India Independence Day chu Pu Hmingdailova Khiangte Parliamentary Secretary hovin Kawnpui-a Boys Hockey Academy Playground ah hman a ni a. Parade Contingent 10 ten Hnam Puanzar chibai an buk chu Parliamentary Secretary hian a chhang let a. Independence Day puala Football leh Hockey Tournament lawmman a sem a. AH & Vety Deptt in NLUP puala High School Zirlaite intihsiakna an buatsaih leh NLUP dawngtu hna thawk tha thlan chhuah mi 3 hnenah lawmman a sem bawk.

Pu Hmingdailova Khiangte chuan Bureau Police Reform & Development (BPR&D) report danin kum 2013-14 chhung khan Mizoram Police-te hi IPC hmanga thil tisualtute convict hnem ber an ni a. Economic survey 2014-15-in a tarlan danin NLUP trade tam takah rah tha leh duhawm hmuh tur an awm a. NLUP-in a tuam kim loh lai leh a belh ngai laite pual in New Economic Development Policy (NEDP) kan sawrkarin a duang chhuak a, Budget-Session-ah khan passed a ni tawh a. He NEDP hian kumin 2016-17 chhung atan Cheng Nuai 25000 ruahman a ni a. He NEDP hnuaia hmalakna hian TANPUINA ni mai lovin TANGTE-PUIHNA a ni ang a ti. Hriselna lama sawrkar hmalakna thenkhat sawiin Kum 1993-98 inkara State Referral Hospital, Falkawn-a awm tura ruahman chu chhunzawm loha hlamchhiah a ni a, Congress sawrkar hian Referral Hospital atana cheibawl mai ni lovin Mizoram Medical College - Mizoram Institute of Medical Education and Research (MIMER) chu nakum hian zirlai 100 nena bultan theih beisei a ni. A bul lawkah hian Mizoram College of Nursing khum 200 awm theihna pawh hawn tawh a ni. Thenzawlah khum 50 awmna AYUSH Hospital sak peih a ni tawh. Health Care Scheme leh RSBY te chu BPL chhungkua leh sorkar hnathawk awm lo chhungkua ten an tangkai pui hle a ti bawk.

Kawnpui Sub Division chhunga thingtlang khua Tui thianghlim in tur pek kawnga ruahmanna thawh mek sawiin Zanlawn Water Supply Scheme te; N.Chaltlang leh Lungmuat kumin chhunga zawh fel tur te; Kawnpui Water Supply Scheme Improvement hi NABARD atanga Rs. 296 lakhs hmanga ruahman te; Khamrang Improvement Water Supply Scheme pawh Rural Drinking Water Supply Project hnuaiah Rs. 134 lakhs hmangin kumin (2016-17) chhunga zawh fel beisei thu te; Bukpui leh Khamrang Water Supply Scheme Improvement pawh nakum 2017-18 chhungin NEDP sum hmanga zawh theih tura ruahman mek a nih thu te a sawi.

Housing for Poor hnuaiah Aizawl khawpui chhung hmun thumah chenna In luah mai theih tur siam a ni ta a; chung te- 1. Chite Lawipui Housing Project - Rs 3403.48 lakhs 2. Rangvamual Housing Project - Rs 3705.14 lakhs 3. Durtlang Housing Project - Rs 2623.73 lakhs