323/2024-2025 

Champhai, the 20th April, 2024: Nimin April ni 19, 2024 a Champhai District-a Lok Sabha Inthlanpui neih zawh tak enfiahna leh zirchianna Post Poll Scrutiny chu vawiin chawhma dar 11:00 khan District Election Officer Pu James Lalrinchhana hovin DC Conference Hall-ah neih a ni.

District Election Officer Pu James Lalrinchhana chuan boruak muanawm tak hnuaiah felfai taka inthlanna zawhfel a ni chu lawmawm a tih thu sawiin, inthlan kaihhnawih buaipuitu zawng zawngte chungah lawmthu a sawi a. Polling Station chetvelna document pawimawhte chu vote thlak tantirh atanga a tawp thlenga hmalakna entirtu pawimawh tak a nih avangin hemi atang hian dan ang takin inthlanna kalpui a ni em tih a hriat theih a, inthlan zawha endikna post poll scrutiny-ah a tangkai hle thin a ni, a ti a. Election Commission of India duhdana inthlanna rinngam, langtlang leh dik neih a nih theih nana election kaihhnawih hmalakna reng reng hriatpui ve zel tura political party aiawh telpui tura sawmte'n tha taka an tawiawm thin chu lawmawm a tih thu a sawi bawk.

He hunah hian Dy. DEO Pu K. Zorammuana'n post poll scrutiny atana danin a tarlan endikna tehfung 9 te a sawifiah hnuah Champhai District chhunga Assembly Segment 3, 23-Champhai North, 24-Champhai South leh 25-East Tuipui Assembly Segment hnuaia Polling Station hrang hrang 84 a vote tlak dan leh vote thlak kalpui a nih danahte thil felhlel a awm leh awm loh enfiah a ni a. Assembly Segment-a vote tlak dan chawhrual aia za zela 15 a tam emaw, tlem emaw Polling Station a awm chuan post polled scrutiny hmang hian chung Polling Station-te chu zirbing a ni a. Heng bakah hian Presiding Officer's Diaries, Form 17A a voters ziah luhna leh lehkha pawimawh dangte endik a ni a. He hunah hian EVM/VVPAT chhia chungchangte, EPIC nilo hmanga vote tlak tam lamin za zela 25 a pel em tihte enfiah niin, Polling Station-ah tender voter panga aia tam an awm em tih leh tehfung dangte hmanga endikna kalpui niin thil diklo hmuh a ni lo a ni.

Post Poll Scrutiny-ah hian 23-Champhai North Assembly Segment hnuaia Polling Station 30 a vote tla zat chawhrual 56.24% aia za zela 15 (15%) aia tam vote tlakna Polling Station 2, 72.73% vote tlakna 23/9 Aiduzawl Polling Station leh 106.41% vote tlakna 23/21 Keifangtlang Polling Station-te, 24-Champhai South Assembly Segment hnuaia Polling Station 25 a vote tla zat chawhrual 55.49% aia za zela 15 (15%) aia tam vote tlakna Polling Station 1, 83.44% vote tlakna 24/2 Chhungte Polling Station-te, 25-East Tuipui Assembly Segment hnuaia Polling Station 29 a vote tla zat chawhrual 58.7% aia za zela 15 (15%) aia tam vote tlakna Polling Station 3, 100% vote tlakna 25/3 New Hruaikawn Polling Station, 74.2% vote tlakna 25/4 Bulfekzawl Polling Station leh 74.6% vote tlakna 25/6 Zawngtetui Polling Station-te, 24-Champhai South Assembly Segment hnuaia Polling Station 25 a vote tla zat chawhrual 55.49% aia za zela 15 (15%) aia tlem vote tlakna leh Champhai District chhunga vote tlak chhiatna ber, 40.11% vote tlakna 24/14 Tlangsam-I Polling Station bakah vote thlak tawh hnua EVM khawl chian loh avanga thlak ngaihna 25/28 Farkawn Polling Station-te, ramri dep Polling Station dang 25/28 Farkawn Polling Station, 24/22 Zokhawthar-I leh 24/23 Zokhawthar-II Polling Station-a inthlanna kalpui dante enfiaha zirchian a ni.

He hunah hian Form 17A, Presiding Officer's Diaries, Form 17C, document pawimawh dang leh election official-te report uluk taka zirchianho a ni a. Vote tla zat percentage tam chhanah Election Duty Certificate hmanga vote thlak an awm belh avanga vote tla zat percentage sangte leh dan ang thlapa vote thlak an tam avangte a ni tih hriat a ni a. Vote tlak that lohna Polling Station-ah pawh dan kalha hmalakna rinhlelh tur hmuh a ni lova, EVM thlak ngaihna Polling Station-ah pawh harsatna dang awm lova vote thlak chhunzawm a nih thute leh ramri dep Polling Station-ahte boruak muanawm tak hnuaia inthlanna neih a nih thu ngaihthlak a ni a. Zirchianna leh endika atangin engmah dan kalha hmalakna leh ngaihthatlohna tur thil hmuh a ni lo a; inthlan that re-poll ngai lo tura rawtna siam a ni a. Lehkha pawimawhte hi political party aiawhte hriatpuinain a dahna tura siam Strong Room-ah dahluh a ni.

Vawiin Post Poll Scrutiny neihnaah hian General Observer Dr. Nipun Vinayak aiawhtu Senior Micro-Observer Pu Lawmkima, LDM Champhai, Champhai District Election Official-te leh Political party aiawhte an tel a. Political party aiawhte zawhfiah duh leh complain duh an neihte sawina hun siam sak an ni a; engmah harsatna an neih loh thu leh election kalpui danah an lungawi thu leh ngaihthatthlak an tih thu an tarlang a ni.