3387/2023-2024

Champhai the 18th January, 2023 - Kohhran hrang hrang hruaitute tan vawiin khan CHANEM Conference Hall-ah zuk leh hmuam chungchang inzirtirna hun buatsaih a ni.

He hun hi Dr. PC Lalhmingliana, Sr. CMO kaihhruainaa hman niin Dr. H. Lianthangpuia, State Nodal Officer hnen atangin thusawi ngaihthlak a ni.

Dr. H. Lianthangpuia chuan zuk leh hmuam in mihring nunna ah pawi thui tak a khawih theih dan a tarlang a, Mei zuk hi meizu ve lo an bul ami te tan a hlauhawm thei a sawi a, Cancer a thlen theih avangin mizo mipuite kan fimkhur thar a ngai hle tih a sawi. Thangthar lo awm zel tur te'n zuk leh hmuam an rawn tih loh chuan kan ram in hriselna kawngah nasa takin hma kan sawn dawn tih sawiin zirna kawngah pawh zuk leh hmuam that lohna inzirtir uar a tul thu a tarlang a, zirna sang lam aiin a hniam lamah ngaihpawimawh zual nise duhthusam a nih thu a sawi.

Sr. CMO chuan he huna kalkhawm Kohhran hruaitute chu zuk leh hmuam that lohna inzirtir kawngah tanlak puiah a sawm a, thu an sawina hmun apiangah a remchang a nih chuan tarlang tel thin turin a ngen a, Kohhran atanga tan lak a nih loh chuan zuk leh hmuam tih loh kawngah hma kan sawn thei dawn lo ni-a sawiin duhsakna a hlan a ni.

Pu R. Lalremruata, State Consultant, NTCP hnen atangin zuk leh hmuam that lohna leh mihring taksaa a tha lo zawnga nghawng a neih dan ngaihthlak a ni.

Zirchinnaa tarlan a nih danin Phai a damlo refer te zingah za zela 92.23 in zuk leh hmuam an ti a, hemi kaihhnawih natna vanga refer hi za zela 57.53 an awm a, cancer vanga refer za zela 34.32 an awm a, cancer zinga za zela 85 te chu zuk leh hmuam vang a ni a, za zela 75 te chu zuk leh hmuam ti lo mahse an chhungte tih vanga vei an ni.

Gutkha lam ei nasa tam tak te chuan ka chhung cancer leh natna dang Mizoram ah ngei pawh vei an tam tawh hle tih tarlan a ni a, Tuibur hian chaw dawt cancer a thlen thei a, Gutkha aiin a let 20 velin a hlauhawm zawk tih tarlan a ni bawk.