Vawiin khan ramchhung hmundangte rualin Green Mizoram Day 2016 chu Champhaiah hman a ni a. Tukin zing dar 10 khan a hawnna inkhawm tawi CHANEM Complex, Champhaiah, neih niin Sawrkar department hrang hrang bakah tlawmngaipawl  leh mimal engemawzatin thing an phun a. Champhai District chhunga kangmei ven kawnga thawk tha khaw pathum- Aiduzawl, Telkhang leh Kelkang khuate chawimawina hlan a ni bawk.

Green Mizoram Day 2016 hawnna inkhawmah hian District Bawrhsap, Champhai District Green Mizoram Committee Chairman ni bawk, Pu Vanlalngaihsaka, IAS chuan thing phun pawimawhna hrang hrang sawiin mipuite chu ‘thing phun leh a enkawl I uar deuh deuh ang u’ tiin a sawm a. Bawrhsap chuan NLUP chu mipuite chawikan nan mai a ni lova, ramngaw leh tuihna humhalh kawnga hmasawnna tura duan a ni, tih sawiin Sawrkarin lo hal hun a ruat a hallo leh ram tikang khuate chu dan anga hrem an nih tur thu a sawi bawk.

Champhai District SP Pu R.P. Meena, IPS pawhin ramngaw chereu zel avanga sik leh sa mumal lovin ramchhung hmun hrang hranga tuilian leh khawkhengin harsat a thlente sawiin chumi laka in venna awm chhun chu Green Mizoram Day 2016 thupui, ‘Thing phun la, boruak thianghlim siam rawh’ tih vawn reng a ni, a ti bawk.

Green Mizoram Day 2016 hawnna inkhawm hi Champhai DFO leh Champhai District Green Mizoram Committee Member Secretary, Pu Vanlalchuailova’n a kaihruai a. Pu Chuailova chuan nung ngei tur leh thang thei ngei tura thing phunte enkawl turin kalkhawmte a chah a, ramngaw humhalh chu India danpuiin mawhphurhna min pek a ni a ti bawk.

Champhai District chhunga kangmei ven kawnga ti tha khaw pathum – Aiduzawl, Teikhang leh Kelkang te chu lawmpuina hlan a ni a. Sawrkar Department, pawl leh mimal thing phun duhte tan thing tiak sem nghal a ni bawk. Green Mizoram Day 2016 puala thing phun tura thlan bik Govt. G.M. Higher Secondary School NSS Unit-te leh Department hrang hrang leh tlawmngaipawlte an vailiam hnuah Champhai DC leh SP hian CHANEM Complex-ah thing tiak an phun nghal bawk.

Vawiin vek hian District Park Committee huaihawtin Committee member a duh apiangte leh Mualkawi Branch YMA member-ten Hringlang Tlangah thing phun hnatlang an nei bawk.