1505/2023-2024

Champhai the 15th August, 2023: Vawiin hi India ram zalenna Independence Day champha vawi 76-na a ni a; Champhai District-ah ropui taka lawm niin a lawmna pui ber Chhangphut Field-ah Minister Pu TJ Lalnuntluanga hovin chawhma dar 10 ah urhsun taka hun hman a ni. Khuallian hi Health & Family Welfare Board Vice Chairman Dr. ZR Thiamsanga, MLA in a tawiawm a ni.

Khuallian chuan Hnam Puanzar pawtparhin, Parade Contingent 30-te Hnam Puanzar chibai bukna a chhang let a; Independence Day thuchah a sawi hnuah Parade intihsiakna a ti thate leh Independence Day puala Sports Association-te intihsiakna hrang hranga ti thate hnenah lawmman a hlan a ni.

Pu TJ Lalnuntluanga chuan Independence Day chu kan ram mipuite tana zalenna leh beiseina chhinchhiahna kengtu kan Hnam Puanzar chibai kan bukna ni lawmawm tak a ni tiin zalenna sual tute, martarte leh hruaitu hmasa mi ropui te zahna chibai a buk a. Zalenna hnuaiah India ram chu khawvel puma mipui rorelna, Democracy ram lian ber leh ropui berte zing ami leh khawvel economy lian berte zinga mi a lo ni ta hial bawk a ni, a ti.

“Independence Day ni lawmawm tak kan hman mek lai hian kan beisei loh takin kan thenawm, Manipur State-a kan unau, (Zohnahthlak) te harsatna tawh mek avangin Zohnahthlak mipuite rilru khingbai takin kan awm a. Hei hian tlang hrang hranga cheng, Zohnahthlakte min barakhaih a, Sorkar, Kohhran leh tlawmngai Pawl hrang hrangte pawhin kan unau, harsatna tawkte tan theihtawp kan chhuah a, kan tangrual hle a. Sorkar pawhin heng kan unau, Manipur-a harsatna tuar mekte tan hian theihtawp a chhuah zel dawn a ni,” a ti.

A thusawinaah Champhai District chhunga sawrkar hmalakna tlangpui a tarlang a ni.

SEDP kaltlangin kuthnathawktute leh thalai eizawng turte khaichhuahna turin Sawrkarin hma lain chhungkaw tam tak puih tawh an ni a, puih leh zel na tur pawh buaipui mek zel a ni tiin, SEDP hnuaiah hian Food and Fruit Processing Plant te, Cold Storage changtlung zawk te dah tum a ni, a ti.

Tlangsam rama Animal Rescue Center (Mini Zoo) dinna tura proposal thehluh, cheng nuai 1092.824 chu Central-in a pawmpui tawh a, hna bul tan thuai tum a ni bawk. Seling leh Champhai inkar kawng Double Lane siam hna thawh mek a ni a. April, 2023 khan Champhai District Hospital-a Trauma Building, ICU, Dialyses, SNCU, RT-PCR, PICU, Bungzung PHC leh Farkawn PHC te hawn a ni a. Nursing School pawh tun atanga hun rei lote ah function hman tum a ni. Critical Care Block chu cheng Vaibelchhe 20 hmanga sak tan mek a ni.

Champhai Zone chuan kum September, 2022 – July, 2023 chhung khan Taxation Department kaltlangin Mizoram Sawrkar sum bawma chhun luh tur chhiah cheng 9,24,81,580 an khawn tling tawh a ni. Kum 2022-2023 chhung khan NDPS Act ’85 leh MLTP Act 2019 dan hnuaiah thubuai 236 ziak lutin, thubuai a inhnamhnawih mi 203 an man bawk a ni. District Child Protection Unit hnuaiah Child Helpline Unit din niin, Staff 10 lak thar an ni bawk a ni.

NEC atangin Passion Fruit Processing Machine bunna tur sum hmuh a nih bakah Aieng herna khawl pawh bun tura hma lak mek a ni. Land Revenue & Settlement hnuaiah Kum 2022-23 chhung khan chhiah chi hrang hrang (Tax & Non-Tax) Rs. 1,50,89,400/- hmu tawh in, LSC 493 pek chhuah tawh a ni a. Hmun lo ram chungchangah case 45 chinfel sak an ni bawk a ni.

Champhai District in power supply hnianghnar zawk kan neih theihnan Champhai District Power Supply pek chhuahna Keifangtlang 132 KV sub-station a 12.5 MVA Power Transformer chu khawp kham loh avangin Power Transformer dang 12.5 MVA bun belh a ni.

National Livestock Mission (NLM) hnuaiah ranvulh tanpuina mi 165 hnenah pek a ni a. Chhungkaw 2277 hnenah ranvulh tanpuina SEDP hnuai atanga pek an ni bawk. Mizoram Sorkar Flagship Programme, SEDP hnuaiah Kum 2022-23 chhung hian Sangha Dil tanpuina mi 280 hnenah Rs. 50,000 /- theuh pek a ni.

Commerce & Industries kaltlangin SEDP 1st Phase hnuaiah chhungkaw 730 tan First and Second instalment cheng 3,65,00,000 /- pek chhuah tawh a ni a. Ramri sumdawnna mumal zawka kalpui a nih theihnan Land Custom Station pawh Rs. 1500 lakhs chuang senga chei thar mek a ni.

RUSA 2.0 sum, cheng nuai 100 hmanga Govt. Champhai College-a Commerce Building sak chu H&TE Minister zahawm tak, Dr. R. Lalthangliana chuan Ni 27.4.2023 khan a hawng. Jal Jeevan Mission hnuaiah khaw 13 tan Functional Household Tap Connection (FHTC) thawh zawh tawh a ni.

Tourism Department chuan Swadesh Darshan 2.0 Scheme hnuaiah Tlangsam ah Cultural & Heritage Tourism Village siam tumin hma a la mek a. Champhai Destination hnuaiah cultural tourism tih hmasawnna tur atan hian Ministry of Tourism atangin Rs.8000 lakh chuang hmuh beisei a ni.

Vawiin Independence Day parade-a contingent 30 zingah hian Armed Contingent pakhat, Unarmed Contingent pakua, School Contingent sawmhnih te an tel a, Sub Inspector Joseph Vanlalauva chu Parade Commander niin ASI C.Hmingthantluanga chu 2nd Parade Commander a ni.

Vawiin Independence Day 2023 Parade result chu hetiang hi a ni:

UNARMED CONTINGENT

1st NCC Government Champhai College Senior Wing
2nd NCC Govt GM High School Boys Contingent
3rd Girl Guide Govt Vengthlang Middle School

SCHOOL CONTINGENT

1st BC Lalthlamuana English Academy Girls Contingent
2nd Bethel Mission School Girls Contingent
3rd Govt GM High School Boys Contingent

Kumin Independence Day pual hian Volleyball, Badminton leh Football ah te intihsiakna buatsaih a ni a. Heng intihsiakna a ti thate hnenah khuallian chuan lawmpuina a hlan bawk a. Independence Day 2023 puala Football tournament final hi chawhnu dar 2 atngin Chhangphut Field ah neih a ni.

Independence Day lawmna ah hian District Bawrhsap Pu James Lalrinchhana, SP Pu Lalrinpuia Varte, Sawrkar hnathawk, sawm bik hrang hrang bakah, Zirlai leh khawtlang mipuite an tel thain an hlut hle a. Independence day lawmna hun Chhangphut Field-a neih zawh hnu hian Independence Day Chief Guest hovin official leh mi sawm bikte tan DC Bungalow Jericho Garden, Keifangtlangah ‘VIP’s At Home’ function neih a ni.