India Independence Day vawi 70 na chu, ram chhung hmun dang rualin Tuipang Sub Division Hqrs. Tuipang ah pawh tluang takin vawiin khan hman a ni a. Pu.C.Ngunlianchunga MoS AH & Vety etc. chuan Hnampuanzar pawtpharhin Parade contingent 12 te chibaibuk na a chhang let.

Mizoram mipuite he ram ropui taka khua leh tui zawng zawng te duhsakna chibai buk in khuallian Pu C Ngunlianchunga chuan kan ram tana ni ropui tak, Indpendence Day vawi 70 na a lo thlen hian Kum 69 kalta vawiin ni angah khan hnehchhiahna thim chhah tak ata enna hmu in, inawpbehna nghawngkawl tih tliah lo ni ta in,Midangte rinchhan hauh lova mahni ke ngeia dingchhuakin, zalenna kawng zawh a lo nih dan a sawi a.Mahni tana huamhapna thinlung pu lo, he ram zalenna tura inpe pumhlum Pu, Mahatma Gandhi, Pt.Jwaharlal Nehru, Sardar Vallabhai Patel, Maulana Abdul Kalam Azad leh mihuai kal hmasa te chu hriat reng an ni tiin an phu ang chawimawina ropuina dawng hman lova mual liam ta sipai huaisen leh zalenna sual chhuak tura rilru leh tha zawng zawng seng raltute zahna chibai a buk thu a sawi.

Mipui himna leh hlimna turin sorkar chuan dan leh thupek kenkawh angai pawimawh dan te,tunah chuan State ralmuang ber te zinga chhiar tel kan lo nih dante sawiin khuallian chuan Mizoram Police te ti chak turin hmasawnna ruhrel tam tak din mek a nih dan leh Economic Survey 2014-15 in atarlan dana NLUP hmasawnna kawngah rah tha a chhuah dan a sawi a.Economic Survey vek hian tlang ram Lo neih (Jhum Cultivation) chu zazela 21 in a ti tla hniam a ti bawk.NLUP Implementing Board chuan tharchhuah dehralna tur market a ngaihtuah a, abikin Sawhthing leh Aieng thawnchhuah dan tur a duang mek a, hralh atan aieng leh sawhthing tam tak thawnchhuah a tum thu sawiin Mizoram sorkar ruahmanna thar New Economic Development Policy (NEDP) Comprehensive Growth Straegy for Mizoram a duan mek dan leh sorkar Kumin sorkar kum chhung hian NEDP hnuaia Annual Action Plan 2016-17 chu kalpui tan tur niin sum cheng nuai 25000 dah a nih thu a sawi bawk. Pu C Ngunlianchunga chuan Broad Gauge Railway Map ah Mizoram chu tarlan alo ni ve ta a, Broad Gauge Passenger Train pawh May 27,2016 khan Prime Minister Narendra Modi an Video Conference kaltlangin a vailiam tiin 60 MW Tuirial Hydro Electric Project pawh peih fel tep tawh niin hnathawk thei tura hawn thuai ani ang a; State chhung hmun hrang hrangah hetiang hna hi 13 thawh mek awmin 2016-17 ah zawh fel tum a ni a. Rural Electricity Distribution Backbone (REDB) hnuaiah Kolasib, Bairabi, Vairengte, Thingsulthlian, Mamit,W.Phaileng, Zamuang, Champhai, E.Lungdar,Tlabung, Hnahthial leh Tuipang V ah te kawlphetha semchhuahna hmun neih mek anih dan leh Public Health Engineering Deptt. Chuan kum 2015-16 chhungin khaw 31 ah Tui thianghlim in tur pek a tum a; an zinga khaw 28 a tuam tawh a nih thu a sawi a.

Mizoram sorkar chuan Health Care Scheme leh Damdawiin tih len tih changtlun leh mipui ban phak a chhawpchhuah angaipawimawh hle tiin State Referal Hospital Falkawn siam that hnathawkin Mizoram Institute of Medical Education & Research (MINER) din hna a buatsaih mek dan leh Sorkar chuan thingtlanga cheng te tello in State in hma a sawn theilo tih a hria a; MGNREGS chuan thingtrlang mipui inhlawhna tha tak siam sakin April 1,2016 atang khan an ni khat chu Rs.183/- atangin Rs.188/- ah tih pun a ni a, ramri hrula cheng te tan BADP hmangin hna a thawk chhunzawm zel a nih thu leh Forest Survey of India in a tih chhuah( Indian State of Forest Report 2015) in atarlan danin Mizoram zau zawng teh a zaa 91.47 hi Thingkungin a khuh a ni a ti.

Sorkar laipui a ministry of Tribal Welfare chuan Tuipang ah hian Eklavya Model Residential School din turin cheng vaibelchhe 16 a pawmpui tawh a; Hemi atan han cheng vaibelchhe 7 pawh a rawn release fel tawh a a rang thei ang bera hnathawh tan tum a ni a. Hetah hian zirlai mi 200 tan zirlaibu, Uniform leh a thlawn a, Hostel a awmna man zawng zawng pawh sorkar laipui hian a tum vek dawn a ni a ti b awk.

Khuallian Pu C Ngunlianchunga chuan, sorkarin ram leh mipui tana a thil tum hlenchhuak tura tiamchin lam apan mekna kalkawnga tanpuitu, Mizoram sorkar hnathawklte leh Thuthar thehdarhtute, Kohhran hote leh Tlawmngai Pawl te, Mizoram mipui zawng zawng hnenah lawmthu a sawi a. Kum lo kal zel tur ah pawh hei aia nasa zawka sorkar thlawp a thawhpui zel tura a beisei thu a sawi bawk.