Vawiin hian Khawlailung Dinthar Branch YMA din champha vawi khatna chu Khawlailung Dinthar Middle School Hall ah hman ani a. Bialtu MLA Pi Vanlalawmpuii Chawngthu, Minister of State chuan khuallian niin a hman pui.

He Rising Day lawmna inkhawm Pu Lalsangliana, President, Branch YMA kaihhruaiah hian Pi Vanlalawmpuii Chawngthu chuan; Dinthar Branch in an Rising Day hmasa bera min sawm hi ka tan ni chhinchhiah tlak niin ka hriaa ka lawm hle a. Khawlailunga YMA din anih atanga vawiina Branch pathum tlin thei khawpa lo kaihruaitu, hruaitu hmasa zawng zawngte zahna chibai ka buk ani, a ti a. YMA chu khawtlanga pawl dang zawng zawng lenna bawm, kan zavaia unau anga kan inen tlanna pawl anih avangin YMA hi kan ram rohlu ani, a ti. YMA in kan ram a that reng theihna atana a hnathawhte, kan hnam a din ngheh theih nana a hmalakna te hi a ropui hle a, YMA hi kawng tinrengah ramin a chhawr ani. Tin, ram hmasawn leh thang chak ni tur te, ram rorelna tha nei tur te in mipui tha kan nih ve a ngai a, thil fello ti tura Minister leh MLA te nawr ngai lo, tanpuina kan dawn te a nihna taka hmang thin, Biakin ah chauh nilo nitin nuna kristianna tilang thin mi nih tum tlat turin he huna kal khawm mipuite a chah a. Hriselna leh nun kawng thianghlimna lama hmasawn a tul thu sawiin, zu leh ruihhlo laka fihlim, mahni tawka khawtlang leh ram tana mi tangkai tak nih tum theuh turin a ngen a, chutiang mi kan nih phawt chuan mahni zawnah YMA motto te hi kan puitlin thei dawn ani, a ti bawk.

Pi Vanlalawmpuii Chawngthu chuan, Dinthar Branch YMA in Hall an dilna chu a building pumpuia sakna tur fund ngaihtuah nghal mai a harsat rih thu a sawi a. Amaherawh chu a bul tanna tur chu ngaihtuah sak ngei a tum thu a hrilh a ni.

Vawiina Khawlailung Dinthar Branch YMA din cham vawi khatna lawmna hi hun hnihah then niin hun khatnaah Branch Secretary Report te, YMA kumpuan thupui Tuichangral South Group aiawh atanga sawi te, Khawlailung YMA hruaitu hluite thusawi ngaihnawm tak tak te ngaihthlak ani. Hun hnihnaah member Group hrang hrang inthenten Lengkhawm zai inelna neiin, Pu Lalnunngila, ACF, N. Vanlaiphai Division, Environment, Forest & Climate Change Department chuan Awareness Campaign a neiin, tlai lamah ruai a kilho nghal ani.

Khawlailung ah YMA hi Branch khatin kalpui thin ani a. Nikum YMA Day atang khan Branch pathum Dinthar, Khawlailung leh Bunghmun Branch ah te an inthen ta a. Tunah hian Dinthar Branch bikah hian member 260 an awm mek ani.