3/2026-2027

Dated Champhai, 1st April 2026: Vawiin khan Champhaiah Tung chin dan leh a karah thlai dang chin dan tur chungchangah kuthnathawktute tan training I&PR Auditorium, Chanem Buildingah buatsaih a ni.

He hun hi Pu F. Lalmalsawma, DAO Champhai chuan Tung hi tunhma chuan "Anchhia" tia sawi a nih thin thu tarlangin Champhai leh a chhehvelah pawh kung tam tak suat a lo nih tawh dan a tarlang a, tunah chuan Agriculture Department hmalaknain tharthawh leh mek a nih dan a tarlang bawk. Tung chin dan tur dik taka ching a, hlawk taka an tharchhuah theihna turin kuthnathawktute chu training hi tangkai taka hmang turin a chah a, zing taka chin chi a nih loh thu pawh tarlangin Oil Palm pawh a bul tantu an lo nih tawh dan a tarlang a, oil palm pawh hi a nih dan tur ang aia zinga ching te chuan an puitlin hnuah kung tam tak an kih a ngaih phah thin a, tung pawh hi chin dan tur dik tak leh hlawk taka an tharchhuah theihna tura thusawite uluk taka ngaithla turin duhsakna a hlan a ni.

Pi Lalhminghlui, ADAO, Champhai chuan kut hnathawktu Training a lo kal te tan an zirtur tlangpui tarlangin, tung hi varnish atan leh rawng atan tangkai taka hman thin a nih thu tarlangin a nih dan tura chingte tan sum tam zawk hailuh theihna a nih thu a sawi bawk.

Training-ah hian Pu Lalrambuatsaiha, SMS, KVK Champhai chuan kuthnathawktu kalkhawmte chu Tung chin dan tur kawng hrang hrang pawimawh tak tak a zirtir a, tung chin dan bakah vaimim leh behliang chin dan dik leh hlawk zawka kuthnathawktute'n an tharchhuah theih dan tur kawng hrang hrang ngaihthlak a ni bawk.

Kuthnathawktute hnena tung chin dan tur zirtirna hunah hian resource person ten zirtirna an pek bakah zawhna leh chhanna hun hman a ni. Training-ah hian North Khawbung, Melbuk, Zote leh Zotlang Phaizau leh Zotlanga WRC Paddy Farmers te an kalkhawm a ni.

Kumin chhung hian khaw 10 thlanchhuah - North Diltlang, Zotlang East, Hnahlan, North Khawbung, Selam, Melbuk, Bungzung, Vanzau leh Khawbungah te ram Ha. 350 a zauah tung ching tura ruahman a ni.