4075/2023-2024

Champhai, the 7th March, 2024: General Election to Lok Sabha, 2024 inpuahchahna kalpui chhoh mek zelah vawiin chawhnu dar 1:30 khan District Election Office, Champhai buatsaihin DC Conference Hall-ah Political party hrang hrangte inthlan kaihhnawih senso vil dan (Election Expenditure Monitoring) chungchanga hriattur pawimawh hrang hrangte zirtir an ni.

He hun hmanpuitu Pu James Lalrinchhana, DEO/DC Champhai chuan thawhhona tha tak hnuaia General Election to Mizoram Legislative Assembly, 2023 zawhfel a ni chu entawntlak a tih thu sawiin, kan hma lawka Lok Sabha inthlanpui lo awm turah pawh lungrual taka thawhho leh ngei a beisei thu a sawi a. Inthlan buatsaih kawnga pawimawh berte zing ami Political party-te tana training buatsaih ngaipawimawha telte fakawm tiin, inthlanna felfai, dik leh langtlang neih a nih theih nana training buatsaih hlawkpui tum theuh turin a chah a. Hriat duh an neih leh mamawhte inthlahrung hauh lova election buaipuitute zawtfiah zel turin a chah nghal bawk.

Thusawitu dang Pu M. Misael, Dy. DEO/Addl. DC Champhai chuan inthlan kaihhnawiha zawm tur thupek leh dante tha taka zawm a ni thin chu fakawm a tih thu a sawi a. Champhai District-a inthlanna muanawm leh felfai tak neih thin chu chhawmnung tura theihtawp chhuah tlan zel a tul thu a sawi bawk.

He hun hi Pu Benjamin Zalawma Ralte, Election Officer chuan kaihruaiin Pu M. Misael, Dy. DEO/Addl. DC in Model Code of Conduct (MCC) chungchanga pawimawhte a sawifiah a. Pu Lalrinawma, PD, DRDO, Nodal Officer (Expenditure Monitoring Cell) in inthlan senso chungchanga hriattur pawimawhte leh a viltu team hrang hrangte hnathawh dan a sawifiah a. Dr. Lallawmkima, DIPRO in Media Certification and Monitoring Committee (MCMC) leh Media kaihhnawih pawimawh dangte a sawifiah bawk.

He hunah hian Compendium of Instructions on Expenditure Monitoring para 18.17 Returning Officer Handbook, 2023 in a sawi angin inthlan senso chhut nan thil man hrang hrangte sawiho a ni a, rate bithliah nghal a ni.