No.4123/2020-2021

Siaha, August 15: Vawiin chawhma dar 10 : 00am khan District Bawrhsap Pisapui tual zawlah India Independence Day vawi 74-na chu urhsun taka lawm a ni. He Ni lawmna-ah hian Dr K. Beichhua, Minister of State i/c SWD,AH&Vety etc. chuan Khuallian niin Hnampuanzar pawtparh in Guard of Honour Contingent te chibai a chhanglet. Independence Day thuchah sawiin Minister chuan vawiin Independence Day ropui taka kan lawm theih nan a thisen leh thlantui tam tak nen lo beitute zahna chibai a buk hmasa a, ram leh hnam tana an inpumpekna leh hmangaihna thinlung chhuanawm tak kha i hre reng ang u.Vawiin Indian Independence Day pawh hripui hlauhawm Covid-19 vangin duhthusamin hmang thei loh mahila, mitin thinlungah erawh kan zalenna hi a tharin i vawng nung zel ang u, a ti.

Khuallian Pu Beichhua chuan sawi chhunzawmin, Mizoram sawrkar flagship programme SEDP pawh hripui karah duh angin hmalak a thei rih lova, mahse chuti chung chuan a rem remah erawh hmalak mek a ni tiin, tun atanga reilohteah chak taka hmalak vat kan tum a ni, a ti. Hripuiin kan nitin khawsak phung leh kan economy pawh nasa takin a nghawng a, chumi lak atanga Siaha District mipuiten kan lo inhmakhuah vehna tur leh a hnu lamah hun khirh zawk la tawng zel thei kan ni tih hre chungin Siaha District Covid-19 Food Security Consultative Committee pawh din a lo ni tawh a, hemi hnuaiah hian MADC a kan hotute, DC Siaha te, Department hrang hrang a kan hotute leh joint VC te nen thukhat vuanin lungrual takin kan phak tawkah hma kan la mek zel a ni, a ti bawk.

SEDP pawh hlawhtling taka kalpui kan tum a, hei hian hmasawnna ki peng pawimawh tin hawlkimin, Mizoram chu State intodelh, a rama cheng mipuite khawsak changkang leh khawtlang nun nuam siam kan tum dawn a ni, a ti a. Kum 2019-2020 chhung khan Budget pumpui cheng vaibelchhe 750 atangin cheng vaibelchhia 561.62 chu department hrang hrangah sem zai tawh a ni a, hripui leng karah pawh SEDP Board ten chawl lovin hna an thawk mek zel a ni, a ti. Health & Family Welfare kaltlangin Aizawl, Lunglei, Siaha, Lawngtlai, Serchhip, Champhai leh Kolasib Hospital-ah te Trauma Centre sa tura hmalak mek a ni a, Higher & Technical Education Department chuan zirna sang zawk tihhmasawn nan RUSA hnuaiah Pukpuiah Mizoram Engineering College din a ni a, College 13 te hnenah infrastructure grant pek a nih bakah Goverment Saiha College, Siaha, Hnathial College, J. Thankima College leh Mamit College te chu Model Degree College a siam turin hmalak tawh a ni bawk a, kum 2019-2020 chhungin College building 19 lai Higher & Technical Education Department hnuaiah sak a ni tawh bawk.

Ministry of Panchayati Raj puihnain Local Administration Department chuan RGSA chu a kalpui a, kum 2019-2020 chhungin Mizoram tan cheng vaibelchhe 13.585 lai sanction a ni a, Finance Ministry chuan Sixth Schedule Area pawn khua Village Council te tan cheng vaibelchhe 16.24 lai pe chhuak in, Autonomous District Council area pathum chhunga Village Council te tan cheng vaibelchhe 93 lai a lo sanction tawh bawk a ni, a ti.

UD&PA department hnuaia PAHOSS (Parking House Support Scheme), Atal Mission for Rejuvenation and Urban Transformation (AMRUT) te, Housing for All Scheme te, Smart Cities Project te chu chak taka hmalak mek a ni a, Thosai khuaa Artificial Turf phahna tur Rs.420 lakh pawh pawmsak kan ni tawh bawk a ni, a ti. Rural Development Department hnuaia hmalakna hrang hrang MGNREGS hnuaia kum 2019-2020 chhungin chhungkaw 200150 te tan inhlawhna siamsak a nih bakah inhlawhna rate cheng 211 ni thin chu cheng 225 a tihsan a ni tawh bawk a, Border Area Development Programme, 2020 hnuaiah khaw 49 chu BADP Operating Area chhunga rinluh belh an ni dawn a. Food Civil Supplies & Consumer Affairs Department hnuaia AAY chhungkua 26013 te hnenah Chini 1Kg @ Rs.24/- in sem chhunzawm mek a ni bawk.

Social Welfare Department hnuaia Eklavya Model Residential School (EMRS) kalpui mek pahnih kan neih a, pali dang saklai mek a awm bawk a, chung zingah Tipa pawh a tel a, a sakna tur Project Estimate hi Rs.1600 lakh theuh a ni a ti a, kum 2019-2020 chhungin pahnih dang sak belh tur niin, vanneihthlak takin kan District a No-aotlah khua pawh a tel a ni, a ti. Centre of Excellence for Sports chu India ramah State pahnih Tamil Nadu leh Mizoramah din tura phal a ni a, vanneihthlak takin kan District chuan kan chang ve dawn a, Thosai khuaa sak tura dil mek a ni a, hlawhtling ngei tura beisei a ni bawk. Special Central Assistance to Tribal Sub-Scheme (SCA to TSS) hnuaia project hrang hrang Ministry of Tribal Affairs hnuaia hmalak mek zingah Construction of Mara Tribal Girls' Hostel at Lunglei, Rs. 210 lakh, Improvement of District Veterinary Infrastructure at Siaha tan Rs. 100 lakh te leh Preservation of Heritage Land at Saikao tan Rs.560 lakh te a tel a ni, a ti.

AH&Vety Department chuan Mizoram State chu Sa a kan intodelh theih nan hmachhawp lian tak neiin theihtawpin hma lak mek a ni a, NLM (National Livestock Mission) atangin Backyard Goat Development Scheme hnuaiah mi sawm hnenah Kel vulh tanpuina pek ni tawhin, Backyard Piggery Development Scheme hnuaiah mi 20 te hnenah Vawk vulh tanpuina pawh pek tawh an ni. Tin, Fodder Development, Ranchaw tharchhuah te sengna tur atan Rs.80.46 lakh hman tawh a ni a, Ranchaw tharchhuahte sengna tur leh dahthatna tur hmanrua leina tur pawh pek leh tura hmalak mek a ni bawk, a ti. Article 275(1) atangin Rural Animal Health Centre (RAH) Chapi khua leh Chhaolo khuaah Rs. 16 lakh senga sak niin, Siaha AH&Vety Farm pawh Rs. 100 lakh hmanga chei thar mek a ni a, RIDF (NABARD) atangin Veterinary Hospital Rs. 85.50 lakh senga sak mek niin, DVO Quarters thar pawh Rs. 76.50 lakh senga sak mek a ni bawk. RAH Centre No-aotlah chu Rs. 16 lakh sengin sak a ni a, Pig A.I. (Vawk kah rai) bultanna chu 10.7.2020 ah neih a lo ni tawh a, Cattle A.I. (Bawng kah rai) pawh Bawng chi tha hmanga kalpui mek a ni bawk a, RAH Centre Zyhno khua a mi pawh Dispensary a hlan kai a lo ni tawh bawk a ni, a ti.