1037/2022-2023
Champhai, the 24th June, 2022: Vawiin chawhma dar 10:00 khan Champhai District Drugs Disposal Committee buatsaihin Champhai District Police ten 2018 May thla atanga 2022 February thla thlenga ruihhlo tum 86 an man atanga tihral tur heroin hawng 797, kg 10.36 tualchhung rate-a Rs. 2,39,10,000/- (cheng nuai zahnih sawmthum pakua leh singkhat), International rate-a Rs. 51,80,40,000 (cheng nuai sangnga za sawmriat leh singli) leh Ganja kg 105, Rs. 3,15,000 (cheng nuai thum singkhat leh sangnga) chu District Bawrhsap Pu James Lalrinchhana chuan District Hospital Champhaia bawlhhlawh halralna Incinerator-ah mei depkaiin a halral.

He hun puala District Hospital Complex-a hun hmanah Bawrhsap Pu James Lalrinchhana chuan drug hman khawlohna leh tawlhrukna tha lo tak do kawnga khawvel puma kum tina hun hman thin International Day Against Drug Abuse & Illicit Trafficking puala damdawi man thahnem tak halral a ni thei chu lawmawm tiin, man a nih theih nana Police leh thathawhtu zawng zawngte chhuanawm a tih thu a sawi a. Khawvel pum huapa ruihhlo do leh hmalak kawnga tanhona tur atan 1987 a UN General Assembly chuan he hun hi hman tan nise tia a rel thluk thu sawiin, kumin thupui thlan 'Share drug facts, save lives' tih hmangin drug chungchang thil nihna dik tak puanga inhrilhhriattawnna neih chu ngaihpawimawh a nih thu a sawi a. Ruihhlo do leh man kawnga Police, Excise & Narcotics leh Assam Rifle-te hmalakna chhuanawm tiin, ruihhlo man a nih theih nana NGO leh mipuite tawiawmna fakawm a ti a. Ruihhlo man turin harsatna tam tak paltlang a tul thin thu leh man lohin khawtlangah harsatna tam tak a thlen thu tarlangin, ruihhlo chuan ram sum leh pai, hriselna leh thalaite nun a ei chhe mek zel a ni, a ti a. Ruihhlo do kawnga a hmatawnga awmte chu Pathian rawngbawlna a nih tih hriaa hnual mai lo tur leh, an phenah sawrkar, mipui, NGO leh kohhran an awm tlat a ni tih hriaa huaisen taka kal zel turin a fuih a ni.

Bawrhsap chuan ram leh hnam, khawtlang hmelma ruihhlo leh a kaihhnawih tawlh leh zawrh kawnga inhnamhnawihte kan do tlan a ngaih thu sawiin, thalaite damdawi hmang sual lo tur leh a ngawlvei tawhte enkawl leh chhanchhuah kawngah tanlak a ngai a ni, a ti a. Nu leh pate chu fate chinchang hre tur leh inkaihhruaina tha tak nena enkawl turin a chah a. An thian kawm leh khawsak dante, nunphungte zirchianga thlithlai reng turin a fuih a, inpawhtlang taka chhungkuaa inuapna tha kan neih a tul a ni, a ti bawk. He ni pual hun hman chuan inzirtirna leh harhtharna mai piah lamah phurna leh chona thar thlen se a duh thu sawiin, district mipuite chu ram leh hnam hmelma ruihhlo do beihpui thlak kawngah thuneitute thawhpuia, huaisen taka penchhuak turin a sawm nghal bawk a ni.

He hun kaihruaitu Champhai SP Pu Lalrinpuia Varte chuan ram leh hnam hmelma, a zuna uai natak leh kan chhiatpui mek thihna tur ruihhlo leh a kaihhnawihte kan huaa kan do zel dawn a ni tih lantir nan he hun hi hman a ni, a ti a. Supply Reduction Team dangte theihtawp a thla thah lova thawhhopui zelah a sawm a ni.

Thusawitu dang Sub-Hqrs. YMA Champhai President Pu F.Lalrinmuana chuan ruihhlo thahnem tak man a nih theih nana Police-te thahnemngaihna fakawm tiin, ruihhlo do kawnga YMA hmalak tawh dan hrang hrangte tarlangin, ruihhlo hluar zel tur ven nan thu mai nilo a taka chetchhuah a tul a ni, a ti a. Nakin lawka ram leh hnam innghahna tur thalaite chu ruihhlo laka inthiar fihlim tur leh tihchhin pawh tum lo turin a fuih a. Ngaihhlut tur dik tak ngaihlu a, eizawnna dik leh zahawm, sum leh pai chauh um lova khawsawk zir a pawimawh thu a sawi bawk.

He hunah hian Addl. SP Pu C.Lalengliana'n ruihhlo man chungchang report a pek hnuah ruihhlo hman sual leh dan lova tawlhruk dona ni, 'International Day Against Drug Abuse and Illicit Trafficking' pualin sawmbik kalkhawmte leh Student Police Cadet-te zirtirna a pe a. Tunhnaiah ruihhlo siamna Golden Triangle-ah ruihhlo siam chhuah a tam zual thu tarlangin, Golden Triangle bulhnai maia awm kan nih avang leh thenawm ram buai remchang lain ruihhlo tawlhluh a tam zual a ni, a ti a. Drug man hnua dan anga hmalak a nih theih nana buaipui tulte a sawifiah bawk.

Vawiina ruihhlo halralte hi heroin man case kal lai mek (Pre-trial) 64 atangin hawng 721 (gram 9,372), tualchhung rate-a Rs 2,16,30,000 (cheng nuai zahnih sawmparuk leh singthum), International market rate-a chhuta Rs. 46,86,00,000 (cheng nuai sangli zaruk sawmriat paruk) man leh trial zawh tawh, Court atanga tihral phalna order awm sa (Post Trial) 18 atangin heroin hawng 76 (gram 988.8), tualchhung rate-a Rs 22,80,000 (cheng nuai sawmhnih pahnih leh singriat), International market rate-a chhuta Rs. 4,94,40,000 (cheng nuai zali sawmkua pali leh singli) te bakah Ganja kg 105, Rs. 3,15,000 (cheng nuai thum singkhat leh sangnga) man hu te a ni.

He hunah hian ruihhlo laka fihlim tur leh ruihhlo leh a kaihhnawih laka inhnamhnawih lo tura intiamkamna Signature Campaign neih nghal a ni a. Kumin January atanga June thlenga Champhai District Police ten heroin kg 6 chuang an man theihna kawnga thawhhlawk Police officer 12 te hnenah chawimawina thuziak cheimawi District Bawrhsapin a hlan a, chawimawite chu:

1. Inspr JH Sanghmingthanga, OC, Zokhawthar PS
2. Inspr H. Vanlalthanga, OC, Champhai PS
3. SI Robert Lalhmuakliana, Champhai PS
4. SI P. Vanlalhruaitluanga, Champhai PS
5. SI M. Hunter Hnamte, Champhai PS
6. SI Liansangpuii, Champhai PS
7. SI C. Lalsangliana, Champhai PS
8. SI Joseph Vanlalauva, Champhai PS
9. SI PC Lalramnghaka, OC, Dungtlang PS
10. ASI C. Zohmingliana, Zokhawthar PS
11. ASI Lalruatfela Sailo, Champhai PS
12. ASI C. Hmingthantluanga, Champhai PS

Vawiin vek khan Champhai District Police-te man Methamphetamine kg 192, a hlut zawng Rs. 30,78,10,000 (cheng nuai sangthum sawmsarih pariat leh singkhat) leh Pseudoephedrine kg 87, a hlut zawng Rs. 2,65,92,000 (cheng nuai zahnih sawmruk panga singkua leh sanghnih) te chu District Level Disposal Committee-in a tihral theih loh avangin State High Level Committee-in a ti ral ve bawk a ni.

Kum 2022 June thla kal mek thleng hian Champhai District Police hmalaknain ND&PS Act hnuaiah Case 39 ziahluh tawh a ni a, mi 47 man tawh niin heng zinga 13 te chu ramdang mi an ni. Heroin man tawh zawng zawng hi gram 6,594/hawng 507 (kg 6.594) a ni a, a hlut zawng hi tualchhung rate in Rs 1,52,10,000 (cheng nuai za sawmnga pahnih leh singkhat) a ni a, Methamphetamine hi mum 61,000 man ni tawhin tualchhung rate-a a hlut zawng chu Rs. 1,22,00,000 (cheng nuai za sawmhnih leh pahnih) man hu a ni. Champhai District Police chuan ruihhlo do hna a thawhna kawngah mipui leh NGO te tawiawmna tha tak a dawn thin avangin lawmthu a sawi a, thawhpui zel turin a sawm bawk a ni.

He hunah hian District Level Narco Coordination Centre (NCORD) member-te, Police, Sub-Hqrs YMA hotute, Student Police Cadet, Bethel High School leh Chanchinbumite an tel a ni.