765/2023-2024

Champhai, the 12th June, 2023: Jail leh inkhunghranna hmun hrang hranga awmte'n hriselna tha an neih theih nan leh, hri inkaichhawn theihte laka inven nana heng hmuna awmte dinhmun enfiah kawnga beihpui thlakna, 'Integrated STI, HIV, TB and Hepatitis (ISHTH) Campaign' June thla chhunga Champhai District-a kalpui tur chu vawiin chawhma dar 11:30 khan District Jail Champhaiah Bawrhsap Pu James Lalrinchhana'n a hawng.

District Bawrhsap Pu James Lalrinchhana chuan inkaichhawn theih natnate Jail leh inkhunghranna hmun hrang hrangahte a darh loh nan June thla chhungin Integrated STI, HIV, TB and Hepatitis (ISHTH) Campaign, Champhai District-ah kalpui tum a nih thu sawiin, heng hmuna awmte hriselna chu Sawrkarin a ngaihpawimawh a, enkawl zui ngaite pawh ngaihtuah chhunzawm tum a ni, a ti a. Kalkhawmte chu natna inkaichhawn theih laka fimkhur turin a fuih a. Jail tangte chu an nun hluite avanga lungngai mai lo tur leh insiamthatna hmun atana Jail hmang tur te, taksa, rilru leh thlarau lam hriselna ngaipawimawh turtein a fuih a. Nun thar nei tura beiseina nei tlat tur leh khua leh tui tha leh chhawrnahawm, khawtlang, ram leh kohhran tana tangkai tak nih tum theuh turin a chah bawk a. Campaign kalpui tur chuan target group-te hriselna mai bakah thiamna leh finna a pek dawn avangin rah tha a chhuah ngei a beisei thu a sawi bawk.

He hun hi Pi C.Ramdinmawii, Asst. Director, (Food & Drugs) CMO Office Champhai chuan kaihruaiin kalkhawmte lawmna thu a sawi a. Dr. P.C Lalawmpuia, District Viral Hepatitis Control Officer-in TB, HIV leh Hepatitis natna awmzia, lan chhuah dan, enkawl dan leh inven dan chungchang zirtirna a pe a. Pu Lalthlamuana Ralte, District ICTC Supervisor-in ICTHS Campaign awmzia a sawifiah bawk a. Pu T.Lalnunsanga, Project Field Officer, FHI in lawmthu sawiin hun hman a khar a, he mi hnu hian Jail-a awmte hriselna endik hna kalpui a ni.

Integrated STI, HIV, TB and Hepatitis (ISHTH) Campaign hi a tum khatna tur a ni a. Ruahman dan chuan Champhai khawpui chhunga District Jail bakah Home hrang hrang leh inenkawlna hmun thlan chhuah 11 ahte ISHTH Campaign hi kalpui tum a ni a, hriselna kawnga thiam bikna neite'n hriselnate endikin test tul angte leh councelling-te pawh an nei zel dawn a. Damdawi hmanga enkawl tul angte pawh buaipui tum niin, inzirtirna hunte hman zel tum a ni bawk.