3909/2022-2023

Vau thla ni 21, 2023: Vawiin khan Mizoram Legislative Assembly Deputy Speaker Pu H. Biakzaua chuan North Eastern Council (NEC) sum hmanga sak, Lawngtlai AOC Venga Lairam Higher Academy of Science (LAHAS) Hostel building thar chu a hawng.

Pu H. Biakzaua chuan Hostel building thar banga chhinchhiahna lungphek phum zar hliahna puanzar pawt hawngin, Hostel kawngkharpuia ribbon zam a cheh chah hnuah kawngkapui a hawng a. Hostel building thar chhung lam chu a fang kual nghal a. Hemi hnu hian LAHAS Hall-ah Hostel building thar lawmna inkhawm buatsaih zui a ni.

He hunah hian Pu H. Biakzaua chuan LAHAS Hostel building thar ṭha tak sak a nih theih nana sawrkar thuneitute leh a enkawltute thawh rimnaah lawm thu sawiin, tuna hawn theih a ni ta chu lawmawm a tih thu a sawi a. Sawrkarin ram leh mipuite hmasawn nan sum a ui lo va, asset ṭha tak tak din a nih theih nan state sawrkar sum awm sa a hman bakah, sawrkar laipui aṭang leh kawng hrang hrang dapin ram tana sum hai chhuak turin theih tawp a chhuah ṭhin tih sawiin, Lawngtlai District-ah pawh hmasawnna hna thawh tawh, thawh mek leh hmachhawp eng emaw zat a awm thu a sawi a. LAHAS chu Kohhranin a enkawl mah ni se, thiamna leh finna pe chhuak a, chumi hmanga ram leh mipuite tihhmasawn chu sikul din chhan a nih angin ram tana hma lakna pawimawh leh chhenfakawm tak a nih hriain sawrkar pawhin an mamawh phuhruk tura kut thlak a nih thu a sawi a. Hostel chu chhun lama sikula zirlaite'n zirtirna an dawn baka zan lama zirtirna leh kaihhruaina an dawn theihna hmun a nih angin, LAHAS Hostel building thar hawn tak pawh chu ram tana mi chhenfakawm leh mi hlawhtling tak tak chher chhuahna hmun a nih ngei a rin thu sawiin, chumi tihlawhtling tur chuan sikul enkawltute leh zirlaite pawh theih tawp chhuah turin a chah nghal a ni.

LAHAS Hostel building thar hawnna leh lawmna inkhawm hi Lawngtlai District Rural Development Office-a Project Director Pi Marilyn Rualzakhumthangi chuan a kaihruai a. Lairam Isua Krista Baptist Kohhran (LIKBK)-a Associate General Secretary (S), LAHAS Managing Board Chairman ni bawk Rev. Dr LH Lalpekhlua chuan hunserh a hmang a. Lawngtlai Bawrhsap Pu David Lalthantluanga chuan LAHAS Hostel building sakna tur leh Lawngtlai District chhunga hmasawnna hna thawhna tur NEC aṭanga fund a lo kal dan leh District Administration kal tlanga hma lak a nih dan te sawi fiahin, LAHAS Hostel building thar sak chu in pakhat sak ringawt a ni mai lo va, Hostel building thar aṭanga zirlaite hlawhtlinna leh ram hmasawnna tur rahbi thar tukna a nih thu a sawi.

He hunah hian Lawngtlai DRD office-a Assistant Engineer Pu FC David Biakthansanga chuan technical report a pe a. LAHAS zirlaite'n "Lahasians thuvawn 12" sawi rualin, LIKBK Assembly Choir te'n "Maw Bawipa, na thluachuahnak sung" (Aw Lalpa, i malsawmna hlu) tih hla an sa a. Lawngtlai DRD office-a Programme Assistant (DEGSU) Pu R. Malsawmdawngliana Khawlhring chuan lawm thu sawiin hun a khar a ni.

LAHAS Hostel building thar hi Lawngtlai AOC Venga LAHAS complex-ah sak niin, 30% NEC budget allocation for Backward Community of Lai Community, 2021-2022 hnuaia sum hmuh ₹ 52,04,160/- hmanga sak a ni a. A hna hi Lawngtlai DRD office te'n vilin, a satu Contractor chu Pu Lalzahawma Chinzah, Lawngtlai a ni a. April 28, 2022 aṭang khan sak ṭan niin, December 3, 2022 khan sak zawh a ni a. A building hi a chhawng niin, lei zawlah metre 160.08 biala zau a awh a. A bulṭhut leh ruangamah RCC niin, a bangah brick leh cement plaster, a ceiling-ah tile leh a chungah rangva te hman a ni a. Verandah railing leh toilet te siam a ni bawk.

LAHAS hi LIKBK kohhran sikul niin, kum 2017 khan din a ni a. Mizoram Board of School Education (MBSE) zawmin, Government of Mizoram School Education Department aṭangin Dt. 07.02.2018 khan Science Stream zirna leh Dt. 10.01.2022 khan Arts Stream zirna hawn theihna phalna (permission) hmuh a ni a. Class XI leh Class XII zirna awmin, tun dinhmunah Class XI (Science)-ah zirlai 15, Class XI (Arts)-ah zirlai 15, Class XII (Science)-ah zirlai 17 leh Class XII (Arts)-ah zirlai 7, an zavaiin zirlai 54 an awm mek a ni.

Vawiina LAHAS Hostel building thar hawnnaah hian LADC-a member-te, state leh LADC official-te, LIKBK Kohhran hruaitute, tlawmngai pawl ai awhte, political party hruaitute, chanchinbu mite, LAHAS zirtirtute leh zirlaite leh sawm bikte an tel a ni.