3910/2022-2023

Champhai, the 21th March, 2023: Tun thla March ni 27 atanga 31 chhunga Inter District Volleyball Tournament 2023, Champhaia nghah tur buaipui kawnga hma la tura din, Champhai District Organizing Committee on Inter District Volleyball Championship 2023 chu vawiin chawhnu dar 1 khan an Chairman, Pu James Lalrinchhana, District Bawrhsap hovin DC Conference Hall-ah an thukhawm.

Champhai District Volleyball Association (CDVA) General Secretary Pu James Lalruatkima Pachuau hnen atangin meeting hmasa thurel bawhzui a nih dante leh inpuahchahna kawnga hmalak tawh chinte ngaihthlak a ni a. Sub-Commitee hrang hrang atangin report ngaihthlak a ni bawk.

He hunah hian Inter District Volleyball Tournament thlen leh buaipui kawnga tul hrang hrangte sawiho niin, peng hrang hranga hmalatu tur Sub-Committee 9 te hmalak tawhna leh hmachhawpte sawiho a ni a. Tarlan a nih danin Volleyball Court hungna zawhfel thawhkhat a ni a, Court rawng hnawih hmabak niin, zana khelh a nih theih nan eng chhitna tur ban 9 siam a ni a, wiring pawh khawih nghal tum a ni. A hawnna hun Spike Off Program hman dan tur chungchangte pawh sawiho niin, March ni 27 zan dar 8:00 ah Kahrawt Community Hall-ah hman nise tih a ni a. Heng bakah hian mikhual dawnsawn leh thlen dan turte pawh sawiho a ni a, Vanlallawma Indoor Stadium (VANIS), Kahrawt Veng, Champhaiah mikhual hmuah a ni ang a, heta tang hian an thlenna tur hmun theuhte panpui leh tur an ni ang. Inpuahchahna hmunhma hrang hrangte Ningani hian Committee hminga enfiah nise tih a ni bawk.

Tun tum hi Champhaiin Inter District Volleyball Tournament a thlen tum hnihna tur a ni a, District 11 te tel thei tura beisei an ni a; Mipa Team 11 leh Hmeichhe Team 9 te tel thei tura in report an awm tawh a. Kahrawt Field-a Volleyball Court pahnihahte tournament thlen tuma ruahmanna kalpui mek niin, zan lam thlenga khelh theih tura êng pek kawngah theihtawp chhuah mek zel a ni a. Hman khat daih plastic Single Use Plastic (SUP) hmang lo thei ang bera hmalak nise tih a ni a. Heng bakah hian Medical, Traffic, Water& Sanitation, Information & Publicity leh tul dangte sawiho a ni bawk.