No.4124/2020-2021

Lawngtlai, Thlazing ni 15, 2020: India ramin zalenna a hmuh ni vawi 74-na chu ram chhung hmun dangte rualin vawiin khan Lawngtlaiah pawh urhsun takin lawm a ni a. A lawmna pui ber Central YLA khelmuala buatsaihah Health & Family Welfare, etc. Minister Dr R. Lalthangliana chu Khuallian a ni.

Zing ni chhuah rualin sawrkar pisa leh hmun pawimawh dangah te India hnam puanzar zar a ni a. Zing dar 8:00-ah CYLA Playground-ah Khuallianin hnam puanzar pawt pharhin, zahna chibai a buk a, Independence Day thuchah a sawi nghal a ni.

Khuallian Dr R. Lalthangliana chuan pung khawmte leh Lawngtlai District mipuite chu zalenna chibai bukin, India ram zalenna atana beitu hnam pasalthate hre renga zahna chibai buk thar tur leh an thisen leh thlantui hmanga an valh sa India ram ropui nan leh hmasawn zel nan theih tawp chhuah turin a sawm a. Mizoram hmun hrang hranga COVID-19 hri leng leh lirnghing leh chhiatna dang thlengin a nghawngte a tuarpui thu a tar lang bawk.

Health Minister chuan COVID-19 dona kawngah Mizoram chu India rama state leh UT zawng zawng zinga ti tha ber (best performing state)-a thlan a nih thu sawiin, Pathian hna thawh a nih rualin sawrkar, tlawmngai pawl, kohhran leh mipuite tan rualna rah a nih thu a sawi a, COVID-19 dona kawnga sum leh pai leh tha leh zung leh tawngtaina hmanga theih tawp chhuahtu ram mipui zawng zawng chungah lawm thu a sawi nghal a. COVID-19 hri kai leh kai lo en fiah nan district tinah TrueNAT Quattro laboratory din tura hma lak niin, August thla chhung hian hman kim theih beisei a nih thu a sawi.

Health & Family Welfare Department hnuaiah District Hospital Lawngtlai building thar, IPD khum 50 awmna tur leh quarters unit 27 sak thar chu August ni 14, 2020-a hawn a nih thu leh, Sangau PHC building sak that hna thawh mek a nih bakah, Bualpui NG PHC building thar sak hna pawh thawh thuai tum a nih thu sawiin, Sub-Centre eng emaw zat Health & Wellness Centre-a hlan kai a nih tur thu a sawi a. Govt Lawngtlai College-a thawk tur zirtirtu lak belh tura hma lak mek a nih thu a sawi bawk.

Khuallian chuan Mizoram leh Lawngtlai District hma sawnna hrang hrang tar langin, sawrkar flagship programme Socio-Economic Development Policy (SEDP) kalpuina turin kum 2019-2020 sawrkar kum chhungin budget pumpui Rs vaibelchhe 759 atangin Rs vaibelchhe 561.62 chu Department hrang hrangah sem a nih thu leh hripui lengin harsatna a siamsak chung pawhin SEDP hlawhtlinna turin SEDP Board-te’n chawl lovin hna an thawk tih a sawi a. Ram hmasawn nan ruahmanna hrang hrang siam chhoh mek a ni, a ti.

Kumina Independence Day lawmna hi COVID-19 hri leng vangin kum dang angin hman theih a ni lo va. Sawrkarin a ruahman angin sikul naupang leh mipui nawlpui tel lova hun hman a ni a. Hei vang hian Lawngtlaia Independence Day 2020 lawmnaah pawh hian guard of honour petu Mizoram Police leh Mizoram Armed Police inpawlh contingent khat chauh awmin, ceremonial parade neih a ni lo.

Independence Day 2020 pual hian a hnuaia mi ang hian chawimawina leh lawmman hrang hrang sem a ni a, Khuallian Dr R. Lalthangliana chuan a dawngtute kutah a hlan hlawm a ni.

1. HSSLC Toppers:
i) Lalrintluangi d/o MC Lalrokhuma, Lawngtlai-III - Commerce-a 2-na;
ii) Lalremruatmawia s/o L. Lalthanzauva, Sangau - Commerce-a 5-na;

2. Lalngheta Ralte, Correspondent, AIR - AIR news nei tha Weekly Award & Monthly Award dawngtu;

3. Quarantine Centre volunteers:
i) Daisy Vanlalliandingi
ii) Ellen Grace Chinzah
iii) HC Zonuntluangi
iv) H. Lalhmangaihpuii

4. District Hospital volunteers:
i) A. Lalzaidama
ii) Andy HC Zoramdina
iii) C. Lalvenhima
iv) Deborah J. Fanchun
v) F. Lalhruaisanga
vi) F. Lalthlangliani
vii) Lalngaizuali
viii) Lalruatkimi
ix) Lalsangzeli
x) NC Bawihlunthanga
xi) Priskil Vanlalpekhlui
xii) Sarah Lalhlunpuii

5. Samagra Shiksha Nutrition Garden:
i) Govt Bualpui Middle School - 1st Prize
ii) Mampui Primary School-I - 2nd Prize
iii) Cheural Middle School-I - 3rd Prize
iv) Sikul 5 hnenah - Consolation Prize

Vawiina Lawngtlaia Independence Day lawmnaah hian Lawngtlai East bialtu MLA/Agriculture Development Board Vice Chairman Pu H. Biakzaua, Lawngtlai West bialtu MLA Pu C. Ngunlianchunga, Health & Family Welfare Department Secretary Pu H. Lalengmawia, Lawngtlai Bawrhsap Dr Andrew H. Vanlaldika, LADC Chairman Pu V. Zirsanga, Hospital & Medical Education Director Dr T. Lalhmangaihi te bakah, LADC-a member eng emaw zat, state sawrkar department official-te, political party leh tlawmngai pawl ai awh te an tel a. COVID-19 hri leng vangin kum danga neih thin VIP At Home erawh buatsaih a ni lo.

Kumin Independence Day pual hian Lawngtlai District Independence Day Celebration Committee chuan District Hospital Lawngtlai, Christian Hospital Lawngtlai, Lairam Christian Medical Centre & Hospital, Lairam Motherless Home leh District Jail-ah te tanpuina Rs 2,000/- theuh an hlan a ni.