764/2023-2024

Aizawl, the 12th June 2023 : Vawiin khan EF&CC Minister Pu T.J Lalnuntluanga chuan Green GAC Day, 2023 chu Govt. Aizawl College, Mualpui Campus ah hawngin, Pu Lalbiakzuala, Principal chuan lo dawngsawngin, Green GAC Day hawnna hi College Conference Hall ah neih a nih hnuah Minister hian hemi ni pual hian Campus chhungah thing a phun nghal a ni.

Minister Pu T.J LAlnuntluanga chuan kan chenna leh kan chhehvel vawnhim kawnga thil pawimawh tak thingphun ngai pawimawh a, Green GAC Day buatsaih a ni chu Govt. Aizawl College hotute chungah lawmthu sawiin an remhria a tih thu a sawi a. Mizoram sawrkar chuan Kum 1999 atangin Green Mizoram Day chu June ni 11
ah hmangin tun kumah erawh June ni 9 ah District hrang hrang-ah Department hrang hrang ten hlawhtling taka hman a ni, a ti a.

Tlawmngai pawl, thalai leh zirlai te thinlungah thingphun pawimawh zia a thawk na em em a, hma pawh zoramin a sawn nasa a forest cover 84.5% hial kan lo nei ta a ni tiin a sawi a. Vawiin a Govt. Aizawl College campus chhunga thingphun hian rah tha tak chhuah se, kan thingphunte enkawl zui a awmze nei a phun a ngaih thu sawiin, tui hna a lo pun a, boruak thianghlim kan neih nan bakah Sava leh ransa te chhena tur ramngaw kan siam zel kawngah a sulsu tu ni se, campus chhung boruak thianghlim leh tha bakah Aizawl chawm tur boruak tha siam tu thingphun uar zel turin leh enkawl zui turin zirlai kalkhawmte a sawm a ni.
Minister chuan kan rama boruak tha leh thianghlim hi sum thawhchhuah nan kan hmang thei a ni tih hria a, khawvelin a buaipui em em 'carbon credit' hmangin ram hmasawnna tur sum kan thawkchhuak thei a ni tih hre thar ila, tha thlah lovin thingphun uar leh enkawl zui chungchangah tan la sauh sauh turin leh tluang taka Green GAC Day, 2023 puala kalkhawm zirlai leh college zirtirtu zawng zawng hnenah duhsakna a hlan a ni.

GAC Principal Pu Lalbiakzuala pawhin thu tawi sawiin EF&CC Minister in a chah angin vawiina thingphun te chu enkawl zui an nih tur thu sawiin, hemi kawngah hian NCC ten mawhphurhna an lak tur thu a tarlang bawk a ni.

Green GAC Day-ah hian thing chi hrang hrang kung 200 chuang phun a ni dawn a ni.

Govt. Aizawl College, Mualpui Campus ah hian zirlai 2260 vel awmin, teaching staff 60 leh non-teaching staff 20 vel an awm a. Mualpui Campus bakah Sikulpuikawn ah Campus neiin, BA nakah Education Deparment-ah MA zirna a awm a. Mualpui Campus hi kum 2021 ah luah tan a ni a, nature park te pawh siam a ni.