Nimin (11.10.2018) khan Kolasib District Election hmalakna in I&PR Conference hall ah election kaihhnawih a Media hnathawh leh kalphung bakah MCC Chunghanga inzirtirna Media Symposium on Election neih a ni.

He hunah hian Kolasib Bawrhsap leh District Election Officer ni bawk Dr.Arun T, IAS chuan Media a bik takin Social Media khawvelah kan cheng tawh a, Mizoramah pawh inthlan hmasa lam aiin kumin inthlanpui lo awm turah hian Social Media hmanna chu nasa takin a pung  ang tih a rin theih a, Social Media a kan thudawn leh chhiar te hi pawngpaw awih ringawt chi a nilova, chutiang zelin hnam leh hnam, sakhua leh sakhua inkara buaina leh inhuatna chhawk chhuak thei zawnga Election chungchaga Social Media hman chu Khua leh Tui tha tana thil tih loh tawp tur ani a, kan thudawn te pawh a dik leh dikloh te zirchiang hmasak phawt a tul a ni a ti.

He inkawmhona ah hian Kolasib Addl DC Pu Laltanpuia Hnamte, MCS chuan Inthlan kaihhnawiha Model Code Of Conduct chungchangah zirtirna a pe a, Sawrkar hna thawkte hriattur, Party mi leh sa te hriattur bakah MCC ina a thil khap leh rem tiloh te, a phal chin te sawizauna hun  a hmang a, PU Christopher Lawlor, Associate Professor, Govt. Kolasib College, Member Secretary Media Management Committee ni bawk chuan paid news leh Inthlanpui boruak vela Media mi leh sa te zawm tur chungchangah Power Point presentation hmangin zirtirna a pe bawk a, MCC leh Media Presentation ah hian thil hriatchian loh leh hriat belh duh chungchangah zawhna leh chhanna hun buatsaih a ni bawk a, hlawkthlak taka hun hman a ni.

Chawhnu lamah Kolasib SP Pu Abhisek Dhania IPS kaihhruaina hnuaiah ‘Workshop on Fighting Fake News and Misinformation’ neih a ni a, he hunah hian Digital empowerment Foundation, New Delhi atangin Pu Ravi Gauri leh Pi Udita te chuan Social Media a fake News leh thu belhchian dawl lo chungchangah sawizauna an nei a, kalkhawm te nen inkawmhona (interactive session) neih bawk a ni.

He Media Symposium ah hian Kolasib District huam chhunga Sawrkar Official hrang hrang, Election kaihhnawiha Sector Officer, Nodal Officer te, Khawtlang hruaitute, MJA Member te bakah Political Party hrang hrang aiawh te an kalkhawm a ni.