ICFAI University Mizoram chuan Nimin (11.10.2018) khan an University Campus, Durtlang North-ah Convocation vawi-7na an hmang a. Mizoram Governor Pu Kummanam Rajasekharan chu khuallian a ni.
Khuallian Mizoram Governor chuan ICFAI University-in Covocation vawi sarihna a hmang thei chu lawmpuiin zirlai hlawhtling tharte, zirtirtute leh nu leh pate duhsak a hlan a. Zirlaite chu an hmabakah chona tam tak paltlang tur leh kawng thui tak zawh tur an la nei tih hre turin a chah. Zirna chu zalenna, thiltihtheihna leh hmabak eng min siam saktu, khawvel thlak danglamna atana hmanraw thiltithei ber a ni tiin Pu Kummanan Rajasekharan chuan khawvel inher danglam zelah hian zir tawp ni a thleng thei lo a, khawvel hmasawnna umpha tur chuan mahni intuaithar reng a ngai a ni, a ti a. Nakin lawka ram hruaitu la ni mai tur thalaite hian mahni inrintawkna nen rim taka thawk a, taima leh tumruhte tan an ban phak maiah hnathawh tur tam tak a awm reng tih hre turin a fuih bawk a ni.
Vice Chancellor, Lt Gen Dr AK Misra pawhin thu sawiin ICFAI University chu India rama Private University lian ber te zinga mi niin tunah hian India ram state hrang hrang 16-ah a inzarpharh mek a, ICFAI University dintu Shri N.J. Yasaswy an hmathlir thui tak a lo neih tawh angin India hmar chhak a University tha ber ni turin theih tawp a chhuah mek a ni, a ti.
Convocation vawi sarihna hi ICFAI Chancellor Prof J.P. Ramappa chuan a kaihruai a. Kum 2018 a Icfai University Mizoram atanga Under Graduate leh Post Graduate zir chhuak mi 207 te hnenah Degree hlan a nih bakah zirlai ti-tha bikte hnenah Gold leh Silver Medal hlan a ni bawk.
Kum 2006-ah Mizoram State Legislative Assembly in ICFAI University Act a passed hnuah University hi din niin section 22 of the UGC Act 1956 hnuaiah UG leh PG degree pek theihna a nei. ICFAI University chu Mizoram-a Management zirna hmasa ber leh India hmar chhaka Professional Course zirna tlemte zing ami a ni a. Information Technology zirna kalpui a nih bakah kum 2015 atang khan Humanities & Social Sciences-ah Bachelor leh Master Degree zirna kalpui niin course hrang hrang 17 hawn mek a ni. Tun dinhmunah zirlai 700 chuang an awm mek.
