Nimin (11.10.2018) khan Mizoram School Games vawi 36-na Champhaia thlen dan tur chungchanga hmalaknate sawihona DC Conference Hall, Keifangtlang Champhaiah  Pu K.Vanlalthiana, Additional DC hova neih a ni.

Pu K. Vanlalthiana chuan Champhaiin Aizawl pawna Mizoram School Games nghah hmasak ber a thleng tur chu phurawm a tih thu a sawi a. Mamawh leh hmunhmate endika hma la zel turin Organzing Board a chah a. Pu C.Hualrikhuma, Dy DPC, RMSA-in hmalakna tlangpui a tarlang a, hmunhmate uluk taka vil reng anih thu leh thlengtu nihna anga titha ber ni thei tura Coach te ruaia theihtawp  chhuah mek zel anih thu a sawi bawk a ni.

Meeting-ah hian infiammite lo thlen dan tur, mamawh leh hmanraw chhawpchhuah sak tur; Tui, Eng, Eitur, hriselna lam leh Security chungchangte  sawiin, Kawngpui thawmthat ngaite pawh ziaka thlen nise ti a rel a ni a. Meeting chuan School Games neih tur chu a zau thei ang bera puanzar nise tha a ti bawk.  

Mizoram School Games, 2018 thleng tur hian Champhai leh Thenzawl-te chu thlan an ni a, Hmeichhe Hockey leh Mipa Volley ball-te chu October Ni 9-11, 2018 chhungin Thenzawlah khelh zawh a ni a, abak zawng Football, Judo, Boxing leh Athletics-te chu Champhaiah October Ni 23 atanga 26, 2018 chhunga neih tur a ni. Football hi Chhangphut Field-a khelh tur a ni a, Judo hi VANIS-ah niiin, Boxing hi Tlangrawt Boxing Hall-ah khelh ani ang a, Athletics inelna chu Champhai Zotlang Sports Complex-ah neih a ni ang.

Mizoram School Games, 2018 neih turah hian Zirlai infiammi 360 bawr vel District dang pasarih atanga fuankhawm tura beisei a ni a. Guide Teachers 50 leh Official leh Judges 30 vel an rawn tel thei dawn bawk a ni.

Attachment

  • Loading attachment...