Vawiin khan Mizoram State Law Commission meeting chu an Chairman, Pu John Siamkunga, MLA hovin a Office Chamber ah an thukhawm a. Tun tum hi he Commission thutkhawm vawi-30 na a ni.

Chairman, Pu John Siamkunga chuan a hun chhunga Law Commission member te leh staff te thahnemngaihna a fak a, tha taka an tawiawm avangin lawmthu a sawi a. Tin, Law Commission memberte inpekna hlu tak avangin Commission-in hna tha takin a thawk thin tih a sawi, Department hrang hrangte pawh an Dan hman lai te zirchiang leh zual se. Fel zawka mipui rawngbawl theihna atan a tangkai hle a a rin thu a sawi bawk.

Meeting-ah hian Mizoram-a Dan hman lai te enzui zel a ni a. Law Commission chuan Department thenkhat tih tur a tuk sak. He Department-in an bawhzui em tih an thlir a, Department thenkhatin hma an lak mek laiin hma la lo Department an awm avangin a rang thei ang bera hma la turin hriattir leh nise an ti. Hemi chungchang hi zau zawka ngaihtuah pawh tha an ti a: helama tui mite leh thiam bikte sawmkhawmin inrawnkhawmna leh sawihona la neih nise an ti.

Meeting-ah hian Mizoram State Law Commission pahnihna hun chhung 2014-2018 a hmalak tawhna te an thlirho a, he hun chhung hian Law Commission hi vawi 12 an thu a ni. Thil pawimawh tak tak rel thin a niin, engemaw zat tihhlawhtlin tawh a ni a, hmachhawp engemaw zat a awm bawk. Law Commission hmalakna hrang hrangah sorkar Department ten tha taka an tawiawm avangin lawmawm an ti hle a. Tun hnu zela pawh phur taka tawiawm zel turin Department hrang hrang leh mipui an ngen bawk a ni.

Vawiin Law Commission meeting hi Mizoram State Law Commission pahnihna hun chhunga Meeting hnuhnung ber a ni tawh a ni. Vawiin meeting-ah hian Law Commission member te an kal tha hle a. An Chairman, Pu John Siamkunga, MLA, Pi Marli Vankung, Secretary, Law & Judicial, Pu N. Zakhai, CEM, MADC, Pu Shanti Jiban Chakma, CEM, CADC, CEM,LADC aiawhin Pu K. Vanlalsanga, Adviser to CEM, LADC, PU A.K. Rokhum, Addl.Advocate General, Mizoram, Pu R.C. Thanga, Public Prosecutor, Dr.Rualkhuma Colney, Principal, Govt.Mizoram Law College leh Commission Secretary, Pu Zahmingthanga Ralte, Jt. Secretary, Law & Judicial Department te an tel a ni.