Vawiin khan Fire Prevention Week 2019 chu Lawngtlai DC Conference Hall-ah Lawngtlai District Bawrhsap Pu N. Chakhai MCS chuan a hawng.

Pu N. Chakhai chuan kan pi pute'n ram tihkan an hlauh va, lo hal dawn pawha uluk taka mei kawng an phiah thin laiin, anni aia nunphunga changkang zawk thangtharte kan inthlahdah a, kangmei chhuah kan pawisa ta lo lutuk chu a pawi hle a, kan than harh a ngai tak zet a ni, a ti a. Kangmei ven kawnga sawrkar hma lakna chu mipuiin thlawpin, nu leh pate'n kan fate kan zirtir a, social media thlenga inzirtirna tha kan theh darh a tul a ni, a ti a. Kumin Fire Prevention Week thupui, "Ram tikang lo turin mi tin i fimkhur ang u," tih chu zawm theuh turin kal khawmte a chah nghal.

He Week hawnna hi Deputy Conservator of Forests (Wildlife) Pu PC Lalchhandama'n kaihruaiin, Fire Prevention Week tobul leh a hlawhtlinnate a sawi a. Lawngtlai SP Pu Amit Goel IPS pawhin thu sawiin, mipui kal khawmte'n ram tikang lo tur leh ramngaw leh nungchate humhalh tura thutiam an sawi rual a. Lawngtlai DIPRO Pu C. Lalhruaitluanga MIS chuan lawm thu sawiin, hun a khar a ni.

Vawiin Fire Prevention Week hawnnaah hian sawrkar department hrang hrang leh LADC-a officer te, VC leh tlawmngai pawl lam te an tel.

Fire Prevention Week hi Mizoramah AD 2000 kum atang khan hman tan niin, kumin hi a kum 20-na a ni a. Kum 2009 atang khan district leh village level fire prevention award sem tan niin, Lawngtlai District hi kum 2010 & 2015-ahte pakhatna leh kum 2014-ah pathumna a lo ni ve tawh a ni.

Kum 2015 atang khan Forest Survey of India (FSI) chuan satellite hmangin kangmei chhuak a awm leh awm loh vil tanin, fire alert a thawn chhuak thin a. He FSI alert system hian kum 2015-a Mizorama kangmei chhuak a chhinchhiah zat chu 2469 niin, lo hal ni lo kangmei chhuak pangngai chu 118 a ni a. Hemi hnu hian Mizoram chu kangmei ven kawngah a hma sawn zawnga kalin, nikum 2018 kha chuan kangmei chhuak 2096 chhinchhiah a ni a, lo hal ni lova kangmei chhuak chu 20-ah a tla hniam tawh a ni.