Vawiin chawhma khan Champhai District-ah Mizoram hmun dangte rualin ‘Kangmei Ven Hapta’ (Fire Prevention Week) vawi 20-na chu hman tan a ni.  Kangmei Ven Hapta hawnna pual hian District Level Fire Prevention Committee buatsaihin   Champhai DFO Pisa tualzawlah hun hman a ni a. Kumin Kangmei Ven Hapta puala thupui thlan chu ‘Ram tikanglo turin mitin i fimkhur ang u’ tih a ni.

He hun hi Champhai DFO & Member Secretary, District Level Fire Prevention Committee Pu C.Lalbiaka chuan kaihruaiin, Pu VL Chama Hnamte, President, Sub-Hqtrs. YMA Champhai chuan Kangmei Ven Hapta hawnna thuchah a sawi a. Kangmei Ven Hapta puala Lirthei hmanga khawlai fang kuala, aurinna hmanga mipuite zirtirna pe a chhuak tur, Vehicle Rally Team pahnihte a  vailiam nghal a ni.  

Pu VL Chama Hnamte chuan kangmei ven kawngah mitinte fimkhur a pawimawh thu a sawi a. Ram ngaw humhalh leh kang thelh kawngah tanrual a ngai a, a enkawltu vek kan nih avangin Department kutah chauh innghah mai thin loh tur a ni, a ti a. Kangmei ven kawnga  tangkai leh hriattur angte pawh mahni hriat mai duhtawk lova midangte zirtir chhawng ve zel  a tul thu a sawi a. Kangmei thelh tura chhuah chu mitinte bat anih thu sawiin, Kangmei Ven Hapta chuan mipuite  thinlungah fimkhurna thlen se, ram pum ang pawha kangmei vanga tawrhnate a lo nep zawk phah theihna anih ngei beiseiin a hawng a ni.

He hun kaihruaitu Pu C.Lalbiaka chuan Kangmei Ven Hapta hawnna hmang tura kalkhawmte chungah lawmthu a sawi a. Kangmei Ven Hapta puala Mizoram Chief Minister leh State Level Fire Prevention Committee  Chairman ni bawk Pu Zoramthanga thuchah a chhiarchhuak a. DFO Champhai kaihhruainain  kangmei tichhuaklo tur leh a ven kawnga mitinte intiamkamna lak a ni.

Hawnna programme zawh hnu hian District Level Fire Prevention Committee duhdanin zau zawka mipuite thlengpha zirtirna auchhuahna tura duan Lirthei nena Champhai leh a chhehvel khuate fangkuala, aurinna hmanga mipuite hnena zirtirna pe tur Vehicle Rally Team-te chu thuang hniha inthenin an fehchhuak a. Khawlaiah kangmei laka fimkhur tulzia leh hriattur pawimawhte an zirtir a. Vehicle Rally Team-ah  hian District Level Fire Prevention Committee member, Forest Department thawktute, Champhai Buffalo member, YMA hruaitute leh Auto Rickshaw neitute an tel a ni.

Vawiin vek hian Khawzawlah DFO (Wildlife) leh RO tangkawp buatsaihin Kangmei Ven Hapta hi hman a ni a. Champhai District chhunga RO thuthmun khua Kawlkulh, Khawhai, Khawbung, Farkawn leh Hnahlan-ah te Range Officer (RO) te kaihhruainain Kangmei Ven Hapta hawnna leh Lirthei hmanga khawlai fangkuala zirtirna Vehicle Rally-te neih a ni bawk a, Ngopa-ah chuan naktuk lama he hun hi hman tum a ni.