India ramin zalenna a hmuh champhaphak vawi 70-na chu ram chhung hmun dangte rualin vawiin khan Lawngtlaiah ropui takin hman a ni a. A lawmna pui ber CYLA Playground-ah chuan Urban Development & Poverty Alleviation, etc. Minister Pu Zodintluanga chu Khuallian a ni.

Zing ni chhuah rualin sawrkar pisa leh hmun pawimawh dangah te India hnam puanzar zar a ni a. Chawhma dar 10:30-ah CYLA Playground-ah Khuallianin hnam puanzar pawt pharhin, hnam puanzar chibai buktu parade contingent 17 te chibai buk a chhang let nghal bawk.

Khuallian chuan ram dang awp behna lak ata India ramin zalenna a hmuh theih nana an thiamna leh theihna mai baka an nunna hial hlantu hnam pasalthate zahna chibai a buk a. Ram zalenna atana an man pek a tozia hre rengin, zalenna leh muanna hi thangtharte'n kan vawnghim tlat tur a ni, a ti a. Chanchin ropui leh ngaihnawm tak nei, lal huaisen leh ropui tak tak thlah kal zel Laifate zinga Independence Day a hmang thei chu a lawm thu sawiin, khawvel changkang zel ruala Mizoramin hma a sawn zel theih nan a ram mite kan inlungrual a, kan inpumkhat tlat a pawimawh a ni, a ti.

Khuallian Pu Zodintluanga chuan Mizoram leh Lawngtlai District hma sawnna hrang hrang a tar lang a. Mizorama chhungkaw 1,30,000 laiin NLUP tanpuina dawng tawhin, chhungkaw tam takin lei rem an rah theih phah a. NLUP chu la sem chhunzawm zel tur niin, thar chhuah sa deh ralna tur (market) pawh ngaihtuah a ni a; sawhthing leh aieng thawn chhuah dan tur (Pack House Project) pawh Agricultural and Processed Food Products Export Development Authority (APEDA) rem tihnaa duan a nih thu a sawi a. Pa ei sual avanga nunna hlu tak chan a awm tawh loh nan NLUP Implementing Board chuan USA-a University of Minnesota leh Mizoram University te nen zir bingna an kalpui mek a. New Economic Development Policy hnuaiah kum 2016-17 atan 'tanpuina' ni lo, 'tang puihna' tur sum Rs nuai 25,000 ruahman tawh niin, hemi hnuaiah hian a bikin project hrang hrang - Chief Minister's Rural Housing Scheme leh Referral Hospital Falkawn tihchangtlunna tur te pawh duan tel a nih thu a sawi bawk.

Lawngtlaia Auxiliary Nursing Midwifery (ANM) sikul building sak zawh tawh chu rei loteah class tan thuai tum a ni a. Kan thenawm Myanmar leh Bangladesh te nen insumdawn tawnna tha zawk kan neih theih nan Kaladan Multi Modal Transit Transport Project (KMMTTP) kalpui mek niin, hemi denchhen hian Tlabungah Trade Facilitation Centre sak zawh tawh niin, Lawngtlaiah pawh sak mek a ni, a ti a. MGNREGS-a mipui ni khat hlawh chu April ni 1, 2016 atangin Rs 188-ah tihpun niin, Mizoram State Rural Livelihoods Mission (MzSRLM) pawh Lawngtlai District-ah chuan Sangau Block-ah bul tan a ni dawn a. Ramri hrula khaw awmte hmasawn nan Border Area Development Project ( BADP) hmanga hna thawh chhunzawm zel a ni, a ti bawk.

Khuallian chuan kawlphetha MW 60 pe chhuak thei tur Tuirial Hydro Electric Project chu peih fel tep niin, MW 210 pe chhuak thei tur Tuivai Hydro Electric Project pawh bul tan thuai tum a ni, a ti a. Kum 2015-16 chhungin kawlphetha sem chhuahna siam that leh tihpun hna panga (5) thawh zawh tawh niin, state chhung hmun hrang hranga heti ang hna thawh mek 13 chu kum 2016-17 chhung hian zawh fel hman tum a ni, a ti a. Deendayal Upadhyaya Gram Jyoti Yojana (DDUGJY) kal tlangin Rural Electrification Corporation (REC) hnuaiah thingtlang khuate eng pek nan Rs vaibelchhe 30.43 ruahman niin, hei hian BPL chhungkaw 933 te eng pekna tur a keng tel ang, a ti.

Kumin atang hian zirlai 50 theuhvin Siaha, Lawngtlai, Champhai, Kolasib, Serchhip leh Mamit DIET-ah te 2 years Diploma in Elementary Education (D.El.Ed.) an zir tan dawn tih sawiin, Khuallian chuan Mizoramah Integrated Watershed Management Project (IWMP) 89 thawh mek niin, khaw 300 a tuam tawh a, Self Help Group (SHG) pawh 1,108 din a ni tawh, tih a sawi a. Swachh Bharat Mission hnuaiah Mizoram chu India rama state fai ber leh Aizawl khawpui chu khawpui fai ber nih tuma hma lak mek a ni a. March 2016 atanga hman tan National Food Security Act (NSFA), 2013 chu chhawrtu chhungkaw 1,40,017 atangin mi mal 6,67,482 an awm a; Non-NFSA ration card 120979 a awm bawkin, hmun hrang hrangah kudam sak mek a ni, a ti.

Khuallian chuan in nei lote'n in sak tanpuina Rs 150000/- an dawn theihna tur Prime Minister Awas Yojana - Housing For All (PMAY-HFA) chu Mizorama khawpui 23-ah kalpui tura ruahman a nih thu sawiin, sawrkar hma lakna hrang hrangte a hlawhtlin theih nan kut hna thawktute leh mipuite tawiawmna leh thawhpuina a ngen nghal a ni.

Thu a sawi zawh hian Khuallian chuan parade contingent ti thate hnenah lawmman a sem nghal a. Unarmed Contingent-ah Downtown English Medium School Guide chu pakhatna niin, pahnihna Don Bosco School NCC leh pathumna Downtown English Medium School Scout te an ni a. School contingent-ah Govt Region Higher Secondary School Boys chu pakhatna niin, pahnihna Jehova Jire Higher Secondary School Girls leh pathumna ML Junior English Medium School te an ni. He'ng bakah hian Independence Day Badminton Tournament lawmman leh Lawngtlai District-a pawl leh mi mal a thlawna thisen pe tamte hnenah chawimawina a hlan nghal bawk.

He hunah hian Independence Day Football final khelh nghal niin, Lawngtlai Vengpui Football Club an champion a, Lawngtlai Chandmary Football Club chu pahnihna an ni.

Hemi zawh hian Circuit House-ah VIP At Home Tea Party hlimawm tak hman chhunzawm a ni.

Vawiin Lawngtlaia Independence Day lawmnaah hian Lawngtlai DC Dr A.Muthamma leh LADC CEM Pu VL Hmuaka te bakah, LADC-a member te, state leh district council-a officer te, NGO leh thu thar theh darhtu te, sikul naupang leh mipui thahnem tak an tel.