Vawiin khan Champhai DC Conference Hall, Keifangtlangah Independence Day, August ni 15-a lawmna hun hman dan tur ngaihtuahtu Independence Day Celebration Committee chu an thutkhawm a. District Bawrhsap Dr Naveen Aggarwal, IAS chuan he hun hi kaihruaiin Sawrkar Department leh tlawmngai pawl hrang hrang aiawhte an tel kim hle a ni.
Meeting chuan kumin Independence Day, India ramin zalenna a neih ni August Ni 15, chu Champhaiah chuan Chhangphut Field-ah Zing dar 10:30 atanga ropui taka lawm turin a rel a, hemi ni a khuallian tur ruat chungchang erawh chu State sorkar thuneitute kutah a dah thung.
Kumin Independence Day lawmnaah hian Parade Contingents leh Pipe Band-te tel thei turin Meeting chuan a beisei a. Sawrkar department hrang hrangte hna chanpualte siamfel nghal niin Independence Day ropui taka lawm a nih theih nan mahni chanvo theuh hneh taka thawk turin Meeting chuan department tinte a ngen a ni. Independence Day chu India ram ni pawimawh ber pakhat anih avangin sawrkar hnathawk zawng zawngte chu a lawmna hmuna kal vek tura beisei niin awlsam zawk nan sawm bikte chu he hunah hian sawmna card keng vek turin Meeting chuan a ngen a ni.
He hunah hian Department hrang hrang leh NGO te thawhlawm pek tur zat bithliah niin, Celebration Commmitte chuan phal taka tawiawm theuh turin a ngen a. Kumin Independence puala Infiamna thlan chhuah Football, Volleyball leh Badminton huanga inelna siam puih dan tur te pawh sawiho nghal a ni.
