2886/2023-2024

Champhai the 30th November, 2023 - Mizoram Legislative Assembly Inthlanpui, 2023 buatsaiha Champhai District chhunga Assembly bial pathuma vote tlate chhiar huna vote chhiar enpui tura ruat, Micro Observer-te tan vawiin chawhnu khan DC Conference Hall, Keifangtlang-ah training tum hnihna leh a hnuhnung ber ni bawk buatsaih a ni.

Champhai DC & DEO Pu James Lalrinchhana chuan Micro-Observer-te chu Vote chhiar kaihhnawihah kawng engkima Observer aiawhtu leh ECI mit leh beng an nih thu sawiin, an mawhphurna pawimawh tak chu tha taka an hlenchhuah theihnan training ah uluk taka inzir turin a chah a ni.

Vawiin training program hi Champhai Election Officer Pu Benjamin Zalawma Ralte in a kaihruai a. Pu Lalrinawma Khiangte, SDO (S) leh State Level Master Trainer ni bawk chuan Vote chhiar ni Micro Observer te mawhphurhna hrang hrang a zirtir a, Pu Moses Lalfakawma Tlau, SDC leh Dr Vanlalnunpuii Ralte, SDC te chuan EVM-a vote tla chhiar dan inzirtirna practical training an pe a ni.

Micro Observer-te hi Vote chhiar lai ngun taka lo en thlithlaitu niin Observer-te thachhang dawltu an ni a. Counting Hall-ah vote tla zat uluk taka lo en a, Form siamsa hmanga Observer hnena report petu an ni. Postal Ballot chhiarna leh EVM Vote tla chhiarna dawhkan tinah Micro Observer pakhat zel an duty dawn a, hemi bakah hian Observer tin te bulah anmahni puitu tur Micro Observer pahnih ruat an ni bawk a ni.

Champhai District-a Micro Observer tur atan hian mi 36 te ruat an ni a, Sawrkar Laipui kaihhnawih hna chelh te an ni.

Champhai District-a Vote chhiar endiktu tur Observer-te chu ECI in a ruat fel tawh a. Chungte chu 23 Champhai North AC ah Dr Ranjit Kumar Singh; 24 Champhai South AC ah Mr Krishna Kumar Rawat; leh 25 East Tuipui AC ah Mr Sanjay Kumar te an ni.