Autonomous District Council chungchanga meeting thawh hnihna chu vawiin khan Raj Bhavan-ah neih leh a ni a, Mizoram Governor Pu Kummanam Rajasekharan chuan a kaihruai a. CEM Pu N. Zakhai leh member dangte chu Mara Autonomous District Council aiawhin an tel a, District Council and Minority Affairs department leh Governor’s Secretariat official-te State sawrkar aiawhin an tel a ni. 

Governor chuan District Council tana thut hoa, ngaihtuahna sen leh thawhho chu meeting-in a tum a ni, a ti a. Council dinhmun uluk taka zirchiang a, thutlukna leh ruahmanna mumal tak siama, an ruahmannate chu a hun taka zo tur an nih thu a sawi a ni. Hmasawnna hna thawk tura sum an hmuh te chu renchem taka hmanga, ruahmanna siam lawk anga hmang tur an nih thu a sawi bawk a ni. MADC aiawha kalte hnenah chuan report te chu a hun taka thehlutin, an hmalaknate dinhmun chu thuneitu sang zawk hriattir a, tanpuina an mamawh pawha dil thin turin a chah a ni. Governor chuan Central leh State sawrkar chunga innghah reng a rem dawn lova, sum lakluhna kan dap thiam a mipuite dinhmun kan chawikana, an intodelh a pawimawh a ni, a ti. Member-te hnenah chuan harsatna siamtu nge a sukiangtu kan nih in enfiah a ngai a ti a. Hun inher danglam mil zela kan khawthlir kan tihdanglama, Council tana ruahmanna tha leh a hlenchhuah dan turte kan siam a ngai a ni, a ti.  Governor chuan thawhhona tha tak an neih a, hmalam an pan zel a beisei thu a sawi a ni.

Meeting-ah hian Autonomous District Council-te Fund Rules chu siam danglam tura hmalak mek a nih thu tarlan a ni a. Accountant General rawtna anga Internal Audit pawh hman thuai a nih tur thu tarlan a ni. Tui pump chungchang, agriculture leh a kaihnawih, bawlhhlawh paihna leh sawngbawlnaa an harsatnate sawiho a ni a. Khawkar inkalpawhna, skill development, thalaite tana eizawnna siam, college-a science stream zirna a awm loh thu te leh helicopter service tha zawk an mamawh thute an thlen a ni.

Mara Autonomous District Council aiawhte hian Governor hnenah India danpui 6th Schedule siam danglamna leh Council chhunga hnalak khapna thupek chungchangah memorandum an thehlut a. ‘A Report of Administrative Reforms Commission Mara Autonomous District Council 2018’ an thehlut bawk a ni.

Attachment

  • Loading attachment...