1028/2025-2026

Champhai, dated 2nd July 2025: Vawiin khan DC Auditorium-ah District Agricultural Marketing Committee (DAMC) chuan Handholding Scheme hnuaia 2024-25 chhunga sawhthing lei runpui chu khar a ni a, Champhai Bawrhsap leh DAMC Chairman ni bawk Pu Mohammad Aaquib chuan hun a kaihruai.

Chairman Pu Mohammad Aaquib chuan sawhthing lei runpuiah hian DAMC member te taima takin an thawk a, department hrang hrang te inlungrual takin an thawk ho thei a, mahni chanvo leh tih tur an hre thain an hlen chhuak tha hle tih sawiin thinlung takin lawmthu a hrilh a. Co-opted member te leh kuthnathawk te pawh an tihtur an hre chiang em em a, tul ang zelin hmun hrang hrangah kalin hna tul an thawk tha em em a, lawmthu a hrilh bawk. Champhai district chu district zinga titha ber pawl an nih chu lawmawm a tih thu sawiin nakin zela thawhhona tha tak siamtu a nih ngei a beisei thu a sawi bawk a ni.

He hunah hian District Agriculture Officer leh DAMC Secretary ni bawk Pu F. Lalmalsawma chuan report pein sawhthing chungchanga DAMC hmalakna hrang hrang te, hralh zat te leh hnathawh hrang hrang kal dan te a sawi lang a, DAMC member leh sawm bik te'n mahni ngaihdan hrang hrang an sawi bawk. District Horticulture Officer Pi Lalrinchhani chuan DAMC member te chungah lawmthu sawiin hun a khar a ni.

He hunah hian DAMC member te leh tlawmngai pawl hrang hrang an tel a ni.

Champhai District-a sawhthing lei runpui hi phase hniha then a ni a, phase I-ah hian ₹6,64,34,318 man lei niin phase II-ah hian ₹69,86,267 man lei a ni.