Vawiin chawhma dar 10 khan PHE Department leh Health &Family Welfare Department buatsaihin Govt. Primary School-II, Vengthlang, Champhai tual zawlah ‘Kut silfai pawimawhzia inzirtirna ni’ (Global Handwashing Day, 2017) hman a ni. He hunah hian zirlai kalkhawmte hnenah Kut silfai dan zirtir a ni.

He hun hi Er. J.Kapkima, Executive Engineer, PHED, Champhai Watson Division leh Member Secretary Swacch Bharat Mission (Gramin) nibawk chuan a kaihruai a. Pi Lalrammawii, Health Worker, Champhai Sub-Centre-in  Kut silfai dan dik inzirtirna demonstration a nei a. Dr Benjamin Lalruatdika, District Reproductive and Child Health Officer (DRCHO) in kut silfai pawimawhna leh tangkainate a tarlang a.  Global Hand Washing Day tum ber chu kut silfai hi taksa hriselna a nih thu leh midangte hnena zirtirna pek hi a tum ber a ni, a ti a. Mizote chu kuta thil ei mai thin kan nih avangin thil kan ei dawn reng rengin fai takin sahbawn hmanga kut silfai ziah thin tur a ni tiin hei hian kawthalo, khawsikpui leh Pneumonia lakah min veng thei a ni, a ti bawk. Zirlai naupangte chu thil ei dawn leh ei zawhah te, inthiar zawhahte kut fai taka sila mite zirtirtu ni thei turin a chah nghal bawk a ni.

Global Hand Washing Day hi  khawvel pumah  October ni 15, 2008   atang khan ram 70 velah Public Private Partnership for handwashing (PPPHW) hmanga kalpui tan a ni a. Hemi kum(2008) hi International Year of Sanitation’ ah  puan a ni a. Kumin bik atana thupui thlan chu ‘Our hands, Our future’ tih a ni. Global Handwashing pual hian zirlai naupangte chuan a huhovin sahbawn hmanga kut silfaina an nei a. Swacch Bharat Mission (Gramin) bultumin zirlai naupangte hman turin School thuneitute hnenah  Sahbawn leh towel engemaw zat hlan a ni bawk. October Ni 15 kha Pathianni anih avangin he hun hi vawiin lama hman a ni.