No.4122/2020-2021

Dated Champhai, the 15th August, 2020: Vawiin khan Champhai Bawrhsap Pisa tual Keifangtlangah India ram zalenna ni Independence Day vawi 74-na lawmna hun hman a ni. Champhai district-a a lawmna pui berah hian Pu Lalruatkima, Rural Development, Information & Public Relations leh Land Revenue & Settlement department changtu Minister chu khuallian a ni a. Khuallian hian hnam puanzar pawtpharhin Police contingent chibai bukna a chhanglet a ni. He hunah hian Champhai DC Pi Maria C.T Zuali, SP Pu Rex Zarzoliana Vanchhawng, sawm bik Sawrkar Official, NGO hotute leh Chanchinbumite an tel a ni.

Khuallian Pu Lalruatkima chuan Independence Day 2020 lawm tura kal zawng zawngte chibai bukin, India ramin zalenna a neih theihna tura nun hlantute, an thatlai hun zawng zawng lung ina hmang ralte leh tharum thawhna tel lova zalenna sual chhuaktute zahna chibai a buk a. Khawvel pumpui tuam mektu Covid-19 hripui doletna kawngah sawrkar duan inkaihhruaina leh mithiamte thurawn ngaih pawimawha zawm tlat chu himna anih thu sawiin, Covid-19 mai baka khuarel chhiatna thleng thin avanga in leh lo, rohlu leh nunna hial chante a tawrhpui tak meuh thu leh sawrkar laipui, state sawrkar leh pawl hrang hrangin harsatna tawh mekte sukiang turin theihtawp an chhuah mek zel a ni, a ti a.

World Health Organization-in March ni 11, 2020 a khawvel tuam chhuak hripui ‘pandemic’ a a puan Covid-19 do kawngah Mizoram sawrkarin rang taka hma a lak nghal vat thu sawiin, State Level Task Force, District Level Task Force leh Village/Local Level Task Force on Covid-19 te din nghal a ni a, hripui kaihhnawih peng hrang hrangte buaipuia hmala turin Task Group engemawzat Sawrkar chuan a din nghal bawk a ni, a ti a. I&PR Minister chuan Covid-19 hripui leng tur ven leh beihletna kawnga Mizoram hmalaknate langsar zualte tarlangin, Mizoram chu India ram state-te zinga inkharkhip puang hmasa berte zinga mi a ni a, Disaster Management Act, 2005 tlawhchhanin hri kai leh pudarh thei mihring an lo luh loh nan Mizoram luhka zawng zawng leh Lengpui Airport te chu March ni 23, 2020 khan khar nghal vek a ni, a ti a. April ni 4, 2020 ah Zoram Medical College (ZMC) Hospital chu Dedicated Covid Hospital atan puan niin, ICMR pawmpui Covid-19 RT-PCR Testing Laboratory pawh ZMC ah April ni 7, 2020 ah din fel a ni a, district tinah Covid-19 test tih theihna tur PCR TrueNAT laboratory din turin sawrkar chuan chak takin hma a la mek zel a ni, a ti a. District tinah Covid-19 veite enkawlna tur Covid Care Centre leh Dedicated Covid Health Centre-te siam anih thu leh District Hospital zawng zawng chu Sample Collection Centre ah puan a nih thu a sawi a. Covid-19 laka Mizoram himna tur leh hripui darh zel tur ven nan 'The Mizoram Epidemic Diseases (COVID-19) Regulations, 2020' leh The Mizoram (Containment & Prevention of COVID-19) Ordinance, 2020 te siam a nih thu a sawi bawk.

Khuallian Pu Lalruatkima chuan Champhai district chhunga sawrkar hmalakna hrang hrangte he hunah hian tarlangin, mipuite hriselna kawnga pawimawh tak Dialysis Unit, High Dependency Unit (HDU) leh Oxygen Generating Plant-te District Hospital-ah bunfel niin mipuiten tangkai taka an hman mek thu leh Trauma Centre building pawh sak mek anih thu a sawi a. Nursing School Building khum 40 awmna chu Covid-19 veite enkawlna bik Dedicated Covid Health Centre atan hman mek a ni, a ti a. June ni 21, 2020 leh a hnu lama lirnghingte avanga mipui manganna leh rilru lama harsatna tawhte sutkian nan DM&R Department leh MZU (Psychology Department) tangkawpin Champhai leh Serchhip district-a khaw 30 vel chu tlawhchhuakin clinic an buatsaih a, DM&R lam mi thiam ten awareness campaign khaw 15 ah neiin Search & Rescue equipment leh First aid kit-te Village Disaster Management Committee-te kutah an hlan mai bakah H&FW Department atangin daktawr team pathum a inthenin lirnghing avanga harsatna tawkte a tul ang anga tanpui turin an thawkchhuak bawk a, a tul huna chechhuak thei turin State Disaster Response Force (SDRF) te pawh Dungtlang-ah dah an ni, a ti bawk.

Mizoram mipui zatve aia tam mahte innghahna Agriculture kaltlangin thlai chin dan, thlai chi mamawh zat, rannung leh thlai eichhetu laka thlai humhim dan leh thil pawimawh dangte hriat zung zung theihna Mobile Application 'Loneitu' siam a ni, a ti a. Border Area Development Programme 2020 hnuaiah khaw 49 te BADP operating area an rinluh belh tura ruahmanna siam anih thu leh Pradhan Mantri Krishi Sinchayee Yojana (PMKSY) chu district pariat a khaw 57 ahte kalpui mek niin, kuthnathawktu 6,037 te tana hamthatna tur ruahtui khawlna tur tuizem 2,818 siam zawh tawh anih thu a sawi a. Champhai RD Block hnuaiah kum 2019-2020 chhungin khaw 34 awmin Job Card 11,448 pek chhuah a ni a, thingtlang mite inhlawhna scheme, MGNREGS kaltlangin mi pakhatin ni khatah Rs. 211 an hlawh thin thu a sawi bawk.

I&PR Department kaltlangin Champhai District MJA member ten kumin February thlaah Tlawva Mini Hydel Project leh Khawbung RD Block, Champhai District chhunga sawrkar hmalaknate an tlawh kual thu sawiiin, sawrkar thupuangtu I&PR chu Covid-19 hripui leng dona kawngah a tir atangin a hmatawngah tangin Department-in social media account a neihte chu mipuite hnena Covid-19 chungchanga hriat tur pawimawh hrang hrang hriattir nante, thuthang dik lo leh ngaihdan dik tawk lo chi hrang hrang hai lang a, a dik zawk puanzar kawngah tangkai takin hman thin a ni, a ti a. Kum 2019-2020 chhungin Land Revenue & Settlement Department chuan State’s Own Tax hnuaiah Rs. 7,24,00,620 leh State’s Own Non-Tax Revenue hnuaiah Rs. 1,56,939 a khawnkhawm thu leh lang tlang taka hnathawh anih theih nan e-Ram Software siam anih thu a sawi a. Survey, allotment leh settlement of land kalphung awlsam zawk nan leh ram inchuh chinfel chungchangah te, chhiahchawitute tana phurrit awm thin chhawk zangkhai turin ‘The Mizoram (Land Revenue) Act, 2013 leh ‘The Mizoram (Land Revenue) Rules, 2013 te chu a tul anga siam that a ani, a ti bawk.

Ministry of Tribal Affairs hnuaia Vandhan Scheme kaltlangin Co-Operative Societies pahnih, Champhai Town Multipurpose Co-operative Societies Ltd. leh Hnahlan Grape Farming & Processing Co-operative Societies Ltd. te din niin, Champhai District Milk Producers Co-operative Union Ltd. pawh ARCS Champhai enkawlna hnuaiah tuaithar leh a ni, a ti a. School Education Department hnuaiah Champhai District Education Officer’s Quarter sak zawha luahfel tawh niin, Education Training Centre kum 2018 atanga sak tan pawh zawh thawkhat a ni, a ti a. Zokhawthar leh Dungtlang Police Outpost-te Police Station puitlinga hlankai an nih thu leh Cyber Crime Police Station pawh Champhaiah hawn thar ani, a ti a. Myanmar nena inkalpawhna tur kawngpui leh leidawh turte sawrkar laipuiin a ngaipawimawh em em a, a tul anga hmalak mek zel tum a ni, a ti bawk.

Jal Jeevan Mission (JJM) hnuaiah PHE Department in 2019-2020 chhungin khaw hrang hrang 228 a in 15,941 ah tui herh haw theihin a siam a, Swachh Bharat Mission (Gramin) hnuaiah hian National Highway paltlang khaw hrang hrangah vantlang inthiarna 313 sak zawh a ni bawk a, bawlhhlawh paihna 169, plastic leh bottle lakkhawmna hmun 308 sak zawh niin plastic bailing machine 6 lei a ni bawk, a ti a. NABARD hnuaiah ni zung chakna hmang chi 2 telin water supply scheme 7 thawh zawh hman niin, khawpuiah tui connection thar 1,02,020 pek niin thingtlangah tui connection thar 28,714 pek a ni, a ti bawk.

Environment, Forests & Climate Change department kaltlangin National Afforestation Programme, Climate Change, Green India Mission , Forest Fire Prevention & Management Schemes, Preservation of Wildlife and Biodiversity, Green Mizoram Programme leh Compensatory Afforestation Fund Management & Planting Authority-te inkahrkhip lai pawha kalpui reng a ni, a ti a. Sports & Youth Services Department chuan infiammite cho phurna atan state sawrkar hnuaia Group B, C & D post hna ruak, direct recruitment quota 5% thleng infiamna lama mi hmingthate tan a hauhsak a ni, a ti bawk.

Champhai district mipuite chu Mizoram tih hmasawn mai bakah thlak danglama, rahbi thara chuankaipui thei tura theihtawp chhuahpuiah sawmin, sawrkar department ten mipuite hmasawnn leh changkan theihna turin theihtawp an chhuah ani tih hriatpui turin a chah a. Covid-19 hri leng hmachhawn kawngah tupawh inralrin reng a tul thu sawiin, hriselna, ei bar zawnna, zirna, ei in leh ni tin mamawh bungrua, inkal pawhna kawngpui leh venhimna lamte ngaihtuah tel zel chunga tanrual a ngai takzet a ni, a ti a. Covid-19 hripui leng do kawnga thehnemngai taka theihtawp chhuaha beitu hrang hrang sawrkar hnathawk, Village/Local Task Force, kohhran leh tlawmngai pawlte, police leh sipaite chungah lawmthu sawiin, hun khirh tak tawn mek laia ral hmatawnga awm damlo enkawltute, sample la a fehchhuak thinte, laboratory hrang hranga rim taka chawlh pawh nei lova sample test hna thawktute leh Covid-19 Volunteer-te chungah a bik taka Zoram mipui an lawm thu leh thahnemngai taka CM Relief Fund-a phal taka sum thawhtute chungah sawrkar aiawhin lawmthu a sawi nghal bawk a ni.

Khuallian chuan mipuite chu zalenna sualtu mi huaisen leh ram kalphung siam thatute hmathlir chawinung leh vawnghima tipuitling zel tura sawmin, an thisen leh thlantui a thlawnin i luan raltir lo ang u, a ti a. Mizoram hmasawnna bakah, remna leh muanna vawng nung zel kawngah rim tak leh huaisen taka thawk zel turin a sawm a. Champhai district in tunhnaia lirnghing vanga chhiatna a tawk chu sawrkarin pawi a tih thu leh a tuarpui takzet thu sawiin, a tul angin hma a lak zel thu a sawi a. Champhai district chu Mizo te tana hmun hlu tak, kan pi leh pute sulhnu tam tak awmna anih avangin rohlute hi a ri ral loha chhuan lo la awm zel tur ten an rawn hmuha an hlut ve theihna atan venhim kawngah theihtawp chhuah turin district mipuite a sawm nghal a ni.

I&PR Minister hian Independence day lawmna hun a hmanpui zawhah MJA Press Club Champhai Bethel Veng a tlawh a. Press Club changtlung tak an nei thei chu chhuanawm tiin, Covid-19 vangin hmasawnna leh mamawh angte duh angin a thawh chak theih loh a, a tul ang zela hmalak a ni, a ti a. Sawrkarin chanchinbumite a ngaipawimawh a, an hamthatna leh mamawhte a ngaihtuah zel thin a ti bawk.

Covid-19 hrileng dona kawngah sawrkar thupuang I&PR leh Media ten mipuite thudik hrilh kawngah thahnemngai taka an thawh thu sawiin, inkharkhip avanga chhuanchham awm loh nan NGO, Kohhran leh khawtlang hruaitu ten theihtawp an chhuah thin chu fakawm a ti a. Covid-19 hrileng kara mizo nunmawi tak rawn lang chu entawntlak hle a a hriat thu a sawi bawk. Hripui do kawnga sawrkar hmalaknaah sawrkar tha taka tawiawm chhunzawma, thurawn pe thin turin a sawm nghal a ni.