India) chu kolasib ah neih a ni.

He huna khuallian Kolasib Bawrhsap Dr.Arun. T, IAS chuan natna inkaichhawn theihloh (NCD) hun ah kan cheng mek a, heng natna inkaichhawn theihloh hrang hrang Bp Sang, Zunthlum, Cancer, Lung thalo leh a dangte hi kan vei na/tawrh na chhan za a sawmkua (90%) chu nunphung hrisel loh vang (unhealthy lifestyle), zuk leh hmuam, ei leh in uluk loh leh taksa sawi zawi uar loh vang te an ni a, heng natna te hi dam/reh hlei theilo, dam chhunga enkawl ngai an ni a, nunphung hrisel zawh a heng natna te laka lo inven chu thil finthlak leh intih hmuh chi ani a ti. NCD hi hringnun tawite ti hreawm tu leh ti rethei tu an ni a, mahni invawng uluk a, hlim taka nun kan hman theih nan insum theihna kan mamawh theuh a ni a ti bawk.

‘Swasth Bharat Yatra’ (Eat right India) campaign hi cycle rally nen India ram chhunga State tin tuamchhuak turin October ni 16, 2018 (world food day) ni atang khan India ram chu Track paruk a thenin bul tan a ni a, Track tina fehchhuakte hian an area theuh an tuam zawh hnu ah January ni 27, 2019 khian New Delhi ah intawk khawmin hmawr bawkna neih a ni ang. He Campaign ina a tum ber chu mitin tan ei leh in hrisel, ei leh in thianghlim leh chaw paihral mai mai loh chungchangte zirtir a ni a, Yatra team ah hian Volunteer cyclist, Ambulance, Eat right Mobile Unit leh Mobile Food testing Unit te tel vekin awareness a zau thei ang bera pek kualna a ni ber.

Mizoram hi Track paruk na ah awmin Volunteer Cyclist te hi 1^st Mizo Bn, NCC te an ni a, Cyclist 23 te hian Kolasib atanga Vairengte thleng Cycle Rally an nei dawn a ni.

He hunah hian Volunteer Cyclist te bakah Yatra team , Kolasib CMO Dr. Vanlalhlimpuia leh Medical Staff hrang hrangte an tel a ni.