Champhai District Task Force for Immunization (DTFI) buatsaihin Intensified Mission Indradhanush (IMI) thawh hnihna chu vawiin khan Tlangsam Health Sub-Centre-ah Dr. Lallawmkima, DIPRO Champhai chuan  Undivided Champhai District-a kalpui tan theih turin a hawng.

Dr. Lallawmkima chuan Sawrkar laipui hmalakna hmanga hriselna kawnga bung thar kaina tur Intensified Mission Indradhanush 2.0 kalpui ani leh tur chu lawmawm a tih thu a sawi a. Nu naupai leh Naupangte’n hunbi neia natna laka invenlawkna vaccine bikim an lak chu thil pawimawh tak anih thu sawiin,  Undivided Champhai District puma IMI 2.0  kalpui tur hawnna hun, Tlangsam khuaa buatsaih ani chuan hriselna kawnga sawrkar hmalakna hi mitinte tana chhawpchhuah anih zia tilangtu a ni, a ti a. Nakin lawka natna khirhkhan tak takte kan tawh lohna tur leh inenkawlna senso tam tak  pumpelh theihna turin invenlawkna lak chu a finthlak hle a ni, a ti a. Undivided Champhai District chhungah Intensified Mission Indradhanush (IMI) 2.0 tangkai, huapzo leh hlawhtliang taka a kalpui anih  theihna tura duhsakna hlan chungin a hawng a ni.

He hun kaihruaitu Dr R.Lianmawia, District Immunisation Officer (DIO) chuan IMI 2.0 chu chhan hrang hrang vanga vaccine la lo leh hmaih palhte tana thual nawn lehna a nih thu a sawi a. Sawrkar hmalakna hmanga mipuite tana hriselna kawnga hamthatna a thlawn liau liau  chhawpchhuah chu a dawng tur te’n dawng vek se a lawmawm hle dawn a ni, a ti a. Vaccine lak tangkaizia tarlangin, Champhai District-ah chuan kum 2015 atang khan Sakawrekhrik natna Tetanus avanga naupang thih thinna chu ngaihmawhawm a ni tawh lo a ni, a ti a. Vaccine pek beihpui chak leh huapzo zawka kalpui anih theihna turin mipuite tawiawmna leh thlawpna a ngen nghal bawk a ni.

Dr. Samuel Laldinthara, DPM   chuan  IMI 2.0 kalpui tura hmalakna leh hmachhawpte tarlangin, IMI 2.0 chu round li a  kalpui tum a ruahman a ni a,  a hawnni December Ni 2, 2019 leh January Ni 6, February Ni 3, March Ni 2, 2020-ah te neih tum niin, round tin hi ni 7 zel awh  tur a ni, a ti a. IMI hmangin  Naupang leh Naupai Vaccine la ngai lo te, la chhunzawm lo/a bi kima la lo te, hmaih palhte zawnchhuaha Vaccine pek vek tum anih thu leh,  Champhai District-ah IMI 2.0 hmanga Vaccine pek tur zat chu Naupang kum 2 hnuai lam 68 leh Nu Naupai  2, a vaiin  70 an nih thu a sawi a. Naupangte chu  Champhai Main Centre hnuaia mi vek  an nih thu leh  Naupai 2 te chu Rabung Sub Centre hnuaia mi te an nih thu a sawi a. Vaccine pek turte chu Vaccine Session Site tura ruat hmun 15 ah pek tuma ruahmanna siam a ni, a ti bawk.

Intensified Mission Indradhanush hi sawrkar laipui hmalaknaa kalpui niin, Mizoram bikah chuan District thlan bik panga: Champhai, Kolasib, Lawngtlai, Lunglei leh Mamit District-ah te kalpui mek a ni a. Intensified Mission Indradhanush (IMI) hmang hian Naupang kum hnih hnuai lam abik takin kum khat la tlinglote tan Oral Polio Vaccine, Pentavalent Vaccine, Fractional Inactive Polio Vaccine, Bacillus Calmette Guerin Vaccine,  Measles Rubella Vaccine leh Rota Virus Vaccine-te pek niin, Nu naupaite tan Tetanus and Diptheria  Vaccine pek thin a ni.   Heng bakah hian Vaccine lak vanga thil duhawmlo thleng thei laka invenna hmanruate pawh vaccine pekchhuahna tur hmun hrang hrangahte dah vek niin, District Task Force for Immunization (DTFI) chuan Undivided Champhai district  chhhunga naupang leh Nu naupai vaccine la thei turte chu Vaccine bikim la vek turin a ngen nawn leh a ni.