Vawiin chawhnu ah khan Mizoram Governor Lt. Gen. Nirbhay Sharma (Retd.) leh a nupui, Lady Governor Jyotsna Sharma te chuan Masihi Sangati Kendra, Mizoram Synod ten Millenium Centre Courtyard a an huaihawt, Independence Food Festival, 2016 an tlawh.

Food Festival chhimtu te hma ah thu sawiin Mizoram Governor Lt Gen Nirbhay Sharma (Retd.) chuan tawng hran hmang leh khawsak phung inanglo, India ram chhung state dang atanga rawn kal te leh Mizo mipui te inkawm ngeih zawkna tura Masihi Sangati Kendra hmalakna chu a thlawp thu leh tha a tih thu a sawi a. Food Festival chu hnam hrang hrang te tan intawhkhawmna hun remchang leh rilru in pawh tlang taka inkawm theihna hun remchang a ni a ti a. “Mizoram, state ralmuang bera cheng te hian, society leh state ang pawh a hma kan lo sawt zawk nan, hnamdang leh state pawn lam mite hi huphurh mai lovin thian ah siam kan tum a ngai a. Tawng chungchang ah pawh hmasawnna tur kan nei a; Saptawng leh Vaitawng bakah tawngdang te pawh kan thiam tam a ngai”, Governor chuan a ti a. Hnam a chian a tul rual in India ram inpumkhatna atana mawhphurhna kan neih ah te pawh kan chian tel a ngai a ni a ti.

Independence Food Festival, 2016 kharna inkhawm hi Rev. K. Lalthanpuia, Director, Masihi Sangati Kendra in a kaihruai a, Food festival ah hian hmarchhak a cheng te chaw rinrawl hrang hrang bakah India ram hmun danga eitur an buatsaih thin ang te chu ei theih a chhawp chhuah a ni.