1504/2023-2024

Independence Day vawi 77-na chu GSA Play Ground, Mamit-ah lawm niin, Sports & Youth, ICT leh Tourism Minister Pu Robert Romawia Royte chu khuallian a ni a. Hnam puanzar pawt pharhin Parade Contingent-te chibai a chhang let a ni.

Minister Pu Robert Romawia Royte hi Er. H.Lalzirliana, MLA leh Bamboo Development Vice Chairman Pu K.Pachhunga ten an tawiawm a ni.

Khuallian chuan Independence Day pual thuchah sawiin vawiin a Independence Day vawi 77-na lawm tura lokalte leh Mamit District mipui zawng zawngte chibai a buk a. Mipuite duhthusam leh beisei anga mitin intluktlanna, zalenna, inunauna leh inpumkhatna ram ni tura India ramin zalenna a neih theihna tura ram hruaitu hmasate kha hrerengin zahna chibai buk turin mipuite a sawm a. He hun pawimawh takah hian Mamit District chhunga sawrkarin hmasawnna tura a hnathawh leh a hmathlir tlangpuite a tarlang a. Khuallian Pu Robert Romawia Royte chuan Mamit chu India rama District 112 zinga Aspirational District Programme (ADP) a nih angin, hmasawnna hna hi kawng lian tak tak panga (5) – Health & Nutrition, Education, Agriculture & Water Resources, Basic Infrastructure leh Financial Inclusion & Skill Development hnuaiah te kalpui a ni a ti a ti a. Hemi Programme hnuaiah hian Mamit District chu a titha pawl niin a hnuaia lawmman te hi kum kalta leh kal mekah te dawn a ni tih a sawi:

1) 8th Rank in Delta Ranking (Overall performance)
2) 4th Rank in Health & Nutrition Sector
3) 8th Rank in Education Sector
4) 6th Rank in Basic infrastructure Sector (May, 2022)
5) 3rd Rank in Basic infrastructure Sector (August, 2022)

ADP Project a hmalakna te a that avang hian NITI Aayog chuan cheng vaibelchhe 16 (16 crore) rawn pe in, a chunga tarlan hmasawnna hna hrang hrang atan te hian a concerned department-ah semchhuah a nih thu a sawi bawk a ni.

Khuallian Pu Robert Romawia Royte chuan Vawiin Independence Day lawmna-ah hian Contingent 15 an awm a, Armed Contingent Pakhat 4th IR Battalion Luangpawl; Unarmed Contingent 20th NCC Mamit College leh School Contingent 13 te an ni. Contingent Commander hi Inspector Pu Vanlalvena 4th IR Battalion a ni a, second commander hi Inspector Laltleipuia a ni.

School Contigent Lawmman la te:-

1. Presbyterian English School, Girls' Contingent
2. Govt. Higher Secondary Girls' Contingent
3. JNV Girls' Contingent

Khuallian hian Nasha Mukt Bharat Abhiyan (Drug Free India Campaign) chu Mamit District tan a hawng nghal a. Independence Day Lawmna hman a nih zawh hian Buannel Home, District Jail leh Joshua's Children Home te khuallian hian a tlawh nghal a ni.

Khuallian thusawi kimchang INDEPENDENCE DAY VAWI 77 NA LAWMNAA KHUALLIAN SPORT MINISTER PU ROBERT ROMAWIA ROYTE THUSAWI.pdf