Vawiin khan India ram hmun hrang hrang a an lawm angin, Lungleiah pawh India ram zalenna ni, Independence Day vawi 70-na chu Thuamluaia mualah hman a ni a. Khuallian Assembly Speaker Pu Hiphei chuan zing dar 10-ah hnam puanzar chu pawtparhin parade contingent 23-te hnam puanzar chibai buk a chhanglet a ni.

Khuallian chuan kan ram zalenna atana inpe mi huaisen kal ta te avanga vawiin thleng thei kan ni tiin, kan zalenna atana nunna chan ta te i hrechhuak thar leh ang u, a ti a. Kum 69 chhungin kan thenawm ramte chu an danglam chak in, a then sipai rorelnaah tlu lutin inawpbehna hnuaiah an awm laia keini dan rorelna fel tak, democracy hnuaia kan awm chu a thlamuan thlak hle a ni, a ti.

Pu Hiphei chuan ram nuam tak nei chung sia mipuite rethei bik renga awm khaichhuah nan, sawrkarin NLUP chhunzawmna atan New Economic Development Policy (NEDP) a duang chhuak leh tawh a ti a. He Policy hmang hian mipui leh sawrkar thawhhona tur tam tak a awm dawn in, chu thawhhona te chuan Mizoram chu tun aia dinhmun sang zawkah min hlang kai dawn a ni, a ti. Ram thar chhuah tih pun te, hna thawh tur siam belh te, sumdawnna lam tih hmasawn te leh sawrkar hmalakna lam reng reng hun rei tak thlir chung zela NEDP chu duan a nih thu a sawi a. Kan ram hmasawnna atana a mawhphurtu ber agriculture sector, industry-manufacturing sector, infrastructural development leh service sector te tih hmasawn a tum thu a sawi.

Sawrkar hmalakna hrang hrang leh hmasawnna awm thenkhatte sawi langin, Pu Hiphei chuan Mizoram sawrkarin NLUP a kalpuinaah thlai chin ngawt nilovin a hralhna lam ngaihtuah nasat a tum hle a ti a. Inkalpawhna kawngpui siamthat leh kawlphetha siam chhuah chu ram hmasawnna atana pawimawh a ni tih a hria a, Broad Gauge Railway Map-a Mizoram a chuang kai ve ta chu lawmawm a tiin, kawlphetha chhuah kawngah MW 60 Tuirial Hydro Electric Project pawh hnathawk thei tura hawn thuai a nih tur thu a sawi lang bawk a ni.

Lunglei District chu an vanneih hle tiin, Pu Hiphei chuan district dang te neih ve loh High Powered Committee chuan Lunglei hmasawn nan nasa takin hma a la, a ti a. HPC hmalakna mai bakah department hrang hrang ah pawh hmasawnna tam tak hmuh tur a awm a ni, a ti. Hmasawnna in ram a ti changkang zel a, hmasawnna nei tur chuan inrelbawlna tha leh inlungrualna tha kan neih a ngai a ti a. Zirlaite pawhin kan ram tan zel a ni tih hre reng chungin lehkha kan zir a ngai tawh a ni, a ti bawk.

Independence Day lawmna ah hian contingent 23 – Armed contingent 3, Unarmed contingent 5, School contingent 13 leh Band Party 2 te an awm a. Parade Commander S.I. Rodingliana Sailo leh 2nd Parade Commander S.I. B. Lalnunsanga ten parade hi an kaihruai a ni. Unarmed Contingent-ah NCC Air Wing BHSS, Serkawn; NCC Govt. High School, Lunglei leh Scout & Guide, Chawngfianga Memorial School te chuan lawman pakhatna atanga pathumna an dawng a. School Contingent-ah Zakhuma Memorial School, Theiriat; Sacred Heart School leh Govt. HSS, Lunglei te’n lawmman pakhatna atanga pathumna an la ve thung a ni.

Independence Day vawi 70-na lawmna pual hian volleyball, pool, carom, chess leh tennis ah te intihsiakna huaihawt tel a ni.