Vawiin chawhma khan Agriculture Minister Pu KS Thanga chuan Johnson Diesel Sales & Services Depot, Sihhmuiah loneitute hman tur tractor 30 leh leilehna hmanraw pawimawh dangte a sem.

Pu KS Thanga chuan  sawrkar laipuiin hmarchhak loneitute tana scheme tha tak a siam hnuaia hamthatna haichhuak tura Agriculture Department a thawktute thawhrimna a fak a, Mizoram chhung hmun hrang hranga loneituten buh leh bal thar tamna tura hmalaknaah sawrkar an tawiawm that avangin lawmawm a tih thu a sawi. Leilehna khawl an dawn tak te hmang hian senso tlem zawk leh sawt zawka lo neituten lei an leh a, tharchhuah a pun ngei a beisei thu a sawi a. Minister chuan Mizoramin khawl hmanga lo leh huan enkawl 'farm mechanization' ah hun engemawchen hma la tawh mah se tun dinhmunah mechanization tehfungah Mizoram chu 0.84 Kilowatt/Ha chauh a la ni a, khawl hman harsatna hmun, tlang rama lo nei kan nih avangin hmasawn a harsa a, tan lak a la ngai nasa hle, a ti a. Thangthar lehkhathiam leh sumdawngte pawh farm machinery lama sumdawnna huangah lut tam se tiin lei leh nan chauh ni lo - thlai chi thlak nan te, leitha pek nan te, thlai thar sengna thleng pawha khawl hman tam lehzual tul a tih thu a sawi a ni. Vawiina leilehna hmanrua semchhuah takte hi mi mal ta bil tur ni lovin in hman tawm tura duan a ni a, chuvangin Zau hrang hranga loneitu intelkhawm ten in lungrual a, intawm thiam a, fel taka inhman chhawk dan tur duan thiam a pawimawh hle dawn a ni, Agriculture Minister Pu K.S. Thanga chuan a ti bawk.

Sub Mission on Agricultural Mechanisation (SMAM) scheme hnuaiah sawrkar laipuiin hmarchhak state a farmer te tan component pariatna a duang a. Hemi hnuaiah hian loneitu intelkhawm Custom Hiring Centre thar sawmthum (30) tan Tractor 47HP, Trailer (3Ton capacity), leilehna khawl rotavator blade 48 nei leh buh ahna khawl self propelled paddy reaper pakhat zel semchhuah a ni. Custom Hiring System pakhat zelah cheng nuai sawm thleng project siam theih niin chuta 95% chu sawrkarin a tum a, a bak zawng hi loneitu intelkhawmten an tum a ni. CHC pakhat zel tan ?11,13,000 sen niin CHC sawmthum tan ?3,33,90,000 sen a ni a. Hetah hian sawrkar laipuiin ?2,56,50,000, State sawrkarin ?28,50,000 leh loneituten ?48,90,000 an tum a ni. Tractor 30 pek chhuahte hi a chakna belhkhawm chu 1140 Horse Power niin chu chuan mihring tha 11400 lai a hen a ni.

CHC din thar 30 zingah Champhai District atangin 16; Serchhip District atangin 7; Aizawl leh Siaha atangin 2; Kolasib, Lawngtlai leh Lunglei District te atangin pakhat theuh an awm a. Hmanraw sem tak te hi loneitu engemawzat intelkhawmten neitu nihna neia inhmantawm tura duan a ni a. Chhungkaw 1135 zet CHC 30 ah hian an tel a ni. Mizoram sawrkar hian CHC 71 din tawhin tuna a thar 30 nen hian a vaia belhkhawmin Mizoram pumah CHC 101 din a ni ta a. Mizoram hi ram pum huap pawha SMAM kalpui tha pawl an ni.

Programme hi Agriculture Department Addl.Secretary Pi Lalhrangliani'n a kaihruai a. Pu Lalchhanliana, Executive Engineer in report pe in, Agriculture (Crop Husbandry) Director Pu J Lalzamliana'n lawmthu sawiin hun hnung a khar a ni.