Aizawl District-in a vawikhatna atan District Level-a Green Mizoram Day a hman chu vawiin khan Hlimen Zophei-ah Khuallian Parliamentary Secretary Pu KS Thanga hovin inkhawmna tawi leh thing phunna hun neih niin, District chhunga ram kang venna kawnga titha thlanchhuahte hnenah lawmpuina sem a ni bawk. Kum dangah chuan State Level Green Mizoram Day hi Aizawl District-ah hman thin a ni a, kumin hian Thenzawlah hman a ni thung a ni.
Vawiin Aizawl District Level Green Mizoram Day puala hun hmanah hian Khuallian chuan India ramah chuan Mizoram hi thingphun leh ramngaw tha zawk siam tura hma la hmasa ber zing ami anih thu sawiin, kum 18 chhunga Green Mizoram Day hman anih chhung hian thingtiak tam tak phun a ni tawh a, tunah chuan a enkawl zuina lamah hian tan lak a ngai hle a ni, a ti a. Green Mizoram Day programme hlawhtlinna hi kangmei chhuak leh chhuak lovah a innghat thui hle ani tiin, Pu KS Thanga chuan hemi kawnga District Level Committee-te hmalakna chu fakawm a tih thu leh, NGO, Sorkar Institution leh mimal thahnemngai thenkhatte hmalakna chu chawimawitlak a tih thu a sawi a. Green Mizoram plantation enkawl zuina hi kan zavaia mawhphurhna anih thu leh, ramngaw leh ramsa humhalh hi EF&CC Department hmalakna maiah mipuiten ngai lovin Mizo zawng zawng, abikin Kohhran leh NGO, VC, LC leh Sorkar hnathawkte mawhphruhnaah a innghat thui hle tih kan hriat nawn a pawimawh a ni, Khuallian chuan a ti.
Vawiin hun hi District Level Committee on Green Mizoram Day Chairman, Aizawl DC Pu Kannan Gopinathan, IAS chuan kaihruaiin, Aizawl-in a District Level anga he hun a hman vawikhatna anih angina bultan that pawimawh a tih thu a sawi a. Mizoram chu hmundang nena inkhaikhin chuan ramngaw nei tha mah ila hmasawnna in a nawr vangin ram danga an tih angin kan hmun hring tha neihte hi humhalh nachang kan hriatloh chuan a tawpa tuar tur chu a chhunga cheng mipuite bawk kan ni tih hriaiin, thingphun uar bakah uluk takin enkawl zui theuh I tum ang u, a ti a ni.
Aizawl DFO Pu Saurabh Sharma, IFS, District Level Committee Member Secretary ni bawk chuan Green Mizoram Day report pe in, kum 1999-a State Level Committee on Green Mizoram din a nih atanga nikum 2015 thleng khan hemi ni puala thing tiak phun tawh zat chu 44,05,020 chuang a nih tawh thu leh, June ni 15-a YMA Day hman turah pawh phun belh tur Forest Department chuan thing tiak a buatsaih thu a sawi a. Mizoram pum 91.5% chu forest cover a la nih avangin thil lawmawm tak anih rualin, true forest kan tih, ramngaw dur tha tak tak chu 28.5% chauh ani thung a. Hei hi India ram pum 1% pawh ani pha lo a. Mizorama nungcha awmte an rem mai lohnan hmalakna tur erawh a la tam hle a hriat thu a sawi a ni.
Vawiin hunah hian kumin 2016 thal chhunga kangmei laka venhimna thawktha khua thlanchhuah te hnenah Khuallian hian lawmpuina a sem a. Pakhatna Seling VC chuan Rs. 50,000 dawngin, pahnihna Hualngo Hmun chuan Rs 30,000 an dawng a, pathumna Saitual Joint VC chu Rs. 20,000 pek an ni. Khuallian bakah hian DC, DFO leh Aizawl SP Lalhuliana Fanai, MPS ten thing an phun hnu in he hun atan lo thawkchhuak khawtlang hruaitute leh Hlimen MHIP, MUP bakah Environmental NGO hrang hrang ten a huhova thingphunna an nei bawk. Green Mizoram Day hi 1999 atang khan Aizawl leh a chhehvel hmun hrang hrang 13 ah kumtin phun a lo ni tawh thin a. Hemi hun chhung hian Sponsor Tree Planting programme hnuaiah thingtiak 172 phun ani tawh bawk a ni.
