Mizo to bul chhuina “Symposium on Chhinlung” chu vawiin khan Mizo Academy of Letters leh INTACH (Mizoram Chapter) buatsaihin MBSE Conference Hall, Aizawlah neih a ni a. Art and Culture Minister Pu R.Lalzirliana chu khuallian a ni.

Pu R.Lalzirliana chuan hnam ropui tak tak, hlawhtlinna leh hmasawnna kawnga sulsutu leh kan ngaihsan em em te ropuina innghahna chu an History leh culture nghet tak hi a ni, a ti a. An culture-in nghet taka a phuar khawm avangin hnamah an chiang a, an rinna thleng pawha vawngin hei hian an nihna a tinghet a, hnam anga inpumkhatna a siam sak a ni, a ti. Art and Culture Minister chuan thu leh hla hmanga kan hnam tobul leh  history inhlan chhawng hnam kan nih avang leh ziaka vawn that kan neih ve loh avangin Mizo te lo chhuah dan tak hi hriat chian a harsa a, ngaihdan leh rin dan inang lo tak tak a piang chhuak a ni, a ti a. Kan tu leh faten chiang taka Mizo kan nihna, kan identity an hriatfiah theihna turin kan hnam tobul chhuina kawngah vawiin a mi thiam rualte hi an pawimawh hle a ni tiin Pu R.Lalzirliana chuan MAL leh INTACH ten symposium buatsaih nachang an hria chu a fak a. Zofate inlungrualna leh inpumkhatnaa kan chian hi a pawimawh ber a ni, a ti bawk.
 
MAL President Prof.Laltluangliana Khiangte chuan programme hi kaihruaiin Rev.L.Rema leh Dr.Remsangpuia te paper buatsaih an zirho a. INTACH (Mizoram Chapter) Convener Pu P.Rohmingthanga, Co-Convener Pu C.Chawngkunga, Pu B.Lalthangliana, Dr Lalnunthangi leh Pu Lalzuia Colney ten thu an sawi a ni.

Symposium-ah hian MAL leh INTACH aiawhte bakah Mizo mi thiam, thlahtu bul chhuina lama tui mi, thuziak lamah pawh sulhnu engngemawzat hnutchhiah tawhte an kalkhawm a. Mizo thawnthu leh tawngkaa thu inhlanchhawn atanga Mizo lo chhuahna nia ngaih Chhinlung chungchang zirhoin Chhinlung hi a awm tak tak em tih te, engnge a nih chiah leh khawi hmuna awm nge tihte chhui zauvin sawihona hun an hmang a. Mizo historian hmasa K.Zawla te, Pastor Vanchhunga te, Zatluanga leh a dangte kut chhuak te pawh sawi lan a ni a. Tawng lama thiamna bik nei linguist-te, history lama tui mite leh China ram thlenga Mizo to bul chhuia lo vak chhuak tawh te he hunah hian an tel a ni.