322/2024-2025 

Khawzawl, 20th April 2024: Vawiin khan Khawzawl DC Meeting Hall-ah Bawrhsap Pu K. Lalrohlua leh 1-Mizoram PC General Observer Dr. Nipun Vinayak aiawh Sr. Micro Observer Dr. Malsawmkimi hovin Post Poll Scrutiny neih a ni a. He hunah hian Form 17A (Register of Votes), Presiding Officers Diary-te leh document pawimawh dang te enfiah a ni a - Nodal Officer, Sector Officer, Presiding Officer-te leh Political Party aiawhte an tel a ni. 

Khawzawl Bawrhsap Pu K. Lalrohlua chuan Lok Sabha Inthlanpui kum 2019-ah Khawzawl District chuan Mizoram puma vote tla chawh rual 3% in a pha lo a, kum 2024-ah erawh ram pum huapa vote tla chawh rual chu za zela 3% in a khum tawh a, hei hi thil lawmawm tak a ni, a ti. Bawrhsap hian Inthlan hlawhtling taka neih a nih theih nana thawktu – Nodal Officer-te, Sector Officer-te, Master Trainer-te, Polling Official-te leh inhnamhnawih zawng zawng te chungah lawmthu a sawi a. Awlsam taka voter ten vote an thlak theih nana eng, tui leh kawng tha ngaihtuahsaktu PWD, PHE leh P&E Department-te chungah lawmthu a sawi bawk.

Vawiin Post Poll Scrutiny-ah hian Election Commission of India-in tehfung hrang hrang a siam te hmangin Tuichang bial chhunga Polling Station te chu randoma thlang chhuakin enfiah an ni a. Uluk taka enfiah an nih hnuah thil dik lo leh fel hlel a awm lo a ni tih lungrual takin official leh Political Party aiawh te hian an pawm a, Inthlan that (re-poll) neih ngaihna Polling Station-a awm dawn lo a ni. Thutkhawm zawh hian Political Party aiawh te hriatpuinain - Scrutiny Papers - Form 17A (Register of Votes), Presiding Officers Diary leh document pawimawh dang te hi ‘Strong Room for Scrutiny Papers’ ah dah luh an ni a, vote chhiar hun (June ni 4, 2024) ah lak chhuah leh an ni ang