1503/2023-2024

2023 Thlazing ni 15: India ramin zalenna a hmuh champha phak vawi 76-na chu ram chhung hmun dang rualin vawiin khan Lawngtlaiah pawh urhsun takin lawm a ni a. A lawmna pui ber Central YLA Playground-a buatsaihah Mizoram Legislative Assembly Deputy Speaker Pu H. Biakzaua chu Khuallian a ni.

Sawrkar Laipui ruahmannaa August ni 13 aṭanga ni 15 chhunga in tina Ram Puanzar zar tur tih a nih angin Lawngtlai District chhunga sawrkar pisa, hmun pawimawh dang leh mimal in tinah India Ram Puanzar zar a ni a. Independence Day ni bikah hian zing dar 8:30-ah CYLA Playground-ah Khuallianin Ram Puanzar pawt pharhin, Ram Puanzar chibai buktu parade contingent 28 te chibai buk a chhang let nghal bawk.

Khuallian Pu H. Biakzaua chuan mipui pung khawmte chu zalenna chibai bukin, India ram zalenna atana beitu hnam pasalṭhate hre renga zahna chibai buk thar a, an thisen leh thlantui hmanga an valh sa India ram ropui nan leh hmasawn zel nan theih tawp chhuah turin a sawm a. District hmasawnna atana sawrkar, tlawmngai pawl, kohhran leh mipui ṭan rualna chuan rah ṭha a chhuah tih sawiin, Myanmar, Bangladesh leh Manipur aṭanga an sahimna zawnga lo tlan lutte chhawmdawl leh enkawl zui kawnga Lawngtlai District mipuite chet dan chu inunauna leh inpumkhatna vawng nung zeltu a ni ang tia fakin, an hna thawh ṭha chu chhunzawm zel turin a ngen a. Tun hnaia ruah sur nasa avanga Lawngtlai District chhunga tuilian leh leimin avanga tuarte a tuarpui thu a sawi bawk.

Khuallian chuan Lawngtlai District chhunga hmasawnna hna thawh langsar ber pakhat, India leh Myanmar insumdawn tawnna tur, Kaladan Multi Modal Transit Transport Project (KMMTTP) kawngpui sial hna thawh meka Lawngtlai aṭanga Myanmar ramri bul Zochachhuah thlenga 2-lane highway km 90 vela thui sial hna chu June 2023 khan physical work 100% thawh zawh a nih thu leh lei (bridge) dawh tur pariat pawh dawh zawh fel a nih thu a tar lang a. Sawrkar Flagship Programme, Socio-Economic Development Policy (SEDP) hnuaiah pilot project leh family oriented aṭangin Lawngtlai District-ah chhungkaw 4,600 chuang hnenah bul ṭanna tur sum pek a nih tawh thu leh chhungkaw 4,309 hnenah September 2023 ral hmain pek leh tura ruahman mek a nih thu a sawi a. Ṭhalaite'n infiamna lama hma an sawn zelna turin Sports & Youth Services Department aṭangin Lawngtlai Vengpuiah ₹ nuai 1,000 chuang man astro turf football ground leh Chawngteah ₹ nuai 532 man astro turf football ground siam hna thawh zawh leh hawn a nih tawh thu te, Mampuiah District Sports Complex ₹ nuai 5,000 chuang man leh Lawngtlai College Vengah Residential Sports School ₹ nuai 3,400 chuang man sak mek a nih thu te a sawi bawk.

Khuallian chuan Lawngtlai District-ah District Administration leh District Council-te’n thawh hona ṭha tak an neih thu sawiin, LADC hnuaia department hrang hrangte'n kut hna thawktute leh thingtlang mi retheite ṭanpuina leh hmasawnna ruhrel siam kawnga an hma lakna hrang hrang a tar lang a. District mipuite hriselna atana Health & Family Welfare Department hma lakna fakin, Mizoram Health System Strengthening Project hnuaia pilot district a nih anga Lawngtlai District-a hma lak chhoh mek a nih thu a tar lang a. Health worker training-na, ANM School-in Mizoram Nursing Council exam-a result ṭha tak an nei ṭhin leh MNC exam hnuhnung bera Mizoram topper nei a, top 10-a mi pali lai an vawrh chhuak thei chu chhuanawm a tih thu a sawi.

Khuallian chuan District ralmuan nana thawktu District Police-te hma lakna fakin, foot & mobile patrolling an kalpui ṭhat avanga kum thum kal ta nen khaikhina dan bawhchhiatna a tla hniam ta hle chu lawmawm a tih thu a sawi a. School Education Department hnuaia Samagra Shiksha, Lawngtlai District kal tlanga free uniform, free textbook leh mid-day meal scheme kalpui zel a nih thu tar langin, Govt Rawlbuk Middle School chu high school-ah leh Govt Bungtlang 'S' High School chu higher secondary school (arts stream)-ah te hlan kai a nih thu te, District chhung hmun hrang hranga school building thar, teachers quarters thar, hostel leh administrative building thar sak leh building awm sa chei ṭhat hna thawh a nih thu te a tar lang bawk.

Khuallian chuan MGNREGA hnuaiah Lawngtlai District-ah job card 37,094 a awm mek thu leh kum 2023-2024 sawrkar kum kal mekah ni 25 inhlawhna siam a nih tawh thu a sawi a. MGNREGA bakah, PMKSY 2.0, PMAY-G, MzSRLM leh BADP kal tlang te’n District chhung kut hna thawktute leh thingtlang mite chawi kan nan sawrkarin hma a lak reng thu a sawi.

Khuallian chuan line department hrang hrang kal tlanga SEDP hnuaia hma lakna kalpui mek bakah, Commerce & Industries; Agriculture; Fisheries; Horticulture; Animal Husbandry & Veterinary; Public Health Engineering; Power & Electricity; Public Works; Economics & Statistics; Transport; Women & Child Development; Food, Civil Supplies & Consumer Affairs; Treasury leh Information & Public Relations department hnuaia Lawngtlai District chhunga hmasawnna hna thawh leh hma lakna hrang hrangte a tar lang bawk.

Khuallianin thu a sawi zawh hian ceremonial parade lawmman sem nghal a ni a. Unarmed contingent pasarih (7) awm zingah Don Bosco School NCC chu pakhatna niin, pahnihna Don Bosco School Scouts & Guides leh pathumna Ngurnunsangi English School Guides te an ni a. School contingent sawmhnih (20) awm zingah Govt Lairam High School Lawngtlai chu pakhatna niin, pahnihna Jehovah Jireh Higher Secondary School (Girls) leh pathumna Govt Region High School (Girls) te an ni a. Armed contingent awm chhun 3rd Battalion IR armed contingent te chu special participation prize leh parade contingent dang 21 chu participation prize hlan ni bawkin, parade commander SI Lalawmpuia (3rd Bn IR) leh khuang vawtute leh judge-te pawh lawmman siamsak an ni bawk.

Ceremonial parade lawmman bakah hian Independence Day 2023 pual hian a hnuaia mi ang hian chawimawina leh lawmman hrang hrang sem a ni bawk a, Khuallian Pu H. Biakzaua chuan a dawngtute kutah a hlan hlawm a ni.

1. Azadi Ka Amrit Mahotsav (AKAM) hnuaia Meri Maati Mera Desh campaign kal meka sipai leh police an duty laia ram tana nun hlante chawimawina, Veeron Ka Vandan-ah:
1) C/26 C. Lalthantluanga, 2nd Battalion MAP (Haryana-a Election duty-a a kal laia ram tana nun hlantu)
2) Havildar J. Lalrohlua, 2nd Battalion MAP (Buarchep, Vairengtea a duty laia ram tana nun hlantu)

2. Zirlai ti ṭha chawimawina:

1) Hmingthanzami,
D/o T. Zakunga,
Lawngtlai College Veng
HSSLC 2023 Science 4th Position
2) H. Vanlalrini,
D/o H. Lalnghakzuala,
Lawngtlai Council Veng
HSSLC Commerce 6th Position
3) Ruthi C. Lalengzuali,
D/o C. Vanlianhmunga,
Lawngtlai Council Veng
HSSLC Arts 7th Position
4) Lalṭhasangi,
D/o Lalrochunga,
Bualpui NG,
Mizoram Nursing Council (ANM) Examination 2022 Topper

3. Independence Day 2023 Badminton Tournament lawmman ṭhenkhat:

1) Men's Singles champion: Vanlalchawisana, Chandmary Badminton Club
2) Under-17 Boys Singles champion: Liansangpuia, Electric Veng Badminton Club
3) Under-15 Girls Singles champion: Isabel Zoremtluangi, Bazar Badminton Club
4) Under-13 Boys Singles champion: V. Vanmalsawma, Electric Veng Badminton Club

Vawiina Lawngtlaia Independence Day lawmnaah hian LADC Chief Executive Member Pu V. Zirsanga; LADC Chairman Pu VL Hmuaka; Lawngtlai Bawrhsap Pu H. Lalhmingthanga leh Lawngtlai SP Pu Lokeshwaran R. te bakah, LADC-a member-te, state leh LADC official-te, ex-servicemen-te, tlawmngai pawl ai awhte, chanchinbu mite leh zirlai naupangte, lawmman dawngtute leh mipui ṭhahnem tak an tel a. Muala hun hman zawh hian chhun lamah Circuit House, Lawngtlaiah LADC Chief Executive Member buatsaih ‘VIP At Home’ hun hlimawm tak hman chhunzawm niin, thingpui ruai kil ho a ni.

Kumin Independence Day lawmna pual hian Lawngtlai District Independence Day Celebration Committee chuan District Hospital Lawngtlai, Christian Hospital Lawngtlai, Lairam Christian Medical Centre & Hospital, Lairam Motherless Home, District Jail, Lairam Rescue Centre leh Gilead Drop-In Centre-ah te ṭanpuina ₹ 2,000/- ṭheuh an hlan a ni.