Vawiin khan Agriculture leh a kaihhnawih Department dangte tangkawp buatsaihin Kisan Kalyan Karyashala/Diwas  (Farmers Welfare Campaign) chu Kahrawt  Community Hall, Champhaiah hman a ni a. He hun hi Pu TT Zothansanga, Champhai North bialtu MLA chuan khuallian niin a hmanpui a. Kisan Kalyan Karyashala hi Gram Swaraj Abhiyan-Special Interventions (Village Self-Governance Campaign) kalzelin a kentel programme pakhat Loneitu leh Kuthnathawktute puala buatsaih a ni.

Khuallian Pu TT Zothansanga chuan mihlim thei ber berte chu mi taima leh kuthnathawktu, mahni kutkawih hmanga intodelh thin mite hi an ni, a ti. Kisan Kalyan Karyashala chu Sawrkar laipui hmathlir kum 2020 a kuthnathawktute sum deh chhuah a leta tihpun  tumna programme kentel anih thu a sawi a. Sawrkarin kuthnathawktute chawikanna turin  theihtawp a chhuah thu sawiin, sawrkar kuta engkim dah mai lova sawrkar hmalaknate umpha ve tura tan lak  a ngaih thu a sawi a. Loneitute kutah thui  takin  sawrkar a ingnhata, an tana tha tur hmanruate pawh sawrkarin a pek thin thu leh  Agriculture link Road kilometer 2000 chuang pawh siam anih tawh thu a sawi a.  Pu TT Zothansanga chuan leilung mila hmasawnna kalpui a tul thu leh  tuihna tha nei tur chuan ramngaw humhalh angaih thu a sawi a. Champhai leileta tui tlem chhan leh Tuipui tui tlem tak chhan chu tuihna siamtu ber ram ngaw tih chereu vang a ni, a ti a. Sawrkar lama thawktuten loneitute hmunhma kal chilha hna an thawh hian rah duhawm a chhuah thin thu a sawi a. Khuallian chuan ram buai avanga tawrhna leh hliamte a dam fel tawh a, zalenna hnuaia leng mek Mizote hian  midangte elpha ve turin finna, thiamna leh theihna kan neihte kan chhawr tangkai thiam theih phawt chuan hma kan sawnin hnam dang kan khum thei dawn a ni, a ti a. Champhai phaizawl zau tha tak chu a neituten mahni rohlu anih tih hriaa, neitu thinlungpua an enkawl a tul thu sawiin, a neitu tak tak ten a hlutna pawchhuak thei tur khawpa an chhawr tangkai a tul tawh tak zet thu a sawi a. Leilet zawl tui mamawhte pawh pek  anih theih nan Irrigation and Water Resources Department hmalaknain hna thawh mek zel anih thu a sawi a.  Loneitu kalkhawmte chu Kisan Kalyan Diwas chu tangkai taka hmanga, mithiam zawkte atanga thiamna zira,  a taka chhawr tangkai turin duhsakna a hlan nghal a ni.

He hun hi Pu Vanlalngaihsaka, Champhai DC chuan kaihruaiin kalkhawmte lawmna thu a sawi a. Kisan Kalyan Karyashala chu India ram pumah Gram Swaraj Abhiyan hun chhnga hman anih thu a sawi a. Gram Swaraj Abhiyan April Ni 14 atanga May Ni 5 thleng awh hun chhunga programme neih tawh dan leh hmabakte tarlanna a nei bawk a ni.

Kisan Kalyan Karyashala theme song awmzia Pu Dajied Lalthlamuana, Block Technology Manager (BTM) in hrilhfiahna a neih hnuah ngaihthlak a ni a. Hemi hnu hian Champhai Block huamchhunga Agriculture leh a kaihhnawih Department dangte atangin Loneitu  chawimawi tlak thlanchhuah  2 theuhte (avaiin mi 10) chanchin chhiarchhuah  niin khuallianin Progressive Farmers Award  pawisa fai cheng 2000 leh certificate kengtel a sem a. Pu James Vanlalluaia, District Agriculture Officer (DAO) & PD ATMA in lawmthu sawina neiin hun hmasa hi a khar a ni.

Chawhnu lamah Dr M.Zohmingthangi, District AH&Vety Officer (DVO) kaihhruaina hnuaiah technical session neih a ni a. Dr M. Zohmingthangi chuan Loneitute chu kuthnathawh chawikanna kawnga theihtawp chhuaha, sawrkar laipui thil tum kum 2020 a sum lakluh a leta tihpun tum theuh turin a chah a. Kuthnathawh chu eizawnna tlak anih zia lantirtu nih tum theuh turin a chah bawk a ni.  Pu James Vanlalluaia, DAO Champhai  pawhin  thu sawina  tawi neiin technical session neih dan tur kalhmang tlangpui a sawi a. Pu Dajied Lalthlamuana, Block Technology Manager (BTM) in Kisan Kalyan Karyashala chungchang leh awmzia tlangpui a sawifiah a. He hunah hian Scheme Song awmzia lehlin anih hnuah nghaihthlak ho leh a ni a. Hemi hnu hian Agriculture leh a kawppui Department hrang hrang hnuaia Central Scheme awmte zirhona presentation hmanga neih a ni a. Presentation  benglut tak tak Agriculture, Sericulture, Horticulture, Fisheries leh Animal Husbandry  atangte a ngaihthlak a ni a. A duh apiangte tan zawhna hun hawn niin Loneituten an harsatna leh hriat duhte mithiamte an zawt a ni.

Technical session neih anih chhung hian AH&Vety Department-ten Animal Health Camp an buatsaih a. Mipuiten an hlut hle a ni. Vawiin Programme hi Pu Lalvansanga  SDHO, Horticulture Champhai Sub-Division-in lawmthu  sawina neiin a khar a ni.

Kisan Kalyan Karyashala/Diwas tum ber chu Loneitute kum 2020 a an sum lakluh a leta tipung thei tura zirtirna leh hmalakna neihpui a ni a. Loneitute leh mithiamte inkawmhona hun Farmers Scientist Interaction siam niin hemi hmang hian Loneitute harsatna hrang hrangte sut kian tum a ni a. Ran a thlawna entirna neih  niin, kuthnathawktu chawimawi phute pawh chawimawi an ni bawk a. Sawrkar laipui scheme-te chipchiar taka inzirtirnna neih a ni bawk a ni.