Nimin (11.10.2018) Chawhnu Dar 1:30 khan District Level Systematic Voters Education & Electoral Participation (SVEEP) Core Committee chu an Chairman leh District Election Officer ni bawk Pi Sangchhin Chinzah hovin District chhunga an hmalak tawhna leh hmalakna kal mek te thlirin an thukhawm a, MLA General Election, 2018 lo awm tura mipuiten ten vote an thlak theuh theihna tur a hmalak zel dan turte an sawiho.

He Meeting ah hian Election Commission Of India (ECI) in a ngaih pawimawh em em kumina Voters’ Day Theme- “Accessible Election” chungchangte sawiho niin, inthlan ni ah pianphunga rualbanlo te pawhin Vote an thlak theuh theih dan turte an ngaihtuah hova, hemi atan hian Mizoram People Forum, District hruaitute nen ruahmanna an siam nghal nghe nghe a ni. Serchhip District ah hian SVEEP Core Committee hmalakna in DC Office a E-District Offiice-ah mipui, a duh apiang tan vote thlak chhin theihna buatsaih mek a ni a, mi thahnemtak in vote hi an tlak chhin tawh nghe nghe a ni. Tin, SVEEP Campaign hian Electronic Voting Machine (EVM) leh Voters Verified Paper Audit Trial (VVPAT) chungchang inhrilhriatna (Mobile Campaign) pawh District chhung khawtinah neih zawh fel tawh niin Govt. Serchhip College ah leh Serchhip khawpui a zirna in hrang hrangah te SVEEP Campaign hi neih ani tawh a. Mizoram People Forum (MPF) ten nena tangkawpin Serchhip, Chhiahtlang leh E.Lungdar ah te pawh SVEEP Campaign hi an lo kalpui tawh a ni.

SVEEP Campaign Video Clip siam niin, tunah hian ECI Approved lak mek ani a, district chhung khaw hrang hrangah infiamna tournament lianah te SVEEP Campaign hi kalpui thin niin, Village Level Campaign lo nei ve turin khawtina Booth Level Officers (BLO) te chu hriattir an ni. Tin, Polling Station zawng zawngah Booth Level Awareness Group (BAG) din a nih tawh bawk.