1036/2022-2023
Aizawl, the 24th June 2022 : Vawiin khan AH&Vety Secretary Pi Lalzarmawii chuan 1962 Call Centre a hawng. Hawnna programme hi AH&Vety Council Conference Hall ah an hmang a ni. He Call Centre hi a mamawhtu apiang ten Veterinary Doctor te an rawn theihna tura duan a ni.

Call Centre-ah hian thawktute mi paruk - Call Centre Executive (Veterinary Doctor) pakhat, IT Support staff-1, leh Call Centre Agent 4 (VFA) an awm a. An hlawh hi Government of India tum vek tur a ni. Call Centre-ah hian toll free number +913892314226 dah a ni a. He number hi telephone service provider (TSP) zawng zawng in animals in distress short code 1962 hmanga biak theih turin ruahmanna an siam dawn a ni. Toll Free number dial kher lovin awlsam takin 1962 dial in call centre hi biak theih a ni dawn a ni. Call Centre a call lo lut chu call centre staff ten an lo chhang ang a, a call tu te mamawh ang zelin lo dawn sawn a ni ang. Call Centre a doctor leh VFA te hian ran vulhtute harsatna lo dawngin a chinfel theih chu an tifel nghal ang a, Specialist rawn ngai a nih chuan Specialist hnenah chu call chu an pe chhawng ang. Call Centre hi Development Block tina MVU te nen an thawk ho ang a. A hmun a kal ngai chu MVU hnai ber an hriattir ang a, MVU staff ten a hmunah an ching fel ang.

Sawrkar Laipui National Animal Disease Control Programme (NADCP) hnuaiah AH&Vety Department chuan Call Centre dinna tur sum Rs.47,66,000 a dawng a. ICT Department berawnin Mizoram E-Governance Society te nen MoU an sign a. Mizoram E-Governance Society te hian call centre architecture duansakin, equipment leh software procurement te, installation leh staff training zawng zawng an buaipui a ni.

Call centre a call lo lut reng reng te chu record vek a ni ang a. Call lo lut bawhzui dan te pawh record vek a ni ang. Call centre hian ranvulhtu leh neitu te kawtkaia Veterinary Service thlen tir turin a thawk ang. hei hian Veterinary Service supply demand gap zau lutuk hi a ti zim thei ngei tura beisei a ni.

Vawiin programme hi AH&Vety Director Dr.Lalremliana’n a kaihruai a. Addl. Director Dr.Lalhmingthanga’n report a pe a. Jt.Director Dr Lalrinawma Khiangte chuan lawmthu sawiin hun hnung a khar a ni.