Vawiin khan Champhai DC Conference Hall, Keifangtlangah Independence Day 2019, August ni 15-a Champhai hmuna lawmna hun hman dan tur ngaihtuahtu Independence Day Celebration Committee chu an Chairman District Bawrhsap Dr. Naveen Aggarwal hovin an thukhawm.

Meeting chuan India ramin zalenna a neih ni August Ni 15 chu ni bik pawimawh tak ani tiin,  Zing Dar 6 ah Sawrkar Pisa leh Zirna In-ah te hnam puanzar pawhpharhin, Zing dar 10 atangin Chhangphut Field-ah ropui taka lawmna neih nise a ti a. Kumin Independence Day lawmnaah hian Parade Contingents leh SSA Pipe Band-te tel thei turin meeting chuan a beisei a. Parade tur inzirlawk chu August ni 7 atanga tana final rehearsal August ni 13 a neih nise, chanvo nei zawng zawngte pawhin hun a tam tawh loh avangin inpuahchahna kalpui vat nise tih a ni a. Sawrkar department hrang hrangte hna chanpualte siamfel nghal niin, Independence Day ropui taka lawm a nih theih nan mahni chanvo theuh hneh taka hlen turin meeting chuan mawhphurhna latu zawng zawngte  a ngen a. He hunah hian Department hrang hrangte thawhlawm pek tur zat bithliah niin, Celebration Committee chuan phal taka tawiawm theuh turin a ngen a. Kumin Independence Day puala infiamna  neih tur senso chu sum tlingkhawm leh hman dan tur a zira bithliah mai nise a ti bawk.

Kumin Champhai hmuna Independence Day lawmna hun hi Mizoram sawrkara Minister of State Pu TJ Lalnuntluanga, Forest, Transport leh Law & Judicial, Parliamentary Affairs changtu Minister chuan khuallian niin a hmanpui dawn a. Thukhawm chuan Independence Day chu India ram ni pawimawh ber pakhat anih avangin sawrkar hnathawk, Zirlai leh khawtlang mipuite chu he hun hi ngaipawimawha kal vek turin a sawm a ni.