Independence Day vawi 70-na chu vawiin khan Champhai District-ah ropui taka lawm niin a lawmna pui ber chu Chhangphut Field, Champhaiah School Education Minister Pu H. Rohluna hovin urhsun taka hman a ni. He huna Khuallian School Education Minister Pu H. Rohluna chuan Hnam Puanzar pawtparhin, parade contingent 31-te Hnam Puanzar chibai bukna a chhanglet a; Independence Day thuchah a sawi hnuah Rashtrapati Award dawngtute, parade intihsiakna a tithate leh Independence Day puala intihsiakna hrang hranga tithate hnenah lawmpuina a hlan bawk.

Khuallian, School Education Minister chuan vantlang himna leh dan leh thupek kenkawh chu Sawrkarin a ngaipawimawh thu sawiin remna leh muanna boruak tha tak hnuaiah lo chuan hmasawnna hna a kal chak thei lo a, dan kengkawhtute, tlawmngai pawlte, kohhran te, thuthar thehdarhtute leh mipui vantlang thawhhona avangin Mizoram chu ram puma State muanawm berte zingah kan la vawng thei zel a ni, a ti a. Mizoram Peace Accord ziah kum 30 tlinna kum ah hian remna leh muanna nei chhunzawm zel turin mitin te in hlan thar leh turin a sawm bawk.

Sawrkar hmalakna hrang hrang tarlangin Khuallian chuan Mizoram Sawrkar Flagship Programme, New Land Use Policy (NLUP) chuan ei leh bar zawnna kawngah hmasawnna tamtak a thlen chho mek zel a. NLUP hian chhungkaw tamtak eizawnna ngelnghet leh rintlak zawk siam sak in, tlangram loneih pawhin nasa takin a tlakhniam phah a. United Nations Agencies hrang hrang, UNDP, FAO, UNIDO leh ILO te nena sawrkar thawhhona pawh tluangtakin a kal zel a. Tunah hian NLUP 3rd leh 4th Phase pawh kalpui mek a nih bakah hmasawnna tluantling siamna turin ruahmanna thar ‘New Economic Development Policy (NEDP)- Comprehensive Growth Strategy for Mizoram’ duan chhuah a ni a, hei hian NLUP hlamchhiah lovin, a tuamhlawm chho ang a. Thil thar chhuah tihpun, mipui tana remchang siamsak, mipui sum dinhmun siamthat leh sumdawnna boruak siam nana ruahman a ni. Kumin chhunga hman theih turin NEDP-a tan cheng nuai 25,000 dah a ni a. NEDP sum hi Chief Minister’s Rural Housing Scheme, Improvement of Referral Hospital, Construction of Link Roads, Construction of Additional Classroom for Govt. Higher Secondary Schools leh District Hospitals khawl a thuam that nante pawh hman tel tum a nih thu khuallian chuan a sawilang bawk. Buh leh thlai tharchhuah a pun zel theih nan sawrkarin tan ala zel a. Loneitute mamawh phuhru thurin buh leh thlai chi tha leh khawl mantlawm zawk a pek kawngah te chak taka hmalak a ni a. Kan buh thar pawh a pung chho zel a ni. Custom Hiring Center 57 din a ni tawh a, chung zinga 14 chu Champhai District ah a ni. PRRS hian vawk vulhtute tan harsatna a siam ang harsatna dang awm thei laka in ven nan Epidemiological Center chu cheng nuai 321.5 seng a sak mek a nih thu a sawi bawk.

Pu H. Rohluna, Minister chuan khawlphetha siamchhuah kawnga hmalakna hrang hrang tarlangin Tuivai HEP (210 MW) bul tan thuai a nih theih nan a bawhzui zel a nih thu te, Tuirial HEP (60 MV) pawh hawn theih thuai beisei a nih thu te, Tlawva SHP (5 MW) leh Kawlbem SHP (3.5 MW) te pawh kum thar lama hawn theih tumin hna chak taka thawh mek a nih thu te a tarlang a.

Zirna tih hmasawn kawnga sawrkar hmalakna tarlangin Sawrkar school-a thawk zirtirtute training tir vek an ni tawh a, Academic Session 2015-2016 atangin Mizo leh English medium zawng zawng ah NCERT Textbook hman tan a ni a, class I-V tan zirlaibu a thlawn in sawrkar school naupangte hnenah sem a ni bawk. Mizoram Engineering College tur pawh Pukpuiah May thla atang khan cheng nuai 2,600 senna turin sak tan a ni a. RUSA hnuai ah College 21 tih changtlun mek a ni, a ti bawk.

Sawrkar chuan thil siam chhuah tam zawk leh a hralhna mumal zawk a kalpui a nih theih nan chaktakin hma lak zel a ni tih sawiin, Industries leh Trade & Commerce Department-te chu Department khata chhunfinin department siam thar, Commerce & Industries Department hnuaiah hmalak tan a nih thu a sawi a. Handloom Cluster Development project hmun 17 ah kalpui mek a ni a, ramri hrul a ram dang nen a insumdawn tawn na mumal taka a kal theih nan Zokhawthar Land Custom Station pawh hawn a ni tawh a, insumdawn tawn na pawh tluang taka kalpui zel a ni a. Integrated Check Post Kawrpuichhuah, Tlabung bula din na turin hmalak chho mek a ni bawk. Mizoram chhunga Gas zawnna pawh a mawhphurtu Company ten ngawrh takin an kalpui zel a. Heng company atang hian sawrkar chuan Petroleum Licence fee cheng nuai 1,848 chuang a hmu tawh bawk tih a tarlang a.

Mipuite hnena tui thianghlim pekna turin sawrkar in chak takin hma a la reng tih swiin kum 2015-2016 chhungin khaw 28 tan hma a la tawh a. Kelkang khuaah nizung chakna hmang a an tui pump na tur peihfel tep a nih tawh thu leh Swachh Bharat Mission(GRAMIN) leh MGNREGS tangkawp hmalakna in Open Defecation Free(ODF) District ah Champhai, Aizawl, Kolasib, Saiha leh Serchhip District te kumin chhung hian puan theih beisei a ni a ti bawk. Champhai District Hospital chei that a ni tawh bakah Champhai District a Infant Mortality Rate nasa taka a tlahniam chu lawmawm a tih thu a sawi a. Mizoram Sawrkarin mipuite hnena Civil Supply tluang taka a thlen theih nan hma ala a. National Food Security Act, 2013 pawh Mizoram ah March, 2016 atang khan hman tan a ni a. NFSA in a huam loh chhungkua te tan pawh sawrkarin Ration Card a siamsak vek a. BPL dik tak awmzat hrechiang tura sawrkarin Baseline Survey a kalpui mekah Champhai District chhunga khaw 5 - Riangtlei, Pamchung, Rabung, Tlangmawi leh Chawngtlai khuante’n BPL an neihloh thu an puang chu chhuanawm a ti hle a ni, a ti bawk. Champhai District DRDA Project Director Pu CC Lalchuangkima, MCS chu Project Director tha berah thlan a ni leh hemi pual a Champhai mipuite tan MGNREGS hnuaia ni hnih inhlawhna pek belh a ni chu lawmawm a tih thu a tarlang bawk.

Sawrkarin infiamna lama thalaite rualawhna hria in Sport Infrastructure ah nasa takin hma a la a. Chung zing a mi Thenzawl a Integrated Development of New Eco- Tourism Project cheng nuai 9,490 senna tur pawh thawh mek a ni a, Mizoram Youth Commisssion chuan UPSC leh SSC exam turte tan coaching class a buatsaih sak a, Skill Development leh Capacity Building lamah pawh nasa taka hma lak zel a ni a ti bawk.

Khuallian chuan Mizoram Police te tih chak nan hmasawnna ruhrel tamtak din mek a nih thu sawiin Police Station zawng zawng thlunzawmtu tur CCTNS Networks chu peihfel mek a ni tawh a, Forensic Science Laboratory thuam chakin Home Department hnuaiah Directorate puitlingah hlankai a ni, a ti bawk.

Kumin Independence Day denchhen hian Champhai District Bharat Scouts & Guides movement atanga Rashtrapati Award dawngtu H.T. Lalfakzuali D/O H.T Zoliana, Venglai, Govt. Champhai College zirlai; C. Lalruatfela S/O Lalrunthanga, Electric Veng, Govt. GMHSS Zirla; leh Rohlupua S/O Lalvuana Electrict Veng, MICE, Aizawl zirlaite hnenah Khuallian chuan lawmpuina a hlan bawk.

Vawiin Independence Day parade-a contingent 31 zingah hian armed Contingent pakhat , Unarmed Contingent sawm, School Contingent sawmhnih pakhat leh Vengthlang Middle School Scouts & Guides Pipe Band te an tel a. School Contingent zingah hian Bethel Mission School Girls Contingent chu pakhatna a puan niin BC English Academy Boys Contingent leh Holly Cross High School Boys & Girls Contingent ten an dawt a ni.

Independence Day lawmna Chhangphut Field-a neih zawh hian Independence Day Chief Guest hovin official leh mi sawm bikte tan DC Bungalow-ah At Home function neih a ni bawk.

Independence Day pual hian Football, Basketball Tournament leh Rifle inkah siak ah te inelna buatsaih a ni a. Basketball-ah Phunglungchuani Team an Champion a. Rifle inkahsiak, Senior Men leh Women-ah Lalhlanmawia, Kahrawt veng leh Rochhingpuii, Vengthlang te an champion a, Junior Boys-ah Lalnunthara, Dinthar veng chu a champion thung. Football Tournament ah hian First Division team 11 intum in, final match hi Bethel Sporting Club leh Champhai United ten an khel a ni.