India zalenna champha Mamit GSA Playground ah vawiin khan Pu H. Lal Thanzara Minister, Health & Family Welfare, I&PR etc chuan Parate contingents 13 te hnam puanzar chibai buk a chhanglet. Mamit khawpui bakah hian Pu Lalrobiaka chuan W. Phailengah hmanpuiin Kawrthahah Zohanco Chairman Pu R. Vanlanvena’n Zalenna Ni hi a hmanpui a ni.

India ram khawvela Democracy ram lian ber a Mizo fate Pathianin min lo dah chu a lawmawm thu hre thar theuh turin khuallian chuan kalkhawmte a chah a, Sakhaw zalenna kan neih hi keini Kristian te tan phei chuan chanchintha puandarhna kawngah pawh kan zalen phah em em a ni a ti.

Mamit District chhunga Sorkar hmalakna hrang hrang tarlangin Sorkar Flagship Programme New Land Use Policy chu chak taka kalpui a ni a, Mamit District ah pawh Line Department pariat (8) kaltlangin chhungkaw 11, 338 hnenah tanpuina pek tawh a ni, chhungkaw harsa rahbi tleu te dawmkanna tur in NLUP chu chhunzawm zel a ni dawn a ni tiin Pu Lal Thanzara chuan Naupang dikna leh chanvo humhalh leh hamthatna ngaihtuahpuiin naupang 79 te chu thlatin cheng 1000/- pek thin an ni a, Naupang awmna tur nei mumal lo leh nu leh pa, chhungkhat laina enkawlna tu nei tha lo leh tawhsual tawkte tan Mamit ah naupang 50 enkawl theihna Shelter Home ruahman niin, tunah hian naupang 19 ( Mipa - 11, Hmeichhia - 8 ) enkawl mek an nih thu a sawi.

Mizoram Sorkar hmalak na leh hmasawn dan hrang hrang te sawi in Khuallian chuan Mamit District chhunga khua zawng zawngah eng pek a nih theih nan hma lak mek a ni a, kum 2015-2016 Financial Year chhungin District Jail Mamit, PHE Pump House Teirei, PHE Pump House Zawlnuam leh District Jail Water Supply Schemes, Mamit Power pek hna zawh fel a ni tawh bawk. Integrated Power Development Schemes (IPDS) hnuaiah Mamit khawpui chhung tan R&M of 33KV Mamit to W. Phaileng line by Weasel conductor telin hna 10 lai thawhna atan tender chhuah mek a ni. Mamit District chhunga khaw hrang hrangah hnianghnar zawka tui thianghlim an neih theihna turin PHE Department chuan hma ala mek a, August 2015 leh August 2016 chhung hian khaw 6 Paruk Mualthuam, K Chuhvel, Luimawi, Chilui, Bungthuam leh Zawlnuam WSS tan tui lakna tur peihfel a ni a,Zamuang leh Chhippui/ Kawnmawi WSS te chu siam zawh tep a ni a, Teirei Lui atanga chawm tur W.Phaileng WSS chu hna 97 % zawh tawh a ni, West Phulpui WSS ( Rain water harvesting) hnuaiah chhungkaw 150 tan ruahtui khawlna tuizem 5000ltr dawng theuh siam sak an ni a, Silsury WSS hnuaiah chhungkaw 851 te hnenah polythene water tank, litre 1000 dawng sem a ni a, tuikhur 4 siamsak mek pawh 67 % zawh tawh a ni a ti.

Mamit District chhung khaw hrang hrangte inkalpawhna kawngtha neih theihna turin PWD chuan hna a thawh dan sawiin Minister chuan National Highway 44 A Double Lane a siam hna kalpui zel niin kumin chhung hian chak taka hna thawh chhoh tum a ni a, tum anga wm theih chuan tun thal chhung hian km 30 tal laih leh black topping hna thawh zawh hman tum a ni a, KTZKT Road laih hna thal chhunga a tam thei ang ber thawh tum a ni. Tut Lei dawh hna chu zawhfel niin Lirthei eng chi pawh zawh theiha hman a ni tawh a, W. Phaileng - Marpara inkar kawng 80.00 km a thui thuam that hna zawh fel tawh a ni, W. Phaileng leh Damparengpui inkar 2.130 km a thui chu cement concrete in PMGSY sum hmanga thawh zawh tawh a ni a, Lengpui atanga NIT panna kawngpui 780 metre a thui sial mek chu 90 % laih zawh tawh a ni. Tuipuibari leh W. Kawnpui inkar kawng 18 kms a thui chu chei that tura ruahman a ni a, hna tan mai tura hmalak a ni. Mipui vantlangten inthiarna tha zawk an neih theih nan chhungkaw 77 te Ekin sak sak an ni a, Anganwadi 15 sa turin hma lak mek a ni, Kuthnathawktu te tan Farm Pond 90 siam tura hmalak a ni a, IAY ( PMAY) In sak tanpuina hmangin chhungkaw 46 te chenna In sak tawh niin chhungkaw 44 te tan sak leh mek a ni bawk. IWMP hmangin khaw 20 ah Self Help Group 75 lai din ni tawhin, chhungkaw 421 hnenah eizawnna bultanna tur sum pek an ni tawh a, Ram 8,000 Ha ( sangriat) laia zau, sum chang thlai chinna atan cheibawl a nih thu a sawi bawk. Zirna lamah hmasawnna kawng zawh zelin NECS in Tribal Girl’s Hostel Rs 1,86,00,000/- senna tur a sa mek a, RUSA project hnuaiah Smart Class Room tur Lushai Engineering Aizawl in Rs 70,00,000/- man a sa mek bawk, UGC Grant Rs 25,00,000/- hmangin Building thar sak mek a ni, Mamit District chhunga High School awm lohna khua hmun hrang hrangah School changtlung tak 11 buatsaih a ni a, MSDP hnuaiah Girls Hostel pahnih Govt, High School W. Phaileng leh Govt Higher Secendary School , Mamit ah te sak zawh tawh a ni. SSA leh Tata Trust ( NEIDA) thawhhona in Mamit District chhunga khaw parukah Football zirna naupang 50 awmtheihna Grassroot Football Training Centre changtluang tak hawn a ni, heibakah hian hmeichhia te infiamna lama hmasawnna tur ah hma nasa taka lak a ni bawk.

Minister chuan Mizoram Sorkar hmalakna leh hmasawnna hrang hrang tarlangin tun kum nga kalta chhung khan NLUP hnuaiah ei leh bara intodelh nan chhungkaw 1,30,000 te tanpuina pek an ni a, Sorkar chuan hmasawnna tluantling leh huapzo ruahmanna thar New Economics Development Policy (NEDP) Comprehensive Growth Strategy for Mizoram a duanga 14th Finance Commission in kal phung a her danglam tak thlir chunga Act East Policy leh ram sumpai dinhmun than zel dan mil a duan niin hei hian a tum chu thar chhuah tihpun, mipui tana remchang siamsak, mipui sum dinhmun siam that, sumdawnna boruak tha siam leh mipuiin an chanpual dik tak an chan ngei theih nana ruahmanna niin sorkar hmalakna reng rengah mipuiten a neitu thinlung pu a thawhho a ni a ti a, kan ram hi hmasawnna kawngah chak leh zual zawka ke pen tir tum a ni a ti bawk. Kumin chhung hian NEDP hnuaia Annual Action Plan 2016-2017 chu kalpui tum niin heta tan hian cheng nuai 25000 dah a ni a, kan leilung hausakna hmang tangkai a, thiamna thar leh tihdan thar dungchhuakin hlwhtlinna kawngzawh tum a ni a, hemi atan hian New Economic Policy chu hman tum a ni a, thalai lehkha thiam tam takte tan sorkar hna thawk kher lova mahni ke a din theihna tur hei hian a rawn hring chhuak dawn a ni tiin NEDP ken tel pawimawh em em chu kan tih dan thin leh kan ngaihtuahna hlui hnungchhawn a, kan kalphung thlak ani a, mipuiin neitu thinlung pu a, sorkar hmalakna zawng zawngah thawh ho hi a ni a ti, NLUP tiphuisui tura NEDP nena suihzawm bakah a bika duan project hrang hrang- Chief Minister’s Rural Housing Schemes, Improvement of Referral Hospital Falkawn, Aizawl, City Road Junction Improvement Project leh New Secreatriat Complex Development te thawh tum a nih thu a sawi.

Sorkar chuan mipui himna turin dan leh thupek kenkawh a ngai pawimawh hle a, Police station zawng zawng thlunzawmtu tur CCTNS Networks chu peihfel mai hmabak ni tawhin hemi atan hian police mi 3,887 te chu an train chhuak tawh thu leh Mamit Hospital tih chang tlun nan New Economic Developmeny policy atanga Health Sector a hman tur Sokar in min ruahman sak atangin Endoscope Machine, Colposcopy Machine, Oxygen Concentrator, ENT instrument leh Pathology Instrument a thuam tum mek a nih thu Health Minister chuan a sawi bawk.

Mamit a India Independence Day hmanna ah hian hnam puanzar chibai bukna ah hian Parade Commander chu SI H. Lallungtiawia ani a, School Contingents atang in lawmman pakhatna hi JNV School, Mamit chuan an la a, pahnihna St Francis of Assisi School (Girls) niin lawmman pathumna hi St Francis of Assisi School (Boys) te chuan an la a ni.

Heng bakah kum 2015 chhunga huaisen chawimawina Award chi hrang hrang dawngtu mi pali te hnenah chawimawina hlan an ni a, chungte chu 1. Laldinpuia S/o B. Lalrema Uttam Jeevan Raksha Padak Award 2- Pi Podo Soba, W/o Arunkanti Jeevan Raksha Padak Award 3- Pu Syamol Kanty Chakma, Jeevan Raksha Padak Award 4. Pu R. Rothantluanga Lallen, Jeevan Raksha Padak Award te an ni.

Independence Day Mamit-a lawmna pual hian Mamit District huapin infiamna lama in elna chi hrang hrang Football, Volleyball, Badminton, Table Tennis, Lawn Tennis te buatsaih a ni a, Football ah hian Venghlun FC, Mamit leh Dampui GSA te chuan final khelin Volleyball ah hian Apex Bank leh Zawlnuam Volley Ball Club te chuan final an khel a, Minister hian lawmman semna a nei nghal bawk a ni.

Khuallian Pu Lal Thanzara, Minister Health & Family Welfare, etc hian GSA Playground a hun a hman zawh hian District Hospital, Mamit ah damlo mi 21 a tlawhin thilpek a pe a, Shelter Home a naupang 19 te thilpek a pe bawk. Chawhnu dar khatah Tourist Lodge Mamit-ah sawmbikte pualin At Home buatsaih a ni bawk.

Health Minister hi AMC Councillors pahnih Pi R.Zomuanpuii, Ward No I leh Pi K.Lalhmingliani Ward No. 7 ten an tawiawm a ni.